Адыгеим икъэлэ шъхьаIэ фабэм ирыкIуапIэхэм япроцент 80-р щагъэ­хьазырыгъах. Ащ епхыгъэ псэуалъэхэм ягъэцэкIэжьын зэкIэмкIи сомэ миллион 11 мыгъэ пэIухьагъ. Мыекъуапэ котельнэ 42-рэ иI, ахэм фабэу къатырэр километри 150-рэ хъурэ рыкIуапIэ­хэмкIэ цIыфхэм араты. Мыгъэ урамхэу 12 Мартэмрэ Женя Поповым ыцIэ зыхьырэмрэ зэпызычырэ Iахьыр зэблахъугъ. Метрэ 200-м ар ехъу.

— Ащ дакIоу къалэм ирайонхэу «Восходым», «Черемушкэм», урамхэу Победэмрэ Пио­нерскэмрэ язэхэкIыпIэ дэжь фабэм ирыкIуапIэхэр ащыд­гъэцэкIэжьыгъэх. Унэхэр зы­щыдгъэфабэрэ уахътэхэм ащ фэдэ чIыпIэу гъэцэкIэжьын е гъэкIэжьын зищыкIагъэхэр тэгъэнафэх, — къыIуагъ «Майкопские тепловые сети» ипащэ иIэнатIэ зыгъэцакIэгорэ Игорь Скрипниченкэм. — БлэкIыгъэ кIымафэм фабэм итын зэпыу зыпарэкIи фэхъугъэп. Ащ фэшI, гидравлическэ ушэтынхэр тшIыхэзэ зэщыкъуагъэ зиIэхэр къыхэдгъэщыгъэх.

Джащ фэдэу трубэу фабэр зэрыкIохэрэм ар къадэмы­кIыным пае ящэкIыгъэхэр зэ­бла­хъугъэх, хьакухэм язытет ауплъэ­кIугъ. Районхэм зэкIэми псы стырыр шапхъэхэм адиштэу аIэкIэхьаным фэшI котельнэхэм насосхэр кIэу ащагъэуцущтых. ТапэкIэ нэмыкI оборудованиехэри зэблахъунхэу агъэнэфагъ. Специалистхэм къызэраIорэмкIэ, а зэпстэумэ яшIуагъэкIэ зэпыу фэмыхъоу илъэсыбэрэ фабэр цIыфхэм аратыщт.