Зигугъу къэтшIы тшIоигъор уз мэхъаджэу коронавирусым тиврачхэр зэрэпэуцужьыхэрэр ары.

Теуцожь районымкIэ къутырэу Городскоим щыпсэурэ бзылъфыгъэу илъэс 80-м ехъу зыныбжь Любовь Зинченкэм зэкIэри зыщыщынэрэ коронавирус мэхъаджэр къеуалIи, иIофхэр дэеу Инэм сымэджэщым чIагъэгъолъхьагъ. Ежь Любовь Ивановнари врач Iэпэ­Iас. 1956-рэ илъэсым Карагандинскэ мединститутыр къы­ухыгъ. Илъэс пчъагъэрэ Казахстан Iоф щишIагъ, нэужым илъэныкъо гупсэ къыгъэзэжьи Динской районми бэрэ щылэжьагъ. Джэ­джэхьэблэ сымэджэщым лIэ­шIэгъу плIанэ фэдизырэ иврач шъхьэIагъ. Пенсием зэкIом Пэнэжьыкъое район сымэджэщым рагъэблагъи чэщырэ дежурствэр щихьыщтыгъ, ищытхъу бэрэ аригъэIуагъ. ЗэпстэумкIи илъэс 60-м ехъурэ Iоф ышIа­гъэу, цIыфхэм япсауныгъэ икъэухъу­мэн хьалэлэу фэлэжьагъэу тIысыжьыгъэ. ИцIыфыгъэ, игукIэгъу мыухыжь. ИлъэсипшI пчъагъэхэм зыщылэжьэгъэ чIыпIэ коим хахьэхэрэ чылагъохэу Джэджэхьабли, Къунчыкъохьабли, Тэуехьабли, ежь икъутыри зы унагъо къадэкIынэп Любэ зытIо-зыщэ имыхьэгъэнэу, къо­джэдэсхэм ацIэ-алъэкъуацIэхэри ешIэх, джыри къыфакIох, афэнэгушIу, IэпыIэгъу афэхъу.

Тхыгъэр къэдгъэ­хьазырыныр къыз­хэкIыгъэр

Зигугъу къэтшIыгъэ врачэу Любовь Зинченкэм ищыIэныгъэ гъогу тыкъытегущыIэным паеп. КIэкIэу ыпшъэкIэ зигугъу къэтшIыгъэ тIэкIухэм нэIуасэ шъуаз­кIыфэтшIыгъэр нэмыкI.

Коронавирусым пае вакцинэ зыхябгъэлъхьаныр имыщыкIа­гъэу, нэмыкI къэбарэу зэхэтхырэр макIэп. Любэ ахэм ядэ­Iугъэп, вакцинациер заублэм Пэнэжьыкъуае заригъащи «Спутникыр» къызхаригъэлъ­хьагъ. Ежь Любэ ылъакъохэр мэузыхэшъ, ищагу нахь чыжьэу кIорэп. Тэри загъорэ ядэжь тихьэу къыхэкIышъ, маскэр зыIуелъхьэ, зэкIэми афэсакъы.

БэмышIэу ежь телефонкIэ къысфытеошъ, къысеIо: «Тадэжь укъэмыкIогу, гумэкI уиIэ зыхъу­кIэ телефонымкIэ къаIо». Мэфэ заулэ тешIагъэу икъэбар зэзгъэшIэнэу исхъухьагъ. «Рэмэзан, Инэм сымэджэщым сычIэлъ. Сэ вирусыр зыпысхыгъэ сикъо­рэлъф цIыкIоу Краснодар къи­кIыгъагъэр Мыекъуапэ ащагъ». Макъэу зэхэсхырэм сымаджэр зэрэхьылъэр, иIоф зэрэдэир къыуегъашIэ. Мэфэ заулэ тешIагъэу ятIонэрэу сызыфытеом къызгурыIуагъ джыри зэрэхьы­лъэр, ау къысеIо икъорэлъф Мые­къопэ госпиталым къызэрэ­чIатхыкIыжьыгъэр. Ащ нафэ къе­шIы коронавирусыр нахьыжъхэм лъэшэу къызэряхьылъэкIырэр.

Госпиталым иIофышIэхэм афэраз

— Ситхьабылхэр плъыр-стыр узым зэлъиштагъэхэу Инэм сымэджэщым сынагъэсыгъ, — къеIуатэ Любовь Зинченкэм. – СиIофхэр дэй дэдагъэх. Сызэрагъэгъолъхьэгъэ палатэм илъыгъэ нэбгыритIуми яIофхэр дэгъугъэхэп. Ау тыгу къыдэзыщэягъэр врачхэу, медсестрахэу, санитаркэхэу къытфэгумэкIыщтыгъэхэр ары. Ахэм афэдэ бэрэ уапэ къифэнэп. Зыпкъ итхэу, фэIэпэIасэхэу капельницэхэр къытхагъэуцощтыгъ, температурэр, лъыдэкIуаер ашыщтыгъ, кислородыр къызэрэтIэкIахьэрэр ауплъэкIущтыгъ, врачхэм ренэу гущыIэ фабэхэр, тызэрагъэхъужьыщтыр къытаIощтыгъ. Врачхэр ныбжьыкIэх, шъабэу мэгущыIэх, мэкъэ лъэш щызэхэпхырэп, зэкIэхэри Iушых, гъэсагъэх, ясэнэхьат хэшIыкIы­шхо фыряI.

Джаущтэу врачхэри медсестрахэри агурэ апсэрэ етыгъэу, зыухъумэщтхэ щыгъынхэр ащыгъ­хэу сыхьатихэ «зонэ плъы­жьым» итых, зэрэфэбэ­шхом пае къамыгъанэу.

— ЕIолIапIэ имыIэу госпиталым плIэгъогогъо тыщагъашхэщтыгъ, — къытфеIуатэ Зинченкэм. — Ары къэс хьакъу-шыкъухэр утилизацие ашIых, сы­мэ­джэ хьылъэхэр кислород ща­гъакIэхэрэп, игъом агъашхэх. Нэрылъэгъу къысфэхъугъ Инэм сымэджэщым дисциплинэшхо зэрэчIэлъыр, щысэтехыпIэу Iоф­шIэнхэр зэрэщызэхэщагъэхэр. ЗэгурыIохэзэ, зэдэIужьхэзэ коллективым хэтхэр зы унагъо къикIыгъэм фэдэу аIэ зэкIэдзагъэу зэрэзэдэлажьэхэрэр. Сэри мары зыпкъ сыкъырагъэуцожьи сыкъэкIожьыгъ. Сиврачыгъэр Мамхыгъэ Ирин ары. А цIыкIур егъашIэм сщыгъупшэнэп. Непэ къызнэсыгъэм сынэгу кIэт. Къы­зэрэслъытагъэмкIэ, зэкIэмкIи госпиталым нэбгырэ 200 – 250-рэ фэдизмэ щяIазэх. Ахэм зэкIэми яфэIо-фашIэхэр зэрифэшъуашэу бгъэцэкIэныр, бгъэхъу­жьынхэшъ, гушIохэу гъогу теб­гъэхьажьынхэр, ябын-унагъохэм арыбгъэхьажьынхэр зымыуасэ щыIэп. А зэпстэур зыпшъэ ифэ­рэ IофышIэхэм яврач шъхьаIэу МэщлIэкъо Заремэ госпиталым къыздычIэлъыгъэ бзылъфыгъэ­хэм ацIэкIэ псауныгъэ пытэ иIэнэу, шIоу, дэгъоу щыIэр къыдэхъоу щыIэнэу тыфэлъаIо.

ИкIэухым къыхэдгъэхъожьымэ тшIоигъор, зигугъу къэтшIырэ Любовь Зинченкэми къызэриIуа­гъэу, вакцинэр зэкIэми зыхарагъэлъхьан зэрэфаер ары. Аущтэу зымышIыгъэ нэжъ— Iужъым ятIонэрэу вирусыр къы­зеолIэжькIэ, фэщыIэжьыщтэп. ТигущыIэгъу ятIонэрэу коронавирусыр къыфыкъокIи, чIыпIэ хьылъэ зефэм къэзыгъэнагъэр мыгъатхэ прививкэр аригъэшIыгъэу зэрэщытыгъэр ары.

Любовь Зинченкэм илъэIукIэ тхыгъэр  Нэхэе Рэмэзанкъыгъэхьазырыгъ.