ШышъхьэIум и 27-м щыублагъэу и 29-м нэс я VII-рэ Дунэе дзэ-техническэ форумэу «Армия-2021» зыфиIорэр Мыекъуапэ и Гупчэ мемориал пэблагъэу щыкIощт.

Мэфищым къыкIоцI дзэ Iа­шэхэр, джащ фэдэу зыкъэухъу­мэжьыгъэнымкIэ хэгъэгум ипро­мышленность иоборудование, итехнологиехэр къа­гъэ­лъэгъощтых.

ХьакIэхэм арагъэлъэгъущтых Iэшэ лъэпкъ зэфэшъхьафхэр, разведкэмкIэ агъэфедэрэ оптическэ приборхэр, дзэ-промышленнэ комплексым ипредприятиехэм къыдагъэкIырэ продукциер. Дзэ авиациеми икъэгъэлъэгъонхэр зэхащэщтых.

Мы зэхахьэм тегъэпсыхьа­гъэу контрактым тетэу дзэ къулыкъур зыхьыщтхэр ыкIи дзэ училищхэм ачIэхьащтхэр къы­хэхыгъэнхэмкIэ мобильнэ агитационнэ пункт зэхащэщт. Ащ нэфэшъхьафэу муниципальнэ творческэ коллективхэм хьакIэ­хэм апае къэгъэлъэгъонхэр къашIыщтых, сатыушIыпIэ чIыпIэхэри къызэIуахыщтых, псы лъэпкъ зэфэшъхьафхэр ыкIи нэмыкI товархэр ащэщтых.

Къэгъэлъэгъонхэр сыхьатыр 10-м къыщегъэжьагъэу 15-м нэс кIощтых.

Экспозициер зыдэщыIэ чIыпIэм нэсынхэу фаехэм муниципальнэ маршрутхэу N 1-р, 2-р, 9-р, 19-р ыкIи 29-р (къэуцупIэу «Привокзальнэ площадыр»), троллейбусэу N 7-р, я 110-рэ маршрутыр (къэуцупIэу «Гупчэ мемориалыр») къызфагъэфе­дэнхэ алъэкIыщт. Къэлэ инфра- структурэмкIэ отделым къызэритыгъэмкIэ, маршрутхэм азыфагу такъикъи 5 – 10 илъыщт, ау я 110-рэ маршрутым – та­къикъ 35 – 40-рэ. Дзэ-техническэ Дунэе форумэу «Армия-2021» зыфиIорэр Iофтхьэбзэшхоу щыт, урысые ыкIи IэкIыб къэрал уIэшыгъэ кIуачIэхэм, зыкъэухъумэжьыгъэ­ным фытегъэпсыхьэгъэ предприятиехэм, научнэ ыкIи конструкторскэ еджапIэхэм ялIыкIохэр яблэнэрэу къэзэрэ­-угъоих.

Мы Iофтхьабзэм тегъэпсы­хьагъэу хэгъэгум игъэхъэгъэ анахь дэгъухэр къагъэлъэгъощтых. Джырэ лъэхъаным къыда­гъэкIырэ Iэшэ ыкIи техникэ зэфэшъхьафэу мин 28-м ехъу пстэ­умкIи ащ къыщагъэлъэгъощт.

Московскэ хэкум шышъхьэIум и 22-м къыщегъэжьагъэу и 28-м нэс щыкIощт форумым тегъэ­псыхьагъэу Адыгэ Республикэм икванториум илIыкIохэм пшъэ­рылъыбэ зэшIозыхын зылъэкIырэ, ежь-ежьырэу Iоф зышIэрэ, быбын ыкIи псыкIыIум щыкIон зылъэкIыщт аппаратхэм япроектхэр къырахьылIэщтых.

Мы форумым дакIоу шы­шъхьэ­Iум и 22-м я VII-рэ Дунэе дзэ джэгунхэр аублагъэх, къэралыгъо 44-мэ якомандэхэр ахэм ахэлэжьэщтых.