Ыгу зэкIэми афызэIухыгъ

Шъуимафэ шIу, редакцием иIофышIэхэу лъытэныгъэ зыфэтшIыхэрэр! Шъуигъэзет цIыф цIэрыIохэм, гъэшIэгъонхэм, гъэхъагъэхэр зиIэхэм афэгъэхьыгъэ тхыгъэхэр бэрэ къехьэх. Непэ тэри, пцэжъыехъунымкIэ Азовэ-Черноморскэ ГъэIорышIапIэм и Пшызэ-Адыгэ отдел иIофы­шIэхэм, нэIуасэ шъуфэтшIы тшIоигъу типащэу, зищыIэныгъэ, зиIэпэIэ­сэныгъэ, зишIэныгъэ мы хъызмэтшIапIэм фэзыгъэлажьэу, шышъхьэIу мазэм зыныбжь илъэс 65-рэ хъурэ Янэкъо Аслъан Исхьакъ ыкъом.

Аслъан фэдэхэм апае «гу­шхо зиIэ цIыф» аIо. Мыщ икабинет ипчъэхэр, ыгу цIыфхэм зэрафызэIухыгъэм фэдэу, ренэу зэIухыгъэх. Хэти ащ дэжь чIэ­хьан, игукIаекIэ, игумэкIхэмкIэ зыфигъэзэн, гущыIэгъу фэхъун ылъэкIыщт. Ары къэс, гущыIэ къодыеу щымытэу, IэпыIэгъу цIыфым фэхъуным, ишIуагъэ ригъэкIыным ар пылъ.

Янэкъо Аслъан Исхьакъ ­ыкъор шышъхьэIум и 27-м, 1956-рэ илъэсым къэхъугъ. 1991-рэ илъэсым Пшызэ мэ­къумэщ ин­ститутыр, 1998-м — Ростов дэт къэралыгъо университетым иаспирантурэ къыухыгъэх. 1999-рэ илъэсым ар экономикэ шIэ­ныгъэхэмкIэ кан­дидат хъугъэ. Аслъан IофшIэныр 1971-рэ илъэсым ыублагъ. 1983-рэ илъэ­сым къыщыублагъэу 1993-м нэс объединениеу «Краснодаррыб­промым» Iоф зыщешIэм водителэу ригъажьи, производствэм ипэщэ IэнатIэ нэсыгъ. Пцэжъые­хэм якъэухъумэнкIэ ФГУ-у «Аз­черрыбвод» зыфи­Iорэм и Адыгэ республикэ инспекцие зызэхащэм, зыфэбгъэ­зэрэ IофшIэныр зэригъэцэкIэщтым ицыхьэ телъэу Адыгеим иапэрэ Президентэу Джарымэ Аслъан иунашъокIэ 1993-рэ илъэсым ащ Янэкъо Аслъан пащэ фашIыгъ. Илъэс зэкIэ­лъыкIохэм Адыгэ республикэ инспекцием ыцIэ зэблахъоу хъугъэ, ау ипшъэрылъ — пцэ­жъыехэр къэухъумэгъэнхэр ыкIи ахэм ахэгъэхъогъэныр — зэмыхъокIэу къэнагъ. Шъыпкъэ, организацием изэхэщэн, ащ ылъэ итегъэуцон зытефэгъэ я 90-рэ илъэсхэу къэралыгъо структурэхэм зэкIэми зэхъокIыныгъэ зыщафэхъущтыгъэхэр къиныгъэх. IофшIэным фэгъэсагъэ, ащ ишъэфхэм ащыгъозэ специалистхэр щыIагъэхэп, организацием транспорти, ищыкIэгъэ оборудовании, зычIэсыщтхэ уни иIагъэхэп.

Ау охътэ кIэкIым къыкIоцI республикэм щагъэпсыгъэх пцэжъыехэм якъэухъумэнкIэ участкитф. Ахэм псым зэрэ­тетыщтхэ, къызэракIухьащтхэ транспорти, зэпхыныгъэм иамалхэри, табельнэ Iаши ара­гъэгъотыгъ. ЫпшъэкIэ щыIэ па­щэхэм яIэпыIэгъу ишIуагъэкIэ инспекцием иадминистрацие, ащ икъулыкъу зэфэшъхьафхэр, зычIэсыщтхэ унэхэри, гъэтIы­лъыпIэхэри, нэмыкI псэуалъэ­хэри агъэпсыгъэх, инспекцие участкэхэри зэтырагъэпсыхьагъэх. Джаущтэу, Аслъан IофшIэным фыщытыкIэу фыриIэм, зэрэзэхэщэкIо IэпэIасэм, гъэ­псын Iофым сыдигъуи зэрэфаблэрэм яшIуагъэкIэ пцэжъыехэм якъэухъумэн ежь фэгъэзэгъэ шъолъырым щызэтыригъэуцон, щызэтыригъэпсыхьан ылъэкIыгъ. ЧIыопсым икъэухъумэнкIэ органхэм, Адыгеим ыкIи Пшызэ шъолъыр япащэхэм зэгурыIоныгъэ адыриIэу адэлажьэзэ, игъорыгъоу отраслэм хэхъоныгъэ ригъэшIыгъ, непи а IофшIэныр зэпигъэурэп ащ. Пцэжъые­хъунымкIэ Азовэ-Черноморскэ чIыпIэ ГъэIорышIапIэм псыхэм, ахэм ахэсхэм язытет уплъэкIугъэнымкIэ, алъыплъэгъэнымкIэ ыкIи къэухъумэгъэнхэмкIэ икIэ­рыкIэу зэхащэжьыгъэ и Пшызэ­Адыгэ отдел ипащэу 2011-рэ илъэсым имэзэе мазэ Аслъан агъэнэфагъ. А отделым къы­фэгъэзэгъагъэх Адыгэ Респуб­ликэр ыкIи Краснодар краим ирайонибгъу: Шытхьэлэ, Горяче­Ключевской, Апшеронскэ, Мос­товской, Успенскэ, Новокубанскэ, Курганинскэ, Лабинскэ, Отрадненскэ районхэр ыкIи къалэу Армавир.

Аслъан Исхьакъ ыкъор зи­пэщэ подразделением иматериальнэ-техническэ базэ гъэпытэгъэным, ежь исэнэхьаткIэ шIэныгъэу иIэм хигъэхъоным, иIофышIэхэм яIэпэIэсэныгъэ зыкъыригъэIэтыным зэпымыоу пылъ. ИкIэлэцIыкIугъом къы­щыублагъэу, ным ибыдзыщэ хэлъэу, ащ IофшIэныр шIу ылъэ­гъоу, пшъэдэкIыжьэу иIэр къыгурыIоу къэтэджыгъ. Пэщэ Iэ­натIэм зэрэIутым дакIоу об­щественнэ IофшIэнхэм ар чанэу ахэлажьэ, районым идепутатхэм я Совет мызэу, мытIоу хадзыгъ. Ар илъэс пчъагъэхэм меценатыгъ ыкIи спонсорыгъ, непи арэущтэу къэнэжьы, общественнэ мэхьанэ зиIэ Iоф­тхьабзэу районым щызэхащэ­хэрэм ащ ишIу­шIагъэ ахэлъ, кIэ­лэцIыкIу Iыгъы­пIэхэм, еджапIэ­хэм, сымэджэщ­хэм ренэу Iэпы­Iэгъу афэхъу.

Ащ фэдэу общественнэ Iоф­хэм зэрахэла­жьэрэм, гуеты­ныгъэ фыриIэу иIофшIэн зэри­гъэцакIэрэм апае Аслъан къэралыгъо ыкIи респуб­ликэ мэхьанэ зи­Iэ тын лъапIэхэр къыфагъэшъошагъэх. Ахэм япчъа­гъэ бэдэд: Iоф­шIэнымкIэ щытхъум иорденэу я III-рэ шъуашэ зи­Iэр, РСФСР-м и Апшъэрэ Совет и Щытхъу тхылъ, ЦК ВЛКСМ-м и Щытхъу тамыгъэу «Золотой колос» зыфиIорэр, «300 лет Российскому флоту» зыцIэ медалыр, АР-м и Къэралыгъо Совет — Хасэм и Щытхъу тхылъ, «Почетный работник органов рыбоохраны России» зыфиIорэр, АР-м и Къэралыгъо Совет — Хасэм и Щытхъу тамыгъэу «Закон. Пшъэ­рылъ. ЦIыфыгъ» зыцIэр, «Ве­теран рыбного хозяйства» зыфиIорэ медалыр, орденэу «Сла­ва России», «Заслуженный работник сельско-хозяйственного производства Республики Адыгея» зыфиIорэр, Краснодар краим изаконодательнэ ЗэIукIэ и Щытхъу тхылъ, медалэу «За заслуги в развитии рыбного хозяйства России 2 степени».

Аслъан цIыфым уасэ зэрэфишIырэр IофшIэным гуеты­ныгъэу фыриIэр, ишъыпкъагъ, ицIыфыгъ, ихьалэлыгъ. ИщыIэныгъэ гъогукIи ежь зэрыгъуа­зэрэри ахэм къапкъырэкIы: «Щынапхэм фитыныгъэ иIэп лIыхъужъныгъэм фигъэсэнхэу, шъхьаубэтэ-мыгъасэм — Iэдэбныгъэм, цIыфыгъэнчъэм — цIыфыгъэм, нэпэнчъэм — зэфа­гъэм, нэпцI щытхъуаIом — ­шъхьэихыгъэныгъэм».

Джащ фэдэ цIыф дах, цIыф гъэшIэгъон, Адыгеим икIалэу узэрыгушхонэу щыт непэ зигугъу къышъуфэтшIыгъэ Янэкъо Аслъан Исхьакъ ыкъор. Шъуигъэ­зеткIэ ащ тыфэлъаIо тшIоигъу псауныгъэ пытэ, хахъо иIэнхэу, шIоу щыIэр къыэдэ­хъунэу.

ПцэжъыехъунымкIэ Азовэ-Черноморскэ чIыпIэ ГъэIорышIапIэм и Пшызэ-Адыгэ отдел иIофышIэхэр.

БэгъашIэ охъу, Аслъан!

Теуцожь районымкIэ Тэуехьаблэ икIэлэ пIугъэу, пцэжъыехъунымкIэ Азово­-Чер­номорскэ ГъэIорышIапIэм и Пшызэ-Адыгэ отдел ипащэу Янэкъо Аскэр ыныбжь илъэс 65-рэ хъугъэ.

Аслъан тилъэпкъ гъэзетэу «Адыгэ макъэм» иныбджэгъушIоу, ар яунэгъо гъэзетэу, яцIыкIуи яини еджэхэу зэрэ­щытым тыщыгъуаз. Ащ фэшI гъэзетым икIэгъэтхэгъу къызысыкIэ апэ тыз­дакIохэрэм ащыщ Янэкъо Аслъан зипэщэ организациер зыдэт поселкэу Лъэустэнхьаблэ. НэгушIоу къытпэгъокIы, тызфэ­кIуагъэр къытфегъэцакIэ. ИIофшIэгъухэм ямызакъоу, зыщыпсэурэ Адыгэ къалэкIэ игъунэгъухэми гъэзетыр къафэкIонэу егъэпсы.

Янэкъо Аслъан цIыфышIу, адыгэгъэшхо зыхэлъ кIал, IофышIэкIошху, Азово­-Черноморскэ ГъэIорышIапIэм иколлектив пэрытхэм, щысэтехыпIэу иIэхэм ащыщ. Унэгъо дахи иI.

Тигъэзет иныбджэгъушIоу Аслъан ­къызыхъугъэ мафэмкIэ тиредакцие иIофышIэхэр фэгушIохэзэ фэлъаIох ипсау­ныгъэ пытэнэу, шIурэ дэгъурэ ехъу ыпэ­кIэ къимыкIэу псэунэу, ищытхъоу аIорэм хэхъонэу, илъфыгъэхэм адатхъэу илъэсыбэрэ щыIэнэу.

Нэхэе Рэмэзан.