IофшIэн лъыхъухэрэм апай
IофшIэн зимыIэхэу ыкIи ащ лъыхъухэу республикэм исхэм ащыщхэм проектэу «Социальный контракт» зыфиIорэм нахь игъэкIотыгъэу нэIуасэ зыфашIымэ ашIоигъоу Адыгеим шъолъыр гъэIорышIэнымкIэ и Гупчэ бэрэ зыкъыфагъазэу къыхэкIы.
Адыгэ Республикэм IофшIэнымрэ социальнэ хэхъоныгъэмрэкIэ и Министерствэ иIофышIэхэм программэу кIуачIэ зиIэ хъугъэм фэгъэхьыгъэ упчIэу цIыфхэм къаIэтыгъэхэм джэуапхэр къаратыжьых.
IофшIэн къэгъотыгъэнымкIэ социальнэ контрактыр гъот макIэ зиIэхэу IофшIэн лъыхъухэрэм социальнэ IэпыIэгъоу аратырэм изы лъэныкъоу щыт. Хэта ащ фэдэ социальнэ контракт (зэзэгъыныгъэ) адэшIыгъэным щыгугъын зылъэкIыщтхэр? Ахэр гъот макIэ зиIэ цIыфхэу IофшIэн лъыхъухэрэр ары. Пстэуми апэу сабыйхэр зэрыс унагъохэу гъот макIэ зиIэхэр ары ащ къыхиубытэхэрэр.
«IофшIэн къэгъотыгъэным пае социальнэ контрактэу зэдашIырэм мэзи 4 пIалъэу къыдилъытэрэр, мазэ къэс ахъщэ къаратыщт. Iоф зэримыIэм е зэрэлъыхъурэм япхыгъэу цIыфхэм IофшIэн ягъэгъотыгъэнымкIэ Гупчэм зыщязгъэтхыгъэм апэрэ ахъщэр къыIокIэ. Адрэ тыгъуи 3-р IофшIапIэ зэригъотыгъэр къэзыгъэшъыпкъэжьырэ тхылъыр къызщыратыгъэ мафэм къыщыублагъэу ары. IофшIэнымкIэ ыкIи цIыфхэр социальнэу ухъумэгъэнхэмкIэ Гупчэм цIыфым сэнэхьат зэригъэгъотынымкIэ ишIуагъэ ригъэкIын ылъэкIыщт. Курсым пае ахъщэу ытыщтым телъытэгъэ зэтыгъо ахъщэ IэпыIэгъоу сомэ мин 30-м шIомыкIэу ащ раты», — къыIуагъ Адыгеим IофшIэнымрэ социальнэ хэхъоныгъэмрэкIэ и Министерствэ испециалист-эксперт шъхьаIэу ХъорэлI Асфар.
IофшIэн къэгъотыгъэнымкIэ социальнэ зэзэгъыныгъэр мэзи 9-м шIокIынэу щытэп. Ащ нахь мэкIэни ылъэкIыщт а пIалъэр. ЗэкIэ зэлъытыгъэр Гупчэм иIофышIэхэмрэ цIыфэу къяолIагъэмрэ зэдызэхагъэуцорэ программэр ары. ИщыкIагъэу зыщыхъурэм цIыфхэм IофшIэн ягъэгъотыгъэнымкIэ къулыкъухэри ащ къыхагъэлэжьэнхэ алъэкIыщт.
«Зыгорэм зыфагъасэ е сэнэхьат тедзэ зэрагъэгъоты зыхъукIэ сомэ 5202-рэ аратызэ, мэзи 3-м шIомыкIэу, адеIэх. Ащ нэмыкIэу IофшIэн къязытыгъэми хъарджхэу ышIыгъэхэм апае сомэ 16630-м шIомыкIэу раты», — къыIуагъ ХъорэлI Асфар.
АдыгеимкIэ ащ фэдэ къэралыгъо IэпыIэгъур нэбгырэ 76-мэ аратыгъ. «Социальнэ контракткIэ» зэджэгъэхэ проектым игъэцэкIэн пстэумкIи сомэ 1622090-рэ къыфыхагъэкIыгъ.