Адыгеим ипоселкэу Каменномостскэм ыкIыб щыIэ гъогум 2021-рэ илъэсым шышъхьэIум и 31-м къыщегъэжьагъэу Iоныгъом и 3-м нэс IофшIэнхэр щыкIощтых.

Ащ къыхэкIыкIэ автотранспортым изекIон охътэ гъэнэ­фагъэм зэпыугъо фэхъущт.

Къэралыгъо учреждениеу «Черноморьем» къызэрэща­IуагъэмкIэ, автомобиль гъогоу А-159-м изы Iахь машинэхэм язекIон сыхьатитIум мына­хьыбэу (чэзыу-чэзыоу) къыщызэтырагъэуцозэ ашIыщт.

Бэдзэогъум ипэублэм щыIэгъэ ошхышхохэм апкъ къикIыкIэ къушъхьэ мыжъохэр къе­хыгъэх. Ар бэдзэогъум и 7-м поселкэу Каменномостскэм ыкIыб къыщыхъугъ. Къеохыгъэ мыжъохэм автомобиль гъогоу «Мыекъуапэ — Гъозэрыплъ» зыфиIорэм ия 45-рэ километрэ изы Iахь зэщагъэкъуагъ ыкIи автотранспортыр къызэтыра­гъэуцуагъ. Охътэ кIэкIым мы чIыпIэм къэсыгъэх гъогу патрулым иIофышIэхэр, ищыкIэгъэ къулыкъухэм макъэ арагъэIугъ.

Мы къушъхьэтхыр зыдэщыт чIыпIэр агъэпытэнэу агъэнафэ, ащ къыхэкIыкIэ гъогум зэ­рэщызекIохэрэм зэпыугъохэр зэрэфэхъущтхэр автомобилыр зезыфэхэрэм агу къагъэкIыжьы. Гъогур зыщызэфашIыщт уахътэр:

06:00 — 07:30, 08:35 — 10:20, 11:10 — 12:10, 13:00 — 13:20, 14:40 — 16:00, 17:10 — 17:30, 18:10 — 19:15.