КIэлэеджакIоу ублэпIэ классхэм арысхэм ыпкIэ хэмылъэу шхын стыр ягъэгъотыгъэным кIэщакIо фэхъугъэр УФ-м и Президентэу Владимир Путиныр ары. БлэкIыгъэ илъэсым Джэпсалъэу къышIыгъэм ар къыщиIо­гъагъ. Ащ фэгъэхьыгъэ хэбзэгъэуцугъэм къэралыгъом ипащэ а илъэс дэдэм имэзэе мазэ кIэтхагъ, Iоныгъом и 1-м кIуачIэ иIэ хъугъэ.

2021 — 2022-рэ илъэсыкIэ еджэгъоу рагъэжьагъэм кIэлэ­еджакIохэм ягъэшхэн къэралыгъом ахъщэу пэIуигъахьэрэр сомэ миллиарди 4-кIэ нахьыбэ ышIыщт. Ащ фэдэ унашъо Правительствэм зэриштагъэр хэбзэгъэуцухэм я Совет къыушы­хьатыжьыгъ.

УФ-м и Къэралыгъо Думэ и Тхьаматэ игуадзэу Ирина Яроваям къызэриIуагъэмкIэ, шъо­лъырхэм мы унашъор зэрагъэцакIэрэм зэрэлъыплъэхэрэм ишIуагъэ къэкIуагъ. ГъэрекIо щыкIагъэхэр зиIагъэхэми ахэр дагъэзыжьыгъэх. Шхын стырыр зэраратыщт шэпхъэ гъэнэфа­гъэу законым къыщыдэлъытагъэхэр хэзыгъэ ямыIэу гъэцэкIэгъэнхэми анаIэ тет.

Владимир Путиным 2023-рэ илъэсым нэс зэкIэ еджапIэхэм шхын стырыр шапхъэхэм адиштэу кIэлэеджакIохэм аратыным фэ­хьазырынхэу шъолъырхэм япащэхэм пшъэрылъ къафишIыгъ.