ЧIыфэр къыпщыныжьыгъ

КIэлэпIупкIэр игъом зымытыщтыгъэ хъулъфыгъэм чIыфэр къыпщы­ныжьыгъ автомобилыр зэрифэнымкIэ фитыныгъэр зэрэIахыгъэр зэтыригъэуцо­жьыным пае.

Хьыкум приставхэм я Мыекъопэ район отделение зэхифынэу къыIэкIэхьэгъэ Iофым зэритыгъэмкIэ, хъулъфыгъэм зыныбжь имыкъугъэ исабыитIу яIыгъын­кIэ мылъку гъэнэфагъэ афызэкIигъэкIожьын фэягъ.

Хьыкум пристав-гъэцэкIакIор ащ IукIагъ, ипшъэрылъхэр зимыгъэцакIэкIэ кIэух дэй фэхъун зэрилъэкIыщтыр гуригъэIуагъ. Ау адрэм кIэлэпIупкIэр игъом ытыгъэп, ащ къыхэкIэу чIыфэ зэIуигъэкIагъ.

УплъэкIунхэм къызэрагъэлъэгъуагъэмкIэ, хъулъфыгъэм машинэр зэрифэнымкIэ удостоверение иI. Хэбзэгъэуцугъэу щыIэм диштэу хьыкум приставым унашъо ышIыгъ ар охътэ гъэнэфагъэкIэ ыгъэфедэн фимытынэу.

Ащ ыуж сомэ мини 100-м ехъу хъулъфыгъэм къып­щыныжьыгъ, ащкIэ Iофыр зэфэшIыжьыгъэ хъугъэ.

Джыри зэ шъугу къэтэгъэкIыжьы: кIэлэпIупкIэр игъом ыкIи икъоу шъутын фае. Ар зымыгъэцакIэхэрэм пшъэдэкIыжь арагъэхьыщт, уголовнэ Iофхэр къызпагъэтаджэхэрэри ахэтых.

Сайтым шъуихьэмэ…

ЧIыфэ шъутелъымэ е Iоф горэ къышъуфызэIуахыгъэмэ зэжъугъэшIэным пае хьыкум приставхэм яфедеральнэ къулыкъу и ГъэIорышIапIэу Адыгэ Республикэм щыIэм исайтэу «Банк исполнительных производств» зыфиIорэм шъуихьанышъ, ащ иамалхэр къызфэжъугъэфедэнхэ шъулъэкIыщт.

ЦIыфхэмкIэ мыр Iэрыфэгъоу щыт, уиунэ уимыкIэу чIыфэр зэрытхэгъэ квитанциер къыдэбгъэкIын, нэужым банкым е почтэм якъутамэхэм ахъщэр ащиб­гъэхьан плъэкIыщт. Джащ фэдэу зы чIыпIэ уисэу сайтым исистемэ къызфэбгъэфедэзэ чIыфэр птыжьын амал щыI.

Хьыкум приставхэм я Федеральнэ къулыкъу и ГъэIорышIапIэу Адыгеим щыIэм ипресс-къулыкъу.