АР-м хэгъэгу кIоцI IофхэмкIэ и Министерствэ гъогухэр щынэгъончъэу щытынхэм, анахьэу машинэхэр зэутэкIынхэмкIэ щынэгъо чIыпIэхэм гъэлъэшыгъэ шIыкIэм тетэу ынаIэ тырегъэты. Мы лъэныкъомкIэ шIыкIэ зэфэшъхьафхэр агъэфедэх, ау мы аужырэ илъэсхэм министерствэм игукъэкIыкIэ Къэралыгъо автоинспекцием ишIоигъоныгъэ хэлъэу Росгвардием иаппаратэу ежь-ежьырэу къэзыбыбыхьэрэр (БПЛА) къызфагъэфедэ хъугъэ.

Джырэблагъэ федеральнэ мэхьанэ зиIэ автомобиль гъогоу «Кавказ» зыфиIоу Мыекъуапэ къекIуалIэрэм министерствэр ыкIи Росгвардиер кIэщакIо зы­фэхъугъэ дэкIыгъо Iофтхьабзэу рагъэкIокIыгъэм къэбарлъыгъэ­Iэс амалхэм ялIыкIохэр хэлэжьа­гъэх.

Статистикэм къызэритырэмкIэ, мы гъогу шъолъырыр аварийнэ-щынагъохэм ащыщ. 2019-рэ илъэсым къыщегъэжьагъэу а чIыпIэм гъогу хъугъэ-шIэгъэ 19 къытехъухьагъ, ахэм нэбгырэ 11 ахэкIодагъ, нэбгырэ 28-мэ шъобж­хэр атещагъэхэ хъугъэ. Ахэм ащыщ бэмышIэу, шышъхьэIум и 11-м, цIыфхэр бэу зыхэкIодэгъэ аварие гухэкIэу щыхъугъэр.

Шъугу къэдгъэкIыжьын 2021-рэ илъэсым шышъхьэIум и 11-м сыхьатыр 19.00-м Мыекъопэ районым ит станицэу Кужорскэм пэмычыжьэу автомобиль гъогоу «Кавказ» зыфиIорэм аварие тхьамыкIагъо зэрэщыхъугъэр. Мы хъугъэ-шIагъэм нэбгыриплI хэкIодагъ. НэбгыритIур Урысыем и МВД иотделэу Мыекъуапэ щыIэм икъулыкъушIэх, тIури Мыекъуапэ щыпсэущтыгъэх.

Автомобилэу ВАЗ-рэ Маз­дэмрэ нэтIэрыоу зэрэзэутэкIыгъэхэр ары аварием лъапсэ фэхъугъэр.

Автомобилэу Жигулим иводитель бзылъфыгъэу илъэс 46-рэ зыныбжьыр Мыекъопэ районым щыпсэущтыгъэ, ыкIи IэкIыбым къыщашIыгъэ машинэм исыгъэ полицием икъулыкъушIэу илъэс 23-рэ зыныбжьым шъобжэу атещагъэхэм къахэкIэу а чIыпIэм ядунай щахъожьыгъ.

Илъэси 5 ыкIи илъэси 6 зыныбжьхэ кIэлэцIыкIухэу бзылъфыгъэм дисыгъэхэр ыкIи Маздэм исыгъэ ятIонэрэ къулыкъушIэр IэпыIэгъу псынкIэмкIэ сымэджэщым нагъэсыгъэх. Ау чэщым шышъхьэIум и 11-м ыкIи и 12-р къызщихьащтым илъэси 5 зыныбжь сабыир ыкIи илъэс 26-рэ зыныбжь къулыкъушIэм ядунай сымэджэщым щахъожьыгъ.

ЯтIонэрэ сабыим ищыIэныгъэ къагъэнэжьыным мы уахътэм врачхэр фэбанэх.

Полицием зэригъэунэфыгъэмкIэ, аварием лъапсэ фэхъугъэр ощхышхоу къещхыгъэр ары. АР-м хэгъэгу кIоцI IофхэмкIэ иминистрэу Иван Бахиловым ежь ышъхьэкIэ уплъэкIун Iофтхьабзэхэр зэхищагъэх.

— ЦIыф зэрымысэу къэзыбыбыхьэрэ аппаратыр (БПЛА) зыщагъэфедэщт чIыпIэмкIэ уп­чIэжьэгъу ташIы, ар лъэныкъуа­бэмэ ялъытыгъ. Авариехэр нахьыбэу зыщыхъухэрэ чIыпIэхэр ыкIи ом изытет къыдэплъытэнхэ фае. Анахь IэубытыпIэ шъхьаIэу Iоф зыдатшIэрэр гъогухэм къатехъухьэхэрэ хъугъэ-шIэгъэ хьылъэхэр зэхэтфынхэр ары. Щынэгъо ин къэзытыхэрэм ащыщ ыпэкIэ къикIырэ автомобилым нэтIэрыоу зэреутэкIыхэрэр, —къыIуагъ АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ гъэIорышIапIэм иотдел ипащэу Алексей Чмыревым.

Ежь-ежьырэу къэзыбыбыхьэрэ аппаратым Iоф зыщишIэгъэ такъикъ 40-м ыуж гъогурыкIоным ишапхъэхэр зыукъогъэ апэрэ водителыр къагъэуцугъ. Зэра­гъэу­нэфыгъэмкIэ, водителым шапхъэхэр ыукъохи, ыпэкIэ къикIырэ гъогум техьагъ. Водителым хэукъоныгъэу ышIыгъэр зытетхэгъэ видеотехыгъэм зырагъэплъыжьы нэуж лажьэ зэриIэм къеуцолIэжьыгъ. Полицием икъулыкъушIэхэм къызэраIуа­гъэмкIэ, хъулъфыгъэм административнэ тазырэу сомэ мини 5-м нэс тыралъхьан е мэзи 4-м къыщегъэжьагъэу мэзи 6 пIалъэ иIэу иправэ Iахын алъэкIыщт. Ащ ыуж такъикъ 20 тешIагъэу псынкIащэу автомобилыр зезыфэщтыгъэ водителитIу къагъэу­цугъ. Хэгъэгу кIоцI IофхэмкIэ и Министерствэ ибазэ ахэм якъэ­бар зырагъахьэм, тIуми административнэ хэукъоныгъэхэр тапэкIэ ашIыгъэхэу къычIэкIыгъ.

«Хэукъоныгъэу ашIыгъэр зытет видеотехыгъэм водительхэр етэгъэплъыжьых. Сыда пIомэ бэрэ къыхэкIы водителым гу лъимытэу ыпэкIэ къикIырэ гъогум зэрэтехьагъэм емыуцо­лIэжьэу. Джащыгъум аппаратым тырихыгъэр етэгъэлъэгъу ыкIи ащ ыуж хэукъоныгъэу ышIыгъэм еуцо­лIэжьы», — еIо гъогу-патруль къулыкъум иIофышIэу, полицием икапитанэу Баджэ Аслъан.

Полицием иполковникэу Алексей Чмыревым къызэриIуагъэмкIэ, авиацием ипкъыгъо къызфагъэфедэзэ гъогум зэрэщызекIохэрэм гъунэ алъыфыгъэнымкIэ лъыплъэн IофшIэнэу агъэцакIэрэм ишIогъэшхо къэкIо.

Ар къеушыхьаты статистикэм. ГущыIэм пае, 2017-рэ илъэсым къыщегъэжьагъэу мы уахътэм нэс Адыгеим и Къэралыгъо автоинспекцие авиационнэ отрядыр игъусэу ыпэкIэ къикIырэ гъогум техьагъэхэу хъугъэ-шIэгъэ 620-м ехъу агъэунэфыгъ. Мыщ дэжьым къыщыIогъэн фае илъэс къэс мыхэм япчъагъэ къызэрэщыкIэрэр. Ащ къегъэлъагъо мы лъэныкъомкIэ IофшIэнэу агъэцакIэрэм ишIуагъэ къызэрэ­кIорэр, — къыIуагъ къэралыгъо автоинспекцием игъэIорышIапIэ илIыкIо.

ГъэIорышIапIэм ыкIи Росгвардием яподразделениехэм графикэу зэхагъэуцуагъэм хахьэу тапэкIи Адыгэ Республикэм иавтомобиль гъогухэм мыщ фэдэ Iофтхьабзэхэр ащызэхащэщтых.

КIАРЭ Фатим.