Адыгэ Республикэм и ЛIышъхьэу КъумпIыл Мурат сэнаущыгъэ зыхэлъ ныбжьыкIэхэм яслет хэлэжьагъ. Урысыем и Къэралыгъо Быракъ и Мафэ ар фэгъэхьыгъагъ. Пандемием ыпкъ къикIыкIэ программэр нахь агъэкIэкIыгъ.

Iофтхьабзэм хэлэжьагъэхэм язекIон экскурсие поселкэу Каменномостскэм щыIэ респуб­ликэ мэхьанэ зиIэ чIыопс саугъэтэу «Хьаджыкъо тIокIэ зэ­жъум» щырагъажьи, комплексэу «Водопады Руфабго» зыфиIорэм нэсыгъэх. КъакIугъэм икIыхьагъэ километри 6 фэдиз мэхъу. Илъэ­си 100-м ехъу зыныбжь черкес чъыгхатэхэм къахиубытэрэ пхъэ­шъхьэ-мышъхьэ чъыгхэр активистхэм къаплъыхьагъэх. Нэ­ужым псыхъоу Рыфабгъо екIолIагъэх ыкIи ащ ехыхи, псыкъефэххэу «Девичья коса», «Сердце Руфабго», «Каскадный» ыкIи «Шум» зыфиIохэрэр зэрагъэлъэгъугъэх.

ЗекIоныр рагъэжьэным ыпэ­кIэ шъолъырым ипащэ шIуфэс гущыIэхэмкIэ кIалэхэм закъыфигъэзагъ. НыбжьыкIэ движением хэхъоныгъэ ышIыным республикэм мэхьанэшхо зэрэщыратырэр КъумпIыл Мурат ипсалъэ къыщыхигъэщыгъ. Пандемием илъэхъан нахьыжъхэм ягъусэхэу студентхэм ыкIи кIэлэеджакIохэм IофшIэнышхо агъэцэкIагъ, гъомылапхъэхэр ыкIи Iэзэгъу уцхэр зыныбжь хэкIотагъэхэм аIэкIагъэхьагъэх, колл-гупчэхэм ащылэжьагъэх. Джащ фэдэу рэзэныгъэ гущыIэхэр япIоныр атефэ «зонэ плъыжьым» Iоф щызышIэгъэ волонтер-медикхэм.

Республикэм и ЛIышъхьэ зэрилъытэрэмкIэ, ныбжьыкIэхэр зэгурыIонхэм, ахэм азыфагу илъ зыкIыныгъэр гъэпытэгъэным, ащ дакIоу Адыгеим ипащэхэм ягъусэхэу гъэсэныгъэмкIэ, спортымкIэ, экономикэмкIэ, нэмыкI лъэныкъохэмкIэ щыIэ проектхэр щыIэныгъэм щыпхырыщыгъэнхэм мы Iофтхьабзэр афэIорышIэ.

— Анахь шIуагъэ къэзытын зылъэкIыщтыр цIыфым ыкIуачIэ зэрихьылIагъэр хьаулые зэрэмыхъугъэр зилъэ­гъукIэ ары. Ащ дакIоу обществэр ыкIи хабзэр къыготых, цIыф­хэм ящыIэкIэ-псэукIэ нахьышIу шIыгъэным иIофшIэн фыте­гъэпсыхьагъ. НыбжьыкIэхэм ренэу та­дэгущыIэ, унашъо тшIы зыхъукIэ ахэм япред­ложениехэр къыдэ­тэлъытэх. Ари мэхьанэшхо зиIэ лъэныкъу, — къыIуагъ КъумпIыл Мурат.

НыбжьыкIэ движением хэ­хъо­ныгъэ ышIыным ыкIи ащ хэтхэм къахьырэ предложениехэр щы­Iэныгъэм щыпхырыщыгъэнхэм анаIэ зэрэтетым фэшI республикэм ипащэхэм зэрафэразэхэр активистхэм къаIуагъ. Мыщ фэдэ зэIукIэгъу­хэм япчъа­гъэ нахьыбэ шIыгъэ­ным мэхьанэшхо иIэу алъытагъ.

НыбжьыкIэхэм къатыгъэ уп­чIэхэм зэкIэми профильнэ ведомствэхэм япащэхэм джэуап­хэр къаратыжьыгъэх. Джащ фэ­дэу ахэм къахьыгъэ предложениехэм къапкъырыкIызэ Адыгеим и ЛIышъхьэ хэбзэ къу­лыкъухэм ыкIи муниципалитетхэм япащэхэм пшъэрылъ гъэнэфагъэхэр афишIыщтых.