Урысые лъэпкъ премиеу «Студент года – 2021» зыфиIорэм ишъолъыр уцугъо Адыгеим щыIэнэу агъэнафэ. Мыщ республикэм иапшъэрэ ыкIи сэнэхьат зыщарагъэгъотыхэрэ еджапIэхэм ащеджэхэрэр Iофтхьабзэм хэлэжьэщтых. Ахэм аныбжь илъэс 18-м къыщегъэжьагъэу 25-м нэс.

Зэнэкъокъур уцугъуищэу гощыгъэщт. Республикэм ар Iоныгъом и 25-м нэс щыкIощт, нэужым заочнэ уцугъор Iоныгъом и 26-м къыщегъэжьагъэу чъэпыогъум и 9-м нэс щыIэщт, премием изэфэхьысыжь шэкIогъум зэхащэщт.

НыбжьыкIэхэм зы лъэныкъу ясэнаущыгъэ къызыщагъэлъэ­гъон алъэкIыщтыр. Номинацие пчъагъэкIэ ахэр зэнэкъокъущтых. ШIэныгъэ зэфэшъхьафхэмкIэ, спортымкIэ, журналистикэм ылъэныкъокIэ ыкIи нэмыкIхэмкIэ студентхэм сэнэхьатэу ахэлъыр къагъэлъэгъоныр, сэнаущыгъэу ахэлъыр къыхэгъэщыгъэныр ары зэхэщакIохэм пшъэрылъ шъхьа­Iэу зыфагъэуцужьырэр.

Зэнэкъокъур тIоу гощыгъэ, купхэр зэрэзэнэкъокъущтхэм имызакъоу зырызэуи зыкъагъэ­лъэгъощт. Апшъэрэ еджапIэхэмкIэ анахь сэнаущыгъэ зыхэлъ студентыр, илъэсым испортсмен, илъэсым егъэджэнымкIэ советым ипащэ, илъэсым иобщественник ыкIи нэмыкI лъэныкъо­хэмкIэ анахь дэгъухэр агъэнэ­фэщтых.

Сэнэхьат зэфэшъхьафхэмкIэ гъэсэныгъэхэм яучреждениехэу шIэныгъэ зыщарагъэгъотыхэрэм ястудентхэми хэушъхьафыкIыгъэ лъэныкъохэмкIэ зэнэкъокъунхэу пшъэрылъ яIэщт.

Адыгэ къэралыгъо университетыр, Урысые общественнэ организациеу «Российский Союз Молодежи» зыфиIорэм и Адыгэ шъолъыр организацие, Урысыем истудентхэм ыкIи студент объе­динениехэмкIэ и Ассоциацие и Адыгэ шъолъыр отделение шъо­лъыр премием кIэщакIо фэхъу­гъэх.

ДЕЛЭКЪО Анет.