Гъэстыныпхъэ шхъуантIэр ыпкIэ хэмылъэу унэе псэупIэхэм ящагухэм ящэлIэгъэным фэгъэхьыгъэ унашъоу УФ-м и Президент къышIыгъэм ипхырыщын фэгъэхьыгъагъ газифика­циемкIэ АР-м ишъолъыр штаб зэхэсыгъоу иIагъэр. Iофтхьабзэр зэрищагъ АР-м и Премьер-министрэу Геннадий Митрофа­новым.

Зэхэсыгъом къызэрэщыха­гъэщыгъэмкIэ, мы программэм хэлэжьэщтхэм яспискэхэр муниципальнэ образованиехэм мы уахътэм ащагъэпсых. Ащ пае унагъо пэпчъ екIуалIэх. Реестрэу агъэхьазырырэм къыпкъырыкIыхэзэ гъэстыныпхъэ шхъуантIэр унэхэм зэраращэлIэщт планыр зэхагъэуцощт.

АР-м и Премьер-министрэ мы IофшIэнхэм мэхьэнэ ин зэряIэр къыхигъэщызэ, цIыфхэм ар икъоу алъагъэIэсынэу муниципалитетхэм япащэхэм афигъэпытагъ.

— Унагъо пэпчъ Iофыр зытетым щыдгъэгъуазэмэ, программэм нахьыбэу хэлэжьэщт, планри игъом зэхэдгъэуцон тлъэкIыщт. ТиIофшIэн зэрэзэхатщэрэм елъытыгъ цIыфэу гъэстыныпхъэ шхъуантIэр зимыIэхэм ар зэралъыIэсыщтыр, — къыIуагъ Геннадий Митрофановым. Мы уахътэм реестрэм унэу хэхьагъэр мини 4-м ехъу, программэм зэрэхэлэжьэщтыр къэ­зыушыхьатырэ тхылъэу цIыфхэм къатыгъэр 600 мэхъу.

АО-у «Газпром газораспределение Майкоп» зыфиIорэм ипащэу Игорь Сырчиным къызэриIуагъэмкIэ, бэдзэогъум и 26-м къыщегъэжьагъэу лъэIу тхылъхэр аштэх. Ар газифи­кациемкIэ порталым щыптын плъэ­кIыщт, электроннэ почтэмкIэ бгъэхьыми хъущт. Мары ащ иадрес: DGZ@adyggaz.ru. МФЦ-м уекIуалIэми пIахыщт.

Зэхэсыгъом икIэухым Премьер-министрэм Iоныгъом и 1-м нэс планыр къагъэхьазырынэу пшъэрылъ къафишIыгъ.