Теуцожь районым щыпсэурэ хъулъфыгъэм кIэлэпIупкIэр зэримытырэм къыхэкIыкIэ административнэ пшъэдэкIыжь рагъэхьынэу хьыкумым унашъо ышIыгъ. А уахътэм чIыфэу телъыр зэкIэ ащ къыпщыныжьыгъ.

Теуцожь район хьыкумым исудебнэ участкэу N 2-м изэгъэшIужь хьыкумышIэ унашъоу ышIыгъэмкIэ, хъулъ­фыгъэм федэу къыIэкIахьэрэм и 1/3-рэ зыныбжь имыкъугъэ исабый фызэкIигъэкIожьын фэягъ. Ипшъэ­рылъхэр игъом зэримыгъэцакIэхэрэм къыхэкIэу чIыфэр сомэ мини 100-м ехъугъ.

Тхылъхэу IэкIэлъыгъэхэм къапкъырыкIызэ хьыкум приставым унашъо ышIыгъ хъулъфыгъэм административнэ пшъэдэкIыжь рагъэхьынэу.

Мы Iофым хьыкумыр хэплъагъ ыкIи сыхьат 50-м телъытэгъэ шIокI зимыIэ IофшIэнхэр ыгъэцэкIэнхэу хъулъфыгъэм тырилъхьагъ. Ащ ыуж хъулъфыгъэм изекIуакIэ зэрэмытэрэзыр къыгурыIуагъ ыкIи кIэлэпIупкIэм итынкIэ чIыфэу те­лъыр зэкIэ къыпщыныжьыгъ. АщкIэ Iофыр зэфашIы­жьыгъ.

Хьыкумым унашъоу ышIыгъэм диштэу кIэлэпIупкIэр игъом атын зэрэфаер, мыщ епхыгъэ хэбзэгъэуцугъэр зымыгъэцакIэхэрэм пшъэдэкIыжь зэрахьыщтыр, уголовнэ Iофи къафызэIуахын зэралъэкIыщтыр зыщагъэ­гъупшэ хъущтэп.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.