Адыгэ Республикэм щыпсэурэ лъэпкъхэм яшэн-хабзэхэм, зекIокIэ-шIы­кIэхэм афэгъэхьыгъэ шъолъыр фестивалыр заочнэ шIыкIэм тетэу рагъэкIокIыгъ.Республикэм лъэпкъ культу­рэмкIэ и Гупчэ, Адыгэ Рес­публикэм культурэмкIэ и М­инис­терствэ зэхащэгъэ фестивалым лъэпкъхэм язэфыщытыкIэ гъэпытэгъэным, патриоти­ческэ пIу­ныгъэм, ижъырэ лъэ­хъаным лъэпкъхэм культурэу яIагъэр нахьышIоу зэгъэшIэ­гъэным, щы­Iэныгъэм диштэрэ шэн-хабзэхэр къэIэтыжьыгъэнхэм, нэмыкIхэм ащытегущыIа­гъэх.

Лъэпкъхэм яшэн-хабзэхэр щы­Iэныгъэм щыгъэфедэгъэнхэмкIэ лIэужхэм язэпхыныгъэхэм мэхьэнэ ин яIэу зэрэщытыр фе­стивалым щыхагъэунэфы­кIыгъ.

Унагъом ипсэукIэ, пэсэрэ шэн-хабзэхэр зэрэзэрихьэхэрэм, мамыр зэдэпсэуныгъэр республикэм зэрэщылъагъэкIуатэрэм, лъэпкъхэр нахь зэфэзыщэрэ амалхэр къыхэгъэщыгъэнхэм, лIэужхэм язэпхыныгъэ лъэхъаным зэрэдиштэрэм, фэшъхьаф­хэм зэхэщакIохэр алъыплъагъэх.

Фестивалым къыщаIэтыгъэ Iофыгъохэм язэфэхьысыжьын фэгъэзагъэхэр республикэм щы­цIэрыIох. Адыгэ Республикэм изаслуженнэ журналистэу, тха­кIоу, шIэныгъэлэжьэу, общест­веннэ IофышIэу Къуекъо Асфар осэшI купым пэщэныгъэ дызэрихьагъ. Цэй Саидэ, Ахъмэт Артур, Ирина Кириченкэр, ­Анатолий Уваровыр культурэм, искусствэм яIофышIэх.

Зэнэкъокъур едзыгъуитIу хъу­гъэ. Апэрэр республикэм культурэмкIэ иунэхэм ащыкIуагъ. Нэбгырэ 1383-рэ хэлэжьагъ. Онлайн шIыкIэм тетэу яплъы­гъэр 8560-рэ мэхъу.

Урысхэм, адыгэхэм, къэзэкъхэм ятворческэ купхэм ялъэпкъ шэн-хабзэхэр нахь гъэшIэгъонэу къагъэлъэгъуагъэх.

Къахэщыгъэхэр

Теуцожь районымкIэ Гъобэ­къуае культурэмкIэ и Унэ шIу­хьафтын шъхьаIэу «Гран-при» зыфиIорэр фагъэшъошагъ, драматическэ купэу «Гунэсым» ипащэр Теуцожь Фатим.

Мыекъопэ районым ифольк­лор купэу «Вечеринкэм» апэрэ чIыпIэр къыдихыгъ, пащэр Елена Величко.

ПсэупIэу Ханскэм илъэпкъ орэдыIо ансамблэу «Калина краснаям» ятIонэрэ чIыпIэр ыхьыгъ.

Шэуджэн районым илъэпкъ театрэу «Фарзэм» ящэнэрэ чIы­пIэр къыдихыгъ. ЗыцIэ къетIогъэ купхэр лауреат хъугъэх.

Красногвардейскэ районым илъэпкъ хорэу «Родники» дип­ломыр фагъэшъошагъ, апэрэ чIыпIэр къыдихыгъ, пащэр Николай Удалов. Джэджэ районым иадыгэ къэшъокIо ансамблэу «Насыпым» ятIонэрэ чIыпIэр ыубытыгъ, пащэр Гъубжьэкъо Саид.

Адыгэкъалэ илъэпкъ театрэу «Лъэпэмафэм» ящэнэрэ чIыпIэр ыхьыгъ, пащэр Татько Нэфсэт.

Лъэпкъ культурэр къэухъумэгъэнымкIэ шэн-хабзэхэр дэгъоу къызэригъэлъэгъуагъэхэм фэшI Кощхьэблэ районымкIэ Фэдз культурэмкIэ и Унэ илъэпкъ драматическэ театрэу «Дэхэ­нэфыр» къыхагъэщыгъ, пащэр Быжь Свет.

Тэхъутэмыкъое районымкIэ культурэм и Унэу Отрадненскэм дэтым лъэпкъ культурэм икъэухъумэн чанэу зэрэхэла­жьэрэм фэшI Диплом фагъэ­шъошагъ.

Зэфэхьысыжь кIэкI

Зэдэпсэурэ лъэпкъхэр на­хьышIоу зэрэшIэхэ зыхъукIэ, лъытэныгъэу зэфашIырэм зы­къиIэтыщт. Адыгэ Республикэм лъэпкъ культурэмкIэ и Гупчэ ипащэу Бадый Къэплъан къызэриIуагъэу, фестивалым къыщаIэтыгъэ Iофыгъохэр зэхэщэкIо купым зэфихьысыжьыщтых. Лъэпкъ шэн-хабзэхэр къэухъу­мэгъэнхэм, щыIэныгъэм щыпхырыщыгъэнхэм яхьылIэгъэ Iоф­тхьабзэхэр зэхащэщтых.

Сахьидэкъо Нурбый.