Мыекъуапэ игупчэ зыгъэ­псэфыпIэ гухэлъэу фыряIэхэр къыIотагъэх Адыгеим и ЛIы­шъхьэу КъумпIыл Мурат. Ар къэлэ паркым къыще­жьэщт ыкIи зиушъомбгъущт Мэздахэ къыпэIулъ чIыпIэм нэс.

КъумпIыл Мурат социальнэ хъытыухэм къызэращитхыгъэмкIэ, зекIоу къакIохэрэм япчъагъэ илъэс къэс зэрэхахъорэмкIэ къэпIон плъэкIыщт Адыгеир къа­шIэжьэу ыкIи нахь зэрагъэлъэгъу ашIоигъоу зэрэхъурэр.

— Тигуапэ тишъолъыр фэгъэ­хьыгъэу дэгъубэ къызэраIорэр, хьакIэхэм тызэрапэгъокIырэр, тихабзэхэр, тичIыопс идэхагъэ къызэрэхагъэщыхэрэр. Ар дгъэ­федэзэ, зекIохэм языгъэпсэфын Iэрыфэгъу афэхъуным тызэрэпылъым дакIоу республикэм щыпсэухэрэми яуахътэ дэгъоу агъэкIоным тыдэлэжьэщт. Мы Iофыгъом лъэныкъо зэфэшъхьаф­хэр дгъэфедэхэзэ тыкъекIуалIэ, зыгъэпсэфынымкIэ шIуагъэ къэ­зытыщт чIыпIэхэр тэгъэфедэх. Ахэм ащыщ Мыекъопэ къэлэ паркымрэ Мэздахэ ыубытырэ чIыналъэмрэ зэхэгъэхьэгъэнхэр ыкIи зыфэдэ къэмыхъугъэ зыгъэпсэфыпIэ зэтегъэпсыхьэ­гъэныр. Проектым игъэцэкIэн игъо­рыгъоу зэшIотэхы, — къыхигъэщыгъ КъумпIыл Мурат.

Адыгеим и ЛIышъхьэ тапэкIи къыриIотыкIыгъагъ Шъхьэгуащэ Мыекъуапэ къызщыдэлъэдэрэ чIыпIэм инэпкъхэр гъэпытэгъэн­хэм, бассейныр зэтегъэпсыхьа­жьыгъэным ыкIи ащ лъэхъаным диштэрэ зыгъэпсэфыпIэ щы­шIыгъэным афэгъэхьыгъэу. Джы зекIо чIыпIакIэ хъущт Нэгыежъ Iуашъхьэу тарихъ мэхьанэ зиIэр. Ижъырэ къэлэжъым ипытапIэ, Iошъхьэ пчъагъэ ащ къыщагъотыгъэх. Мы чIыпIэр сыдигъокIи зыгъэпсэфакIохэм якIэсагъ. Ащ изэтегъэпсыхьажьын 2018-рэ илъэсым рагъэжьагъ дэкIояпIэм игъэкIэжьынкIэ. ЗыплъыхьапIэу метрэ 300 зилъэгагъэм ащ урещалIэ. Джырэ уахътэм Мэздахэ ыубытырэ чIыпIэу гектар 435-рэ хъурэм ипроект дэлажьэх. Ана­хьэу зыпылъхэр чIыпIэу зыдэщытым диштэныр ары. Проектыр зыгъэцакIэхэрэм пшъэрылъэу афагъэуцугъэр цIыфым гухахъо паркыр фэхъуныр ары, ау чIы­опсэу къэзыуцухьэрэм ар хэгъэ­щагъэу.

Мэзылъэ чIыпIэм лъэсрыкIо­хэр, кушъхьэфачъэхэмкIэ къызщачъыхьащт, шыхэм атесхэу къызщычъэщтхэр щашIыщтых, тетIысхьапIэхэр, нэфынэр къэзы­тыщтхэр, архитектурэ псэуа­лъэ­хэр щагъэуцущтых, зызщаплъы­хьащтхэ, спортивнэ ыкIи джэгу­пIэ чIыпIэхэр щызэтырагъэпсы­хьащтых. Зыщышхэщтхэри, зы­чIэсыщтхэ псэуалъэхэри агъэуцу­щтых. Гъогужъыехэр ыкIи псэуа­лъэхэр ашIыхэ зыхъукIэ, ахэр зыхашIыкIыщтхэр экологием диштэхэу къыхахыщтых.

— ЗекIо мэхьанэ иIэ закъоу щымытэу, псауныгъэр зыща­гъэ­пытэщт, унагъом зызщигъэ­псэ­фын ылъэкIыщт, зызщагъэпс­кIыщт, гъэшIэгъонэу яуахътэ зы­­щагъэкIошъущт чIыпIэу респуб­ликэм щыпсэухэрэми, хьакIэ­хэ­ми афэхъунэу тэгъэнафэ. Ти­шъо­лъыр щыпсэухэрэм яшIои­гъоны­гъэхэр къыдэтлъытэхэзэ про­ектым джыри тыдэлэжьэщт, — къыхигъэщыгъ КъумпIыл ­Мурат.