Адыгеим Iофхэм ягъэзекIонкIэ и Гупчэ испециалистхэм зэрагъэунэфыгъэмкIэ, шышъхьэIур къызихьагъэм къыщыублагъэу тхылъ 1127-рэ къаIэкIэхьагъ. Ахэм къащаIэтыгъэ Iофыгъо 812-р зэшIуахыгъах, 315-мэ – ахэплъэх.

Республикэм исхэм къагъэ­хьыхэрэр, зыгъэгумэкIхэрэ IофыгъохэмкIэ къаIэтыхэрэр игъом, зэрищыкIагъэм тетэу гъэунэфыгъэныр ЦУР-м иIофышIэхэм япшъэрылъ. ШышъхьэIур къызихьагъэм къыщегъэ­жьагъэу Мыекъуапэ иорганизациехэу гъэIорышIэн Iофхэм афэгъэзагъэхэри ащ къыхэлажьэхэ хъугъэ. ПшъэдэкIыжь зыхьын фаехэм япхыгъэ Iофхэм ахэплъэнхэр ащ фэдэ зэдэлэжьэныгъэм нахь къегъэпсын­кIэ. ТОП-5-м къыIэкIэхьэрэ Iофыгъохэр анахь зигъохэм ащыщых: щагухэр, зэкIэми зэдагъэфедэрэ чIыпIэхэр зэтегъэпсыхьэгъэнхэр, ЖКУ-м тефэрэ ахъщэр тыгъэныр, хэкIыр игъом Iущыгъэныр, фэтэрыбэу зэхэт унэхэм ачIэсхэм къаIэтырэ ыкIи нэмыкI Iофы­гъохэр.

ЖКХ-м епхыгъэ закъохэр арэп цIыфхэр зыгъэгумэкIхэрэр зыфэгъэхьыгъэхэр. Псауныгъэм икъэухъумэн, нахь тэрэзэу къэ­пIон хъумэ, вакцинациер ары джыдэдэм анахьэу цIыфхэр зыгъэгумэкIхэрэр. Ахэм яшIоигъоныгъэхэр къыдалъытэхи, АНО-у «Диалог» зыфиIорэмрэ АНО-у «Национальные приоритеты» зыфиIорэмрэ стопкоронавирус.рф. исайткIэ интерактивнэ картэу COVID-19-р агъэ­федэным иамал аратыгъ. Джы Урысыем щыпсэурэ нэбгырэ пэпчъ ковидыр къызэутэлIагъэ­хэм афэгъэхьыгъэ къэбарыр псынкIэу къызIэкIигъэхьан ылъэ­кIыщт. Картым сатыушIыпIэ гупчэхэм, къэралыгъо фэIо-фашIэхэм ягъэцэкIэн фэгъэзагъэхэм, транспортым ыкIи нэмыкIхэм яIофшIэн зэрэзэхэщагъэмкIэ шэпхъэ гъэнэфагъэу щыIэн фаехэр рагъотэщтых. ЦУР-м иIофышIэхэр ары сайтым къихьэрэ къэбархэр тхьэмафэ къэс зыгъэкIэжьхэрэр.

ШышъхьэIум иапэрэ мафэхэм Адыгеим и ЦУР-рэ республикэм псауныгъэм икъэухъумэнкIэ и Министерствэрэ зэдызэхагъэуцогъэ проектэу «Спроси врача» зыфиIорэр атIупщыгъ.

Республикэм щыпсэухэрэр нахьыбэу зыгъэгумэкIхэрэм ащыщ кардиологхэм, невролог­хэм, онкологхэм, инфекцио­нистхэм ыкIи педиатрэхэм ме­дицинэ консультацие зэрада­шIыщт шIыкIэр. Непэ эпидемиологием ылъэныкъокIэ Iофхэр къы­зэрэхьылъагъэхэм къыхэкIэу мы врачхэм уаIукIэныр, къы­зэб­гъэ­плъынхэр къин хъугъэ. Проектэу зигугъу къэтшIыгъэм ишIуагъэ къэкIощт тицIыфхэр анахь зыгъэгумэкIхэрэ Iофыгъо­хэмкIэ врачхэм, медицинэ учреждениехэм япащэхэм, псауныгъэм икъэухъумэнкIэ штатым хэмыт специалистхэу Министерствэм къепхыгъэхэм джэуапхэр къаратыжьынхэмкIэ. Социальнэ сетьхэр зыгъэфедэхэрэм онлайн-консультацие къаритын ылъэкIыщт врач-кардиологэу, Адыгэ республикэ клиническэ сымэджэщым икардиологическэ диспансер ипащэу Аулъэ Фатимэ. Илъэс 24-рэ хъугъэ ащ Iоф зишIэрэр.

ТхьэмэфитIум къыкIоцI цIыф­хэр зыгъэгумэкIхэрэ Iофыгъуабэмэ ащыщхэр зэшIуахынхэ алъэкIыгъ. ПсэупIэу Яблоновскэм щыщ горэм итхьаусыхэ тхылъ зыфэгъэхьыгъэр автомобильхэр зэрыкIохэрэ лъэмы­джым ычIэгъ щызэIукIэгъэ хэкIыр ары. Муниципальнэ образованиеу «Яблоновскэ къэлэ псэупIэр» зыфиIорэм иадминистрацие щылажьэхэрэм яшIуагъэкIэ пIэлъэ кIэкIым къы­кIоцI хэкIыр Iуащыгъ.

Адыгеим и ЛIышъхьэ ренэу ынаIэ тырегъэты цIыфхэр зыгъэгумэкIхэрэ Iофыгъохэм язэшIохын зэрэдэлажьэхэрэм. 2021-рэ илъэсым иублэгъум къыщегъэжьагъэу «Къэралыгъо фэIо-фашIэхэр» зыфиIорэ платформэмкIэ гъогогъу 3497-рэ цIыфхэм закъыфагъэзагъэу агъэунэфыгъ, социальнэ сетьхэмкIэ — гъогогъу 3850-рэ. Ахэр зэкIэ зыфэгъэхьыгъэ лъэ­ныкъохэмкIэ зэтыраутыжьых, Iофыгъоу къаIэтыгъэр зэпхыгъэ ведомствэхэм е муниципальнэ образованиехэм етIанэ аIэкIагъахьэх. Социальнэ мэхьанэ зиIэ IофыгъохэмкIэ къэралыгъо хабзэм ыкIи чIыпIэ зыгъэIорышIэжьыным якъулыкъухэм мафэ къэс аIэкIагъахьэх ахэм япхыгъэ тхылъхэр. Республикэм и ЛIышъхьэ а IофыгъохэмкIэ зэшIохыгъэ хъугъэхэр тхьэмафэ къэс къыIэкIагъэхьажьых. ЦУР-м зэрэхигъэунэфыкIырэмкIэ, мазэ къэс цIыфхэм зышъхьашыгу къырахырэ, зыгъэгумэкIыхэрэ Iофыгъохэу яIэхэр нахьыбэ мэхъух.

ГъэцэкIэкIо хабзэмрэ чIыпIэ зыгъэIорышIэжьынымрэ якъулыкъухэм мазэ къэс Iофэу ашIагъэм фэгъэхьыгъэ зэфэхьысыжьхэр къатых. Ахэм яшIуагъэ къэкIо IофшIэныр нахь тэрэзэу зэхэщэгъэнымкIэ ыкIи Адыгеим и ЛIышъхьэ дэкIыгъо зэIукIэхэр зэхищэхэ зыхъукIэ уахътэм анахь зигъо Iофыгъохэу къыгъэ­уцухэрэмкIэ зэхэфын Iофтхьабзэхэр зэрихьанхэм лъапсэ фэхъух. Хабзэм иреспубликэ къулыкъухэм япащэхэр джырэблагъэ зэIукIэнхэмкIэ Адыгеим и ЦУР изичэзыу отчет ары лъапсэ хъугъэр. Ащ нэмыкIэу хабзэм иреспубликэ къулыкъу­хэм апае мафэ къэс социальнэ сеть 885-мэ Iоф ашIэ. Джэуап­хэр игъом аIэкIэхьанхэмкIэ а пстэуми яшIуагъэ къэкIо. Мазэ къэс министерствэхэм, ведомствэхэм, джащ фэдэу муниципалитетхэм социальнэ сетьхэмкIэ къэбарэу къаIэкIэхьагъэхэм япхыгъэу яIофшIэн зэрагъэцакIэрэм елъытыгъэу мы Гупчэм мазэ къэс зэфэхьысыжь гъэнэфагъэхэр ешIых. Хабзэмрэ цIыфхэмрэ язэпхыныгъэ нахь пытэнымкIэ, цIыфхэм ягумэкIыгъохэр игъом зэшIохыгъэнхэмкIэ ахэр зэкIэ амалышIу мэ­хъух.