Апэрэ чIыпIэр къахьыгъ
Урысыем ипцэжъыяшэхэм язэнэкъокъу Рязань хэкум ихыкъумэу Вышетравино щыкIуагъ.
Хэгъэгум ишъолъыр 12-мэ якомандэхэр зэIукIэгъум хэлэжьагъэх. Адыгэ Республикэм щыщхэм тагъэгушIуагъ.
СпортымкIэ мастерхэу Сергей Артюхиныр, Алексей Артюхиныр, Петр Миненкэр, Александр Нитиевскэр, Урысыем спортымкIэ имастерынымкIэ кандидатэу Руслан Брызгуновыр, спортымкIэ апэрэ разряд зиIэ Чэтыжъ Тимур хэгъэгум изэнэкъокъу зыхэлажьэхэм, яIэпэIэсэныгъэкIи, язэгурыIоныгъэкIи къахэщыгъэх.
Пцэжъые лъэпкъхэм ащыщэу карпыр ары хыкъумым къыщаубытынэу щытыгъэр.
— Зэнэкъокъур къинэу кIуагъэ, — къытиIуагъ Адыгэ Республикэм физкультурэмкIэ ыкIи спортымкIэ и Комитет икъулыкъушIэу Елена Шаталовам. — Тиспортсменхэр апэрэу хэгъэгушхом изэнэкъокъу хэлэжьагъэх. Щысэ зытырахын алъэкIыщтыри амышIапэу Рязань хэкум кIуагъэх. Зэнэкъокъур заухым, тикомандэ опытэу иIэр зэрагъашIэ ашIоигъоу нэбгырабэ пцэжъыяшэхэм къяупчIыгъ.
Адыгэ Республикэм пцэжъыешэ спортымкIэ и Федерацие 2020-рэ илъэсыр ары ныIэп зызэхащагъэр. Охътэ кIэкIым тиспортсменхэм загъэсагъ, шIыкIэшIухэр аIэ къырагъэхьагъэх.
Краснодар краим и Губернатор и Кубок къыдэхыгъэным фэгъэхьыгъэ зэнэкъокъоу 2020-рэ илъэсым щыIагъэм Адыгеим ихэшыпыкIыгъэ командэ апэрэ чIыпIэр къыщыдихыгъ. Урысыем и Кубок икъыдэхын Адыгэ Республикэм икомандэ мыгъэ зыхэлажьэм, ящэнэрэ чIыпIэр къыфагъэшъошагъ.
Рязань хэкум, нэмыкIхэм ащыкIогъэ зэнэкъокъухэр зызэфахьысыжьхэм Адыгеим ипцэжъыяшэхэу Сергей ыкIи Алексей Артюхинхэр Урысыем ихэшыпыкIыгъэ командэ хагъэхьагъэх.
ЕмтIылъ Нурбый Сурэтым итхэр: Адыгэ Республикэм пцэжъыешэ спортымкIэ ихэшыпыкIыгъэ командэ хэтхэр.