Пыдзэфэ пытэхэм яIущын фэгъэзэгъэ региональнэ операторым тхылъыпIэ пыдзафэ­хэр нэмыкI хэкIхэм ахэушъхьафыкIыгъэу ыугъоинхэу республикэм щыригъэжьагъ, ар къызэралъхьащтхэ къэмланхэр егощых. АпэрипшIыр УФ-м ПенсиехэмкIэ ифонд и Къутамэу АР-м щыIэм фигъэуцугъ.

Макулатурэр бэу зиIэ хъухэрэ организациехэр арых ащ фэдэ контейнерхэр зыфащэщтхэр. Региональнэ операторым апэрэ уахътэхэм 200 ыгъэуцун гухэлъ иI. ЛъэIу тхылъ къэзытыхэрэр арых зыфащэщтхэр. Къэмланэхэр ушъагъэхэ хъугъэу макъэ къагъэIумэ, «ЭкоЦентрэм» иавтомашинэхэм Iуащыщтых.

Къэбзэныгъэ республикэм илъыным зэкIэми яIахь хашIыхьан алъэкIыщт, хэкI зэхэдзыным къыхэлэжьэнхэу ары ныIэп ащ ищыкIагъэр. ТхылъыпIэ пыдзафэхэм апае къэмланэхэр афагъэуцунхэу зышIоигъохэ юридическэ лицэхэм региональнэ операторым зыкъыфагъэзэн фае. Адресыр: къалэу Мыекъуапэ, урамэу Пионерскэр 297-рэ. Электроннэ почтэр: adg_ecocentr@clean-rf.ru.

ООО-у «ЭкоЦентр» зыфиIорэм и Адыгэ шъолъыр къутамэ ипресс-къулыкъу.