ЕджапIэхэм якIолIэжьыгъэх
Адыгеим икIэлэеджэкIо мин 57,5-м ехъумэ непэ еджэгъу илъэсыкIэр рагъажьэ. Тигъэзет къызэрэхиутыгъагъэу, очнэ шIыкIэм тетэу еджэныр аублэжьыщт.
«ШIэныгъэм и Мафэ кIэлэцIыкIухэмкIэ ыкIи ахэм янэ-ятэхэмкIэ мэфэкI хэхыгъэу щыт. Тыщэгугъы зэредгъажьэрэм фэдэу очнэ шIыкIэкIэ еджэгъу илъэсри кIонэу», — къащитхыгъ Адыгеим и ЛIышъхьэ социальнэ нэкIубгъохэм.
Апэрэ, я 9-рэ ыкIи я 11-рэ классхэм ащеджэщтхэр ары мэфэкI Iофтхьабзэхэм непэ ахэлажьэхэрэр.
Апэрэ классым кIохэрэм, хабзэ зэрэхъугъэу, шIухьафтынхэр афашIыщтых. ЗэкIэмкIи ящыкIэгъэщт Iэмэ-псымэ зэхэлъ мини 6,8-м ехъу атыщт. Ахэм ахэлъых нэфынэм къезыгъэгъэзэжьырэ ныбалъэхэу сабыйхэм гъогурыкIоныр щынэгъончъэ афэхъуным тегъэпсыхьагъэхэри.
«Шъугу къэзгъэкIыжьынэу сыфай Урысыем и Президент игукъэкIхэм яшIуагъэкIэ гъэсэныгъэм иматериальнэ зытет аужырэ уахътэм нахьышIу зэрэтшIышъугъэр. Адыгеим еджапIэхэр щашIых ыкIи щагъэцэкIэжьых, спортивнэ залхэр щызэтырагъэпсыхьажьых, компьютер оборудованиякIэ еджэпIэ пстэуми яI, къоджэ еджапIэхэм физикэр, химиер, биологиер ыкIи информатикэр нахь куоу ащызэрагъэшIэным иамалхэр аIэкIэлъы мэхъух», — къытхыгъ КъумпIыл Мурат.
Джащ фэдэу къызэрэхигъэщыгъэмкIэ, кIэлэцIыкIухэм гъэсэныгъэ тедзэ ягъэгъотыгъэнми анаIэ тет — 2023-рэ илъэсым ыкIэ нэс чIыпIэ мин 23-рэ агъэпсыщт робототехникэм, спортым, зекIоным, дизайным ыкIи нэмыкIхэм щапылъынхэ алъэкIынэу. ИкIыгъэ илъэсым къызэIуахыгъэх республикэ технопаркэу «Кванториум» ыкIи сэнаущыгъэ зыхэлъ сабыйхэм якъыхэгъэщынрэ IэпыIэгъу афэхъугъэнымрэкIэ гупчэу «Полярис-Адыгея» зыфиIохэрэр.
Анахь мэхьанэшхо зэратырэ Iофыгъохэм ащыщ сабыйхэм шхын стыр аIэкIэгъэхьэгъэныр. Ар гум рихьэу ыкIи кIэлэцIыкIум ыпкъышъол ищыкIэгъэ пстэури хэлъэу щытын зэрэфаем ЛIышъхьэм къыкIигъэтхъыгъ, аущтэу щытыным пае ны-тыхэр уплъэкIунхэм чанэу къахагъэлэжьэнхэу унашъо ышIыгъ.
Сурэтыр Мыекъопэ администрацием ипресс-къулыкъу ий.