Хъулъфыгъэр «лIы хъугъэ» пIоным пае Iофыгъуищ зэшIуихын фае. Ахэр зэкIэ ыпшъэ ифагъ ПчыхьалIыкъуае щыщэу, ащ ицIыф гъэшIуагъэу Хъурэе Рэмэзан Якъубэ ыкъом: уни ышIыгъ, унагъуи ышIагъ, чъыги ыгъэтIысхьагъ. Ыгъахъэхэрэм арыгушхомэ, ахигъахъозэ, илъэс тIокIиплIым ар къекIолIагъ.

Джы нахь игъэкIотыгъэу ищыIэныгъэ гъогу нэIуасэ шъуфэсшIын. Рэмэзанэ Хэгъэгу зэошхор къежьэгъэ къодыеу 1941-рэ илъэсым Iоныгъом и 20-м къэ­хъугъ. 1960-рэ илъэсым – ПчыхьалIыкъое гурыт еджапIэр, 1965-м – Донской институтыр къыухыгъэх. Институт ужым ветеринар врач – эпизоотологэу, чэтэхъо фабрикэм иврач шъхьаIэу, нэужым Теуцожь межрайон ветеринар лабораторием илъэс 16 ыкIи мы районым иветврач шъхьаIэу Iоф ышIагъ. IофшIэным IукIыжьынэу зэрэхъугъэм шъущыдгъэгъозэн.

Рэмэзанэ иунэ дизель гъэстыныпхъэ­кIэ а лъэхъаным ыгъэфабэщтыгъ. Чылэм къыдэхьэгъэ машинэ горэм дизель щещэфы. А Iофыр зыгорэм районым негъэсы. «Партием хэт цIыфхэр къэбзэнхэ фае, о тыгъугъэр пщэфыгъэ», — аIошъ, IофшIапIэу зыIутым къыIуа­гъэкIы. Ау, адыгэмэ зэраIоу, о бгъалIэ пшIоигъор лIэщтэп, о щыбгъаIэ пшIоигъор щыIэщтэп. Бэшхо темышIэу, 1988-рэ илъэсым, Хъурэе Рэмэзанэ ветеринарнэ лабораториеу «Краснодарская» зыфиIорэм ипащэу агъэнафэ ыкIи 2013-рэ илъэсым нэс, пенсием окIожьыфэ ащ Iоф щешIэ.

Ипшъэрылъхэм ягъэцэкIэн къышымыуцоу ар наукэм ишъыпкъэу пэхьэ. 1995-рэ илъэсым ветеринар шIэныгъэхэмкIэ кандидат мэхъу. «Эпизоотология и специфическая профилактика сибирской язвы сельскохозяйственных животных в условиях Краснодарского края» зыфиIорэ научнэ IофшIагъэу ытхыгъэм ар къыкIэкIо.

Iофэу ышIэрэр икъу фэдизэу зэригъэ­цакIэрэр, ащ хэшIыкI ин зэрэфыриIэр къыдалъытэзэ 2000-рэ илъэсым щытхъу­цIэу «Урысые Федерацием изаслуженнэ врач» зыфиIорэр къыфагъэшъошагъ. 2011-рэ илъэсым ветеринарнэ ыкIи фитосанитарнэ лъыплъэнымкIэ Федеральнэ къулыкъум и Щытхъу тхылъ къыратыгъ.

Илъэс 45-м ехъурэ щытхъу хэлъэу шIу ылъэгъоу къыхихыгъэ сэнэхьатым Рэмэзанэ рылэжьагъ. Ишъхьэгъусэу Мирэ Пэнэжьыкъуае щыщ, ЯхъулIэмэ япхъу. ИсэнэхьаткIэ кIэлэегъадж. Ащи, Рэмэзан фэдэу, гъэхъагъэхэр иIэх, Урысыем гъэсэныгъэмкIэ иIофышIэ гъэшIуагъ. Зэшъхьэгъусэхэм лъфыгъитф зэдапIугъ, рагъэджагъэх, адыгагъэр ягунэсэу, гукIэгъу ахэлъэу, IофшIэныр шIу алъэгъоу агъэсагъэх. Руслъан запасым щыIэ майор, Аслъан гъэхъэгъэ инхэр ышIыхэзэ Москва щэлажьэ, медицинэ университетэу Пироговым ыцIэ зыхьырэм ишIэныгъэлэжь IофышIэ шъхьаI, Дунэе Артийскэ комитетым идышъэ орденэу «За честь и достоинство» зы­фиIорэр къыратыгъ. Бислъан Краснодарскэ ТЭЦ-м иэлектроцех ипащ, Сусанэ Тэхъутэмыкъое районым иофтальмолог шъхьаI. АнахьыкIэу Адам электросетьхэм ятхьамат. Мыщ дэжьым къыхэзгъэщы сшIоигъу: зы унагъом нэбгырибл апшъэ­рэ гъэсэныгъэ яIэу къикIыгъ.

Чылэр зыгъэдахэрэр ащ цIыфэу дэс­хэр, псэуалъэу дэтхэр ары. ПчыхьалIыкъуае иурам шъхьаIэу Лениным ыцIэ зыхьырэм урыкIозэ чылэ гупчэм унэсымэ, ащ тIоу зэтет унэ дэхэшхоу тетым уемыплъэу ублэкIын плъэкIыщтэп. Ащ Хъурэе Рэмэзанэ Якъубэ ыкъор икIэлэ анахьыкIэу Адам лъэхэсэу щэпсэу.

Уайкъокъо Рэмэзан. ПчыхьалIыкъуай.