УФ-м и Президентэу Владимир Путиныр Урысые политическэ партиеу «Единэ Россием» илIыкIохэм заIокIэм хэушъхьафыкIыгъэ цIыф купхэм къэралыгъо IэпыIэгъу ятыгъэным фытегъэпсыхьагъэу кIэщакIо зыфэхъугъэхэм ягугъу къышIыгъ.

Зэпахырэ узэу дунаир зэлъы­зыкIугъэм ыпкъ къикIыкIэ инфляциер ыпэкIэ прогнозэу ашIыгъагъэхэм джыри зэра­шIокIырэр къэралыгъом ипащэ къыхигъэщыгъ. Уасэхэр проценти 4 нахьыбэкIэ дэмыкIоенхэу гугъагъэх, ау ар 6,5-м нэсыгъ.

— А зэпстэумэ такъыпкъы­рыкIызэ, пенсионерхэм зэтыгъо IэпыIэгъоу сомэ мин пшIы­рыпшI афэттIупщын фаеу сэлъытэ, — къыIуагъ Президентым. — Хэзыгъэ имыIэу ар зэкIэ пенсионерхэм, Iоф­шIапIэхэм аIутхэри, дзэм къулыкъу щызыхьыхэрэри ахэтхэу, анэсын фае. Ащ имызакъоу, дзэ къулыкъушIэ пэпчъ сомэ мин 15 зэтыгъоу фэгъэкIогъэ­ныри игъоу сэлъытэ.

Къэралыгъом ипащэ къызэрэхигъэщыгъэмкIэ, уасэхэр дэмыкIоенхэм УФ-м и Правительствэрэ Гупчэ Банкымрэ Iоф дашIэ, инфляциер зыпкъ игъэуцожьыгъэнэу, экономи­кэмрэ социальнэ лъэныкъомрэ хэхъоныгъэхэр ягъэшIыгъэнхэмкIэ планхэм ар адиштэу шIыжьыгъэнэу пшъэрылъ ахэм яI.