Адыгеим Шъолъыр гъэIорышIэнымкIэ и Гупчэ общественнэ транспор­тым иIофшIэн епхыгъэ IофыгъохэмкIэ къэбархэр нахьыбэу къы­лъы­Iэсхэ хъугъэ. «Линие занкIэм» илъэхъан Адыгэ Республикэм и ЛIы­шъхьи ащкIэ упчIэхэр къыратыгъэх.

Республикэм общественнэ транспортым ылъэныкъокIэ иIофхэм язытет джыдэдэм ­уигъэрэзэнэу зэрэщымытым КъумпIыл Мурат къыдыригъэштагъ. Ащ пае Яблоновскэмрэ Мыекъуапэрэ транспортыр зэращызекIорэм епхыгъэ документхэр гъэхьазырыгъэнхэмкIэ республикэм чIыпIэ хэхъоныгъэмкIэ ыкIи транспорт инфраструктурэмкIэ и Научнэ-­ушэтэкIо ыкIи проект институтым зыфигъэзагъ.

«Мы лъэхъаным цIыфхэм игъоу алъэгъухэрэр къыдалъы­тэхэзэ, ащкIэ документэу зэ­хагъэуцуагъэм зэхъокIыныгъэ­хэр фашIых. Адыгэ Республикэм 2030-рэ илъэсым нэс ­игъогу-транспорт отраслэ ихэ­хъоныгъэ а документыр истратегическэ планэу щытыщт», — къыIуагъ Адыгеим псэолъэшIынымкIэ, транспортымкIэ, унэ-коммунальнэ, гъогу хъыз­мэтымкIэ и Министерствэ транспортымкIэ иотдел ипащэу Сергей Толстиковым.

Анахьэу цIыфхэр бэу зыщызекIохэрэ лъэхъаныр ары къэлэдэсхэм общественнэ транспортыр зэримыкъурэр нахь лъэшэу зызэхашIэрэр. Коронавируснэ инфекциякIэм илъэ­хъан общественнэ транспортым игъэ­зекIонкIэ гъунапкъэхэр за­гъэнафэхэм ыуж ар нахь нафэ къызыхъугъэр. Гъунапкъэхэу коронавирусым ыпкъ къикIэу агъэнэфэгъагъэхэри зытыра­хыжьыхэ нэужым водительхэм ащыщхэм яIофшIэн къыфагъэзэжьыгъэп, нэмыкI IофшIапIэхэр къагъотыгъэх, ащ къыхэкIэу кадрэхэм алъэныкъокIи щыкIагъэхэр афэхъугъэх. Транспортым изекIонкIэ ­графикхэр мыукъогъэнхэми мэхьэнэ гъэнэфагъэ иIэу щыт. Къалэу Мыекъуапэ инфраст­руктурэмкIэ иотдел къызэритыгъэмкIэ, организациехэу цIыф­хэм язещэн фэгъэзагъэхэм зэрищыкIагъэм тетэу япшъэ­рылъ­хэр агъэцэкIэнхэм мы лъэ­хъа­ным нахь анаIэ тыра­гъэтыщт.

Адыгеим икъэлэ шъхьаIэ щыпсэухэрэр зыгъэгумэкIыхэрэ Iофыгъохэм зыкIэ ащыщ Черемушкэм еджэпIакIэу щагъэпсыгъэм транспорт гъэнэфагъэ екIуалIэу шIыгъэныр. ГущыIэм пае, къалэу Мыекъуапэ иурамэу 12 Марта, 164-м тет лицееу N 34-м кIэлэцIыкIухэр нэ­зыгъэсыщтхэ общественнэ транспорт зэрэщымыIэм къы­хэкIэу ны-тыхэм ащыщыбэхэм порталэу «Къэралыгъо фэIо-фашIэхэр. Тызэгъусэу зэшIо­тэхы» зыфиIорэм зыкъыфа­гъэзагъ. Муниципальнэ образо­ваниеу «Къалэу Мыекъуапэ» Iоф­хэм ягъэзекIонкIэ игупчэ иIофышIэ ар ыгъэунэфыгъ. Адыгеим Шъолъыр гъэIоры­шIэ­нымкIэ и гупчэ къалэм имэ­рие испециалистхэм а Iофы­гъомкIэ зафигъэзагъ.

«Непэ еджапIэм иадминистрацие тигъусэу общественнэ транспортэу кIэлэцIыкIухэр лицееу N 34-м езыщэлIэщтхэр ыкIи зыщыпсэухэрэ чIыпIэхэм анэзыгъэсыжьыщтыр зэрэзе­кIощтым епхыгъэ Iофтхьабзэхэр дгъэунэфыгъэх. Мы тхьамэфэ заулэм агъэунэфыщт нэ­бгырэ пчъагъэу а транспор­тымкIэ зекIорэр, нэужым зэ­хъокIыныгъэ гъэнэфагъэхэр схемэм фашIыщтых ыкIи охътэ гъэнэфагъэхэм а транспортыр зекIонэу ашIыщт», — къыIуагъ муниципальнэ образованиеу «Къалэу Мыекъуапэ» иадми­нистрацие къэлэ инфраструктурэмкIэ иотдел иIофышIэ.

НепэкIэ Мыекъуапэ щыпсэу­хэрэр мыщ фэдэ муниципальнэ маршрутхэмкIэ еджэпIакIэм нэсынхэ алъэкIыщт:

Маршрутэу N 3-мкIэ: ур. Батарейнэр — Железнодорожнэр — Пушкиныр — Пролетарскэр — Курганнэр — Димитровыр — Чкаловыр — Пионерскэр — Я. Коблыр — Гариныр — 12 Мартыр — Чкаловыр — Депутатскэр — Пролетарскэр — Гоголыр — Пушкиныр — Железнодорожнэр — Батарейнэр.

Маршрутэу N 13-мкIэ: ур. Юбилейнэр (пос. Западнэр) — Новэр — Весеннер — Луговаям — Центральнэр — Солнечнэр — Юннатовыр — Я. Коблыр — Гариныр — 12 Мартыр — Васильевыр — Я. Коблыр — Юннатовыр — Юбилейнэр.

Мы лъэхъэнэ благъэхэм ура­мэу Привокзальнэри а маршрутым къыхагъэхьащт.

Маршрутэу N 20-мкIэ: ур. Набережнэр (къу. Гавердовскэр) — Садовэр — Павловыр — 12. Мартыр Гариныр —Я. Коблыр — Пионерскэр — Чкаловыр — Депутатскэр — я 3-рэ Интернационалыр — Пио­нерскэр — Лениныр — Пролетарскэр — Гоголыр — Пушкиныр — Железнодорожнэр — Революциер — Железнодорожнэр — Пушкиныр — Гоголыр — Пролетарскэр — Жуковскэр — Курганнэр — Димитровыр — Чкаловыр — Пионерскэр — Я. Коблыр — Гариныр — 12 Мартыр — Степноир — Садовэр — Титовыр — Набережнэр.

ЦIыфэу зэращэрэм ибагъэ елъытыгъэу общественнэ транспортыр зэрэзекIощтым исхемэ зэхъокIыныгъэхэр фашIыжьыщтых.

«Общественнэ транспортым изекIонкIэ джырэкIэ щыIэ схемэхэм анэфэшъхьафэу муниципальнэ маршрутхэми зэхъокIыныгъэхэр афэтшIыщтых. Гущы­Iэм пае, къутырэу Гавердовскэм, ЦКЗ-м, Михайловым ыкIи нэмыкI чIыпIэхэу анахьыбэ зыщыпсэухэрэм кIэлэцIыкIухэр къаращынхэм пае джыри нэ­мыкI екIолIакIэхэр къыхэтхыщтых», — къыхигъэхъожьыгъ къэлэ ин­фраструктурэмкIэ отделым.