Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм 2008 – 2009-рэ илъэсхэм къэхъугъэ кIалэхэр щызэнэкъокъугъэх.

ЕджапIэм изэIухыгъэ зэIукIэгъухэм республикэм щапIугъэхэр ахэлэжьагъэх. Яонтэгъугъэхэм ялъытыгъэу бэнэкIуи 7-мэ апэрэ чIыпIэхэр къыдахыгъэх.

Къэрэбэщ Заур, кг 34-рэ, тренерыр Евгений Демченко. Ацумыжъ Ринат, кг 38-рэ, тренерыр Нэгъуцу Азэмат. СултIан Салбый, кг 42-рэ, зыгъасэрэр ХыдзэлI Мурат. Бэгъ Астемир, кг 46-рэ, зыгъасэрэр Гъомлэшк Алый. Джарымэ Ибрахьим, кг 50, тренерыр Ацумыжъ Заур. Хьабэхъу Салбый, кг 55-рэ, тренерыр Хьабэхъу Адам, Шъэумэн Якъуб, кг 55-м къехъу, зыгъасэрэр Нэгъуцу Азэмат.

Апэрэ чIыпIэхэр къыдэзыхы­гъэхэр Тэхъутэмыкъуае, Афып­сыпэ, Псэйтыку, Нэчэрэзые, Пэ­нэхэс, Пэнэжьыкъуае ащеджэх.

— Тренер-кIэлэегъаджэхэм, бэнакIохэм лъэшэу тафэраз, — къытиIуагъ зэнэкъокъум изэхэщэкIо куп хэтэу, Адыгэ Респуб­ликэм дзюдомкIэ испорт еджапIэу Кобл Якъубэ ыцIэ зыхьырэм ипащэу, Адыгэ Республикэм изас­луженнэ тренерэу Бастэ Сэлымэ. — ЕджакIохэм языгъэ­псэфыгъо мафэхэм бэнакIохэр зэнэкъокъум дэгъоу фагъэхьазырыгъэх. КIэлэеджакIохэм яIэпэIэ­сэныгъэ хагъэхъоным фэшI шIы­кIабэ къагъотыгъэу сэлъытэ.

ХагъэунэфыкIыхэрэ чIыпIэхэр къыдэзыхыгъэхэм афэгушIуагъэх, медальхэр, щытхъу тхылъхэр аратыжьыгъэх.

Зэнэкъокъум еджэкIуи 120-рэ хэлэжьагъ. Тренерхэр, бэнакIохэр дзюдом, еджэным афэгъэхьыгъэу гущыIэгъу зэфэхъугъэх. Гъэмэфэ зыгъэпсэфыгъо мафэхэр зэрагъэ­кIуагъэхэм, илъэсыкIэ еджэгъум мурадэу яIэхэм, нэмыкIхэм атегущыIагъэх. Нэпэеплъ сурэтхэр атырахыгъэх.

Сурэтым итхэр: хагъэунэфыкIырэ чIыпIэхэр къыдэзыхыгъэ­хэр, зэхэщакIохэр.