КIэлэцIыкIу зэрыс унагъохэм яхахъо зэрэмакIэр, ахэм къэралыгъом IэпыIэгъоу аритыщтыр УФ-м и Президентэу Владимир Путиным анахьыбэрэ зигугъу къышIыхэрэм ащыщ.

2020-рэ илъэсым ащ къышIыгъэ Джэпсалъэм мы лъэныкъом фытегъэ­псыхьэгъэ пшъэрылъ гъэнэфагъэу къыщигъэуцугъагъэхэм яшIуагъэкIэ IэпыIэгъоу унагъохэм агъотырэм хэхъуагъ. Зэпахырэ узэу дунаир зэлъызыкIугъэм зызыщиушъомбгъурэ лъэхъаным ахъщэ тын зыфэкIогъэ унагъохэм кIэлэцIыкIоу арысыр миллион 28-рэ фэдиз мэхъу.

Апэрэ, ятIонэрэ сабый къызфэхъугъэ­хэм апаий ахъщэ тынхэр агъэнэфагъэх, илъэси 3 — 7 зыныбжь кIэлэцIыкIухэми мазэ къэс къафэкIонэу ашIыгъ, ны мылъкум фэгъэхьыгъэ программэм апэрэ сабый къызфэхъугъэхэри къыхеубытэх, ахъщэу ащ къыдэлъытагъэми хэпшIыкIэу хагъэхъуагъ.

Мы илъэсым Владимир Путиным къышIыгъэ Джэпсалъэми мы Iофым игъэкIотыгъэу къыщытегущыIагъ. Ным е тым изакъоу сабыир ыпIуныр сыдигъокIи зэрэкъиным къыкIигъэтхъызэ, ащ фэдэ чIыпIэ итхэм хэушъхьафыкIыгъэу IэпыIэгъу аратынэу унашъо къышIыгъ. Ар гъэцэкIагъэ хъугъэ, бэдзэогъум и 1-м къыщыублагъэу мазэ къэс ахэм ахъщэ тын афэкIо. Ар, гурытымкIэ лъытагъэу, сомэ 5650-рэ зэрэхъурэр.

Бзылъфыгъэу сабый къыфэхъунэу ежэу, щыIэныгъэм чIыпIэ къин ригъэуцуагъэми къэралыгъор ахъщэкIэ деIэ хъугъэ. Ари Джэпсалъэм къыщигъэуцугъэгъэ пшъэрылъхэм ащыщ. Джы ахэм мазэ къэс сомэ 6350-рэ къафэкIонэу агъэпсын алъэкIыщт.

УФ-м и Президент иунашъокIэ блэкIыгъэ 2020-рэ илъэсым иIоныгъо и 1-м къыщегъэжьагъэу еджапIэхэм япэублэ классхэм арыс кIэлэеджакIохэм шхын стыр ыпкIэ хэмылъэу аIэкIагъахьэ хъугъэ.

Джэпсалъэм унашъо къыщишIыгъэу, илъэсэу тызхэтым ишышъхьэIу мазэ еджапIэм чIэсэу е мыгъэ чIэхьанэу сабый зиIэхэм, ахэр илъэсыкIэ еджэ­гъум фагъэхьазырынхэм пае, нэбгырэ пэпчъ сомэ мин пшIырыпшI къэралыгъом къы­фитIупщыгъ.

Джырэблагъэ УФ-м и Президент «Единэ Россием» илIыкIохэм заIокIэми мы лъэныкъом къыфигъэзэжьыгъ.

— Сабый зэрыс унагъом IэпыIэгъу етыгъэным фытегъэпсыхьэгъэ системэм илъэс 16 — 17-м зыныбжь шIомыкIыгъэхэри къыхиубытэнхэу шIыгъэн фае. Ар Къэралыгъо Думэм изэIугъэкIэгъоу кIэу хэтыдзыщтым пшъэрылъ шъхьаIэу иIэщтхэм ащыщ. Правительствэри къыхэлажьэзэ ащ фэгъэхьыгъэ хэбзэгъэуцугъэхэр гъэ­хьазырыгъэнхэ, нэужым штэгъэнхэ фае, — къыIуагъ Владимир Путиным.