Адыгеим и ЛIышъхьэу КъумпIыл Мурат проектэу «КIэугъоекIо прави­тельствэр» зыфиIорэр пхырыщыгъэнымкIэ тыгъуасэ Координационнэ советым изэхэсыгъо зэрищагъ.

РеспубликэмкIэ ащ фэгъэзагъэр Дмитрий Репьевыр ары, зэхэсыгъом хэлэжьэным пае ар къэкIуагъ. 2020-рэ илъэсымкIэ ыкIи 2021-рэ илъэсым иапэрэ кIэлъэныкъокIэ проект зырызхэм ягъэцэкIэн зэрэкIуагъэм икIэ­уххэр мыщ щызэфахьысыжьыгъэх.

«Республикэм щызэшIуахырэ проектхэр зэкIэ пстэуми апэу зыфэгъэхьыгъэхэр лъэпкъ гу­хэлъхэу Урысые Федерацием и Президентэу Владимир Путиным къыгъэнэфагъэхэр пхы­рыщыгъэнхэр ары. Хэгъэгум щы­псэурэ пэпчъ ахэр ыгукIэ пэблагъэх ыкIи къыгурэIох. Пстэуми апэу цIыфхэм IофшIэпIакIэхэр ягъэгъотыгъэнхэр, кIэлэцIыкIухэм гъэсэныгъэ ягъэ­гъотыгъэнымкIэ зэфэдэ амалхэр ятыгъэнхэр, цIыфхэм щыIэ­кIэшIу яIэныр, хэгъэгуми, рес­публикэми щынэгъончъэ щыIакIэ арылъыныр ары ахэр зэпхы­гъэхэр», — къыхигъэщыгъ Къум­пIыл Мурат.

АР-м и ЛIышъхьэрэ Адыгеим иминистрэхэм я Кабинетрэ я Администрацие ипащэ игуадзэу Хъоткъо Саныет къызэриIуа­гъэмкIэ, «КIэугъоекIо правительствэр» зыфиIорэм къыдилъы­тэхэрэм организацие 83-мэ ялIы­кIо 570-рэ афагъэсагъ, рес­публикэм икъэралыгъо хабзэ икъулыкъу 33-рэ ыкIи подве­домственнэ организацие зэфэшъхьафхэр ащ хэлажьэх, пстэ­ум­кIи проект 74-рэ пхыращы. Предприятиехэмрэ учреждениехэмрэ яIофшIэн нахьышIоу зэ­хэ­щагъэ зэрэхъурэри къэнэфагъ.

2021-рэ илъэсым иапэрэ кIэ­лъэныкъо IофшIэным илъэныкъо шъхьаIэхэм ащыщ хъугъэ «щысэтехыпI» зыфиIорэ гущыIэм зэ­рэдиштэхэрэр зэгъэшIэгъэнымкIэ уплъэкIунхэр зэхэщэгъэнхэр. Ахэр гъэхъагъэ хэлъэу зыщыкIуагъэхэм ащыщых дэеу зэхэзыхырэ ыкIи дэеу зылъэгъурэ кIэлэцIыкIухэр зыщаIыгъхэ ­Адыгэ республикэ еджэпIэ-интернатыр, мыекъопэ кIэлэцIыкIу IыгъыпIэу N 21-р, МКъТУ-р, пивэшI заводэу «Майкопскэр», Мыекъопэ водоканалыр. МКъТУ-м Iофэу ышIэрэр федеральнэ лъэгапIэм тетэу щысэ зытырахыщтхэм ащыщ хъунэу игъо алъэгъугъ.

Зэхэубытагъэу къэпIон хъумэ, «КIэугъоекIо правительствэр» зыфиIорэм къыдилъытэхэрэр республикэм гъэцэкIагъэ зэрэщыхъухэрэм Дмитрий Репьевым осэшIу къыфишIыгъ.

Ащ нэужым сэнаущыгъэ зы­хэлъ кIэлэцIыкIухэр къыхэгъэщы­гъэнхэмкIэ ыкIи ахэм яамал­хэм заушъомбгъунымкIэ шIуагъэ къэзытырэ системэр гъэфедэ­гъэным иIофыгъо хэплъагъэх. Адыгеим и ЛIышъхьэ къызэрэхигъэщыгъэмкIэ, сэнаущыгъэ зыхэлъ кIэлэцIыкIухэм IэпыIэгъу зэрафэхъущтхэ шIыкIэ-амалхэр республикэм щагъэнэфагъэх. Ащ ишIуагъэкIэ Урысые олимпиа­дэхэм ахэлажьэхэрэр ыкIи те­кIоныгъэр къыдэзыхыхэрэр на­хьыбэ хъугъэх. КъумпIыл Мурат къыхигъэщыгъ сэнаущыгъэ зы­хэлъ кIэлэцIыкIухэр нахьыбэу гъэунэфыгъэнхэмкIэ, джащ фэ­дэу лъэпкъ проектэу «Гъэсэ­ныгъэр» пхырыщыгъэнымкIэ Iофэу ашIэрэр лъагъэкIотэным мэхьанэшхо зэриIэр.

А гухэлъыр зыдаIыгъэу Мые­къуапэ дэт лицееу N 8-м олимпиадэхэм ахэлэжьэщт кIэлэ­еджакIохэр нахь дэгъоу гъэхьазырыгъэнхэмкIэ проектыр агъэ­федэ хъугъэ. Лицеим ипащэу Эмма Осерскаям къызэриIуа­гъэмкIэ, проектыр пхырыщы­гъэным ичэзыу пстэуми мэхьэнэ гъэнэфагъэ яIэу щыт, кIэлэ­еджакIохэм япсауныгъэ икъэу­хъумэни лъэшэу анаIэ атыра­гъэты. КIэлэцIыкIу IыгъыпIэу N 21-м ипащэу Лые Саидэ къы­зэриIуагъэмкIэ, кIэлэцIыкIухэм жэкIоцIым епхыгъэ узхэр цIыкIу­хэзэ къахэгъэщыгъэнхэм пае стоматологическэ поликлиникэм зэдэлэжьэныгъэ гъэнэфагъэ дыряI.

Адыгэ республикэ клиническэ сымэджэщым иврач шъхьаIэу Чэужъ Нателлэ къызэриIуагъэмкIэ, Iофыгъоу къаIэтыгъэхэм атегущыIагъэх ыкIи ахэр зэрэ­дагъэзыжьыщтхэмкIэ Iофтхьа­бзэхэр агъэнэфагъэх.

Адыгеим и ЛIышъхьэ къызэриIуагъэмкIэ, 2030-рэ илъэсым нэс Урысые Федерацием хэ­хъоныгъэ зэришIыщтым илъэпкъ проектитфмэ ащыщых цIыфхэр ыкIи ахэм япсауныгъэ къэухъу­мэгъэныр, щыIэкIэшIу яIэныр.

Зэхэсыгъом къыщыгущыIагъ АР-м и ГСЗН и ГъэIорышIапIэ ипащэу Галина Цыганковар. Проектэу «IофшIэн ягъэгъотыгъэнымкIэ къулыкъум зыкъы­фэзгъэзагъэхэм ащыщхэу Iоф­шIэн зэрагъэгъотыхэрэр нахьыбэ шIы­гъэнхэр» зыфиIорэм ичэзыухэм ар къатегущыIагъ. МУП-у «Майкопводоканал» зыфиIорэм ипащэу Iэпэжьыхьэ СултIани предприятием ипро­ектхэм ащигъэгъозагъэх.

Адыгеим и ЛIышъхьэ къызэриIуагъэмкIэ, Iофэу ашIэрэм илъэныкъо пстэухэмкIи джыри нахь гъэхъэгъэшIухэм къафэ­кIонхэ фае. «КIэугъоекIо правительствэм» къыдилъытэхэрэр тапэкIи нахьышIоу пхырыщыгъэн­хэм хабзэм икъутамэхэр зэкIэ хэлэжьэнхэ фае, лъэпкъ про­ектхэмрэ къэралыгъо программэхэмрэ къыдалъытэхэрэм та­нэсыным пае игъом щыкIагъэхэр къыхэгъэщыгъэнхэ фае.

АР-м и ЛIышъхьэ ипресс-къулыкъу