Урысые Федерацием и Къэралыгъо Быракъ и Мафэ шышъхьэIум и 22-м игъэкIотыгъэу Адыгэ Республикэм щыхагъэунэфыкIыгъ.

ШышъхьэIум и 21-м «Мэз­дахэ» идэкIояпIэхэм адэжь кIэ­лэцIыкIу творческэ купхэр щызэIукIагъэх. Урысыем хорымкIэ иIофтхьабзэхэм ахэр ахэлэжьагъэх.

ДэкIояпIэм илъэоянэхэм атетхэу ансамблэхэм ахэт кIэлэеджакIохэм Урысыем и Гимн къаIуагъ. Урысые Федерацием и Къэралыгъо Быракъ театрализованнэ шIыкIэм тетэу щаIэтыгъ.

Тарихъым зыфэбгъазэмэ, Урысыем и Къэралыгъо Быракъ зэблахъоу бэрэ къыхэкIыгъ. Урысыем и Къэралыгъо Гимн 2000-рэ илъэсым, тыгъэгъазэм и 30-м Владимир Путиным и УказкIэ аштагъ. ГущыIэхэр Сергей Михалковым ытхыгъэх. Орэдышъор композиторэу Александр Александровым ыусыгъ.

«Мэздахэ» идэкIояпIэхэм кIэлэеджакIохэр атетхэу Урысыем и Гимн къызэраIорэ шIыкIэм тигъэгушхуагъ. Урысхэр, адыгэхэр, къэзэкъхэр, ермэлхэр, къэндзалхэр, нэмыкI лъэпкъхэри зэгъусэхэу Гимныр агъэжъын­чы. Орэдышъом лъагэу огу къаргъом зыредзэ.

Къушъхьэ лъапэм ущытэу ансамблэхэу «Майкопчанкэм», «Мыекъуапэ инэфылъэхэм», «Казачатэм», «Радугэм», нэмыкIхэм Гимныр къызэраIорэм уедэIузэ, хэгъэгум ис лъэпкъхэм языкIыныгъэ зыгъэпытэрэ зэхахьэм узыфещэ. Гъогум рыкIохэрэ машинэхэу къэуцухэу Гимным едэIухэрэм уагъэгушIо.

Зэкъошныгъэм ипчэгу

ШышъхьэIум и 22-м Зэкъошныгъэм ипчэгу зэтегъэпсыхьагъэу Мыекъуапэ дэтым Урысыем и Къэралыгъо Быракъ и Мафэ фэгъэхьыгъэ Iофтхьабзэхэр щылъагъэкIотагъэх.

Пчэгур дахэу зэIухыгъ, мэфэкI шъуашэм дештэ, нэры­лъэгъу IэпыIэгъухэр кIэракIэх. Къэралыгъо телерадиокомпаниеу «Адыгеям» ижурналистэу Ахэджэго Рузанэрэ Къэралыгъо филармонием иансамблэу «Ошъутенэм» иорэдыIоу Юрий Конжинымрэ зэращэрэ зэха­хьэм хэгъэгум и Къэралыгъо Быракъ, Гимным афэгъэхьыгъэ тарихъ къэбархэр IупкIэу къыщаIуатэ.

КIэлэеджакIохэр, ныбжьыкIэхэр зэхэтхэу пчэгум къехьэх, гум рихьэу фэпагъэх, Урысыем и Быракъ агъэбыбатэ. Адыгэ Республикэм и ЛIышъхьэ ыкIи Адыгэ Республикэм иминистрэхэм я Кабинет я Администрацие ипащэу Владимир Свеженец, Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэлэхъо Аскэр, Мыекъуапэ иадминистрацие ипащэ иIэнатIэ зыгъэцэкIэрэ Сергей Стельмах, Адыгэ Республикэм культурэмкIэ иминистрэу Аулъэ Юр, нэмыкI хэбзэ къулыкъушIэхэр мэфэкIым хэлажьэхэрэм афэгушIуагъэх, гущыIэгъу афэхъугъэх.

Лъэпкъ IэпэIасэхэр

Пхъэм, гъучIым, шэкIым, нэмыкIхэм ахэшIыкIыгъэ пкъыгъохэм якъэгъэлъэгъон узыIэпищэу зэхащагъ. АР-м лъэпкъ культурэмкIэ и Гупчэ ипащэу Бадый Къэплъан къызэриIуа­гъэу, Адыгеим иIэпэIасэхэм яIофшIагъэ дунаим къыщыбгъэ­лъагъомэ, щытхъоу афаIощтыр макIэп.

Гостэкъо Руслъан, ТIэшъу Нурбый, Уджыхъу Вячеслав, нэмыкIхэм ашIыгъэ музыкальнэ лъэпкъ Iэмэ-псымэхэр, кушъэ­хэр, унагъом ищыкIэгъэ пкъыгъохэр гъэшIэгъоных.

Гумэ Ларисэ адыгэ лъэпкъ тхыпхъэхэр къегъэлъагъох, ныбжьыкIэхэм яIэпэIэсэныгъэ хагъэхъоным фэшI шIыкIэшIухэм ащегъэгъуазэх. Сетэ Сафыет, Хъурэнэ Азэ, Цурмыт Рузанэ, Теуцожь Фатимэ, фэшъхьафхэм зэхахьэм тащыIукIагъ. «IэпэIасэм иеджапI» зыфиIорэм кIэлэцIыкIухэр ягуапэу хэлэжьагъэх.

Концертыр

Адыгэ Республикэм и Къэралыгъо академическэ къэшъо­кIо ансамблэу «Налмэсым», АР-м иорэдыIо-къэшъокIо ансамблэу «Ислъамыем», ансамблэхэу «Долинам», «Мыекъуапэ инэфылъэхэм», зыгъэсапIэу «Радугэм», «Шпаргалкэм», нэмыкIхэм мэфэкI зэхахьэр къагъэдэхагъ.

«Налмэсым» къышIыгъэ къа­шъохэр гум къегущыIыкIых. «Адыгэ уджхэр», «ЗэфакIор», «Кавказ щыпсэурэ лъэпкъхэм якъэшъо зэхэтхэр», фэшъхьаф­хэри артистхэм дахэу къагъэлъэгъуагъэх.

«Ислъамыем» иорэдыIохэм уядэIузэ, лъэпкъ гупшысэм зеIэты. Дзыбэ Руслъан къыхидзэгъэ орэдым артистхэр мэкъэ зэхэткIэ къыдежъыугъэх.

ОрэдыIохэу Еутых Вячеслав, Хъут Рустам, Даутэ Сусанэ, Хъурэнэ Азэ, Сергей Трутневым, Анастасия Истамуловам, нэмыкIхэм адыгабзэкIи урысыбзэкIи мэфэкIым фэгъэхьыгъэ орэдхэр къаIуагъэх.

АР-м гъэсэныгъэмрэ шIэныгъэмрэкIэ и Министерствэ икъулыкъушIэу, ныбжьыкIэ Iофыгъохэр зыгъэцакIэу Нэгэрэкъо Алый изэфэхьысыжьхэм къащыхигъэщыгъ мэфэкIым лъэпкъ зэфэшъхьафхэр, кIэлэцIыкIухэр, зыныбжь хэкIотагъэ­хэр зэрэзэфищагъэхэр. Адыгэ Республикэм и Урыс театрэу А. С. Пушкиным ыцIэ зыхьырэм иартистхэм «Иван Пожарный и Змей Горыныч» зыфиIорэ спектаклэр зэхахьэм икIэухым къагъэлъэгъуагъ.

Къэралыгъом и Гимн, и Быракъ ямэхьанэ щыIэныгъэм зыкъызэрэщиIэтырэр мэфэкI зэхахьэхэм къахэщыгъ. ЕмтIылъ Нурбый.