Адыгэ Республикэм и ЛIышъхьэу КъумпIыл Мурат «линие занкIэмкIэ» зыкъыфэзыгъэзэгъэ цIыфхэм ащыщыбэм Мыекъуапэ, АдыгеякIэм, Инэм, Яблоновскэм ыкIи нэмыкI псэупIэхэм ягъогухэм ыкIи ялъэсрыкIо гъогухэм ягъэцэкIэжьын епхыгъэ упчIэхэр къатыгъэх.

Мы уахътэм Тэхъутэмыкъое районым ит поселкэу Инэм дэжь транспорт зэхэкIыпIэ щашIы. Мыщ фэдэ зэхэкIыпIэ Яблоновскэм пэмычыжьэу щагъэ­псын гухэлъ зэрэщыIэр КъумпIыл Мурат хигъэунэфыкIыгъ. Мыекъуапэ иурамэу Хьахъуратэм ыцIэ зыхьырэм щызекIорэ машинэхэм япчъагъэ нахь макIэ шIыгъэнымкIэ Iофэу ашIэрэм Адыгеим и ЛIышъхьэ къытегущыIэзэ, республикэм икъэлэ шъхьаIэ къэзыухьащт транспорт зэхэкIыпIэм ишIын зэрэлъыкIуатэрэм, мы урамыр зэрагъэцэкIэжьырэм къащы­уцугъ.

Лъэпкъ проектэу «Щынэгъон­чъэ ыкIи шэпхъэшIухэм ади­штэрэ автомобиль гъогухэр» зыфи­Iорэр анахь чанэу зыгъэ­цэкIэрэ шъолъырхэм Адыгеир ащыщ.

Общественнэ транспортым Iоф зэришIэрэм ымыгъэразэхэу бэхэм республикэм ипащэ зыкъы­фагъэзагъ. Мыекъуапэ ирайон цIыкIоу «Черемушкэм» дэжь къэуцупIакIэ щыгъэпсыгъэ­нымкIэ хэкIыпIэ къагъотыгъ, унашъоу ашIыгъэм диштэу ар мы чIыпIэм шIэхэу щагъэуцущт.