Абхъазым ишъхьафитыныгъэ фэбанэхэзэ лIыхъужъныгъэ зезыхьэгъэ гуфакIохэр тщыгъупшэхэрэп, илъэс 29-кIэ тызэкIэIэбэжьы.

[caption id="attachment_98071" align="aligncenter" width="800"] Хъуадэ Адам.[/caption]

1992-рэ илъэсым, шышъхьэIум и 14-м Грузием иуIэшыгъэ купхэр Абхъазым ичIыгу заокIэ ихьа­гъэх. Кавказ шъолъырым щыщхэу апэу къош Абхъазым къоуцуагъэхэм Адыгэ Республикэм икIыгъэ гуфакIохэр ахэтыгъэх.

ШышъхьэIум и 25-рэ пчыхьэм загъэхьазыри чэщым Сыхъум ивокзал гуфакIохэр нэсыгъэх. Чэчэным, Адыгеим къарыкIыгъэ кIалэхэр япчъагъэкIэ нахьыбэ хъущтыгъэх. Шэуджэн Мурат командирэу щытыгъ.

ВзводитIур гощыгъэу гъогу техьанхэм ыпэкIэ Шэуджэн Мурат пшъэрылъ гъэнэфагъэхэр афи­шIыгъ. Грузием ихъункIакIохэр лъэшэу зэрэуIэшыгъэхэр зэкIэми ашIэщтыгъ.

[caption id="attachment_98065" align="aligncenter" width="800"] Шэуджэн Мурат.[/caption]

Вокзалым Грузием ихъункIа­кIохэмрэ М. Шэуджэным ивзводрэ щызэпэуцугъэх. Грузин теха­­— кIо­хэм чIэнагъэхэр ашIыгъэх, гумэкIыгъо Iофхэр къякIугъэх.

Заом имэшIо чэщ Шэуджэн Мурат лIыхъужъэу зэрэфэхыгъэр гуфакIохэм алъэгъугъ. Мыщы­нэхэу пыйхэм якIуалIэхэзэ яныб­джэгъу ылъ ашIэжьыщтыгъ.

ГуфакIохэр къызэкIэкIожьынхэу зыфежьэхэм урамэу къызэрыкIонхэ алъэкIыщтым пулеметыр грузин техакIохэм къыщагъэу­цугъ, оныр къаублагъ. ГуфакIохэм щэ-гынхэр аухыщтыгъэх. Мыкъо Аслъан патронитIу къыфэнагъ. ЗымкIэ ащ пулеметымкIэ къаохэрэм машIор аридзи, Iугъор ашъхьарыт хъугъэ, пулеметым ымакъэ уцугъэ. А уахътэм А. Мыкъом хъункIакIом ищэ къы­тефагъ, лъыр кIэчъызэ чIыгум зыфищэигъ…

[caption id="attachment_98072" align="aligncenter" width="800"] Мыкъо Аслъан.[/caption]

ЕджапIэм екIугъэ гуфакIохэм лIыгъэ шъыпкъэ зэрахьагъ. Грузием итехакIохэм чIэнэгъэшхо­хэр ашIыгъэх. ГуфакIохэм якомандирэу Хъодэ Адами а чэщым хьылъэу къауIи, дунаир ыхъо­жьыгъ.

— Апэрэхэм ащыщхэу хъун­кIакIохэм апэуцугъэхэ Хъодэ Адам, Шэуджэн Мурат, Мыкъо Аслъан лIыхъужъныгъэу зэрахьагъэр егъашIи тщыгъупшэщтэп, — къытиIуагъ Адыгэ Республикэм иабхъаз гуфакIохэм я Союз итхьаматэу Къуижъ Къэплъан. —Заом илъэхъан тилIыхъужъхэм щысэ атырахызэ гуфакIохэр Абхъазым ишъхьафитыныгъэ фэзэуагъэх.

Абхъазым лIыхъужъэу щыфэ­хыгъэхэм саугъэтхэр афагъэу­цугъэх, къызыщыхъугъэхэ къуа­джэхэм яеджапIэхэм, урамхэм лIыхъужъхэм ацIэхэр афаусыгъэх. А. Хъуадэр Хьалъэкъуае щыщ. М. Шэуджэныр Кощхьаблэ къыщы­хъугъ, А. Мыкъор Улапэ щапIугъ.

ЛIыхъужъныгъэр жъы хъурэп. Гур пытэу, лъэбэкъоу ашIырэр зыфэдэр къагурыIоу лIыгъэшIапIэм зеуцохэм, гуфакIохэр къызэкIэкIуагъэхэп. ЛIыгъэу зэрахьагъэмкIэ, щыIэныгъэм щысэу къы­щагъэлъэгъуагъэмкIэ лIыхъужъ­хэу къытхэтых, тэгъэлъапIэх.