Зыныбжь илъэс 18-м ехъугъэу вакцинациер зыкIугъэхэм шIухьафтынхэр атырагощэщтых. ЗэкIэмкIи текIоныгъэр къыдэзыхыгъэ нэбгырэ 1000 къыхахыщтых, ахэм сомэ мини 100 зырыз аратыщт. Мыщ фэгъэхьыгъэ унашъом кIэтхагъ Урысыем и Премьер-министрэу Михаил Мишустиныр.

Iофтхьабзэр 2021-рэ илъэсым Iоныгъом и 1-м щыублагъэу тыгъэгъазэм и 1-м нэс кIощт.

ТекIоныгъэр къыдэзыхыгъэхэр компьютерым къыхихыщтых, ащ дэжьым вакцинациер зыкIугъэхэм я ЗыкI регистрэ ит къэбархэр зэхэщакIохэм къызфагъэфедэщт. Зэфэхьысыжьхэр ышIыщт ыкIи ыштэщт хэушъхьафыкIыгъэ тиражнэ комиссием, ащ хэтыщтхэр агъэнэфэнхэу щыт.

ТекIоныгъэр къызэрэдихыгъэр цIыфым лъагъэIэсыщт «pysh-уведомлениекIэ». Джащ фэдэу мыщ епхыгъэ къэбарыр ижъугъотэщт къэралыгъо ыкIи муниципальнэ фэIо-фашIэхэм я ЗыкI портал къыщызэIухыгъэ унэе кабинетым. Лоторееу зэхащагъэм иофициальнэ сайтэу «Бонусзаздоровье» зыфиIорэми текIуагъэхэм яспискэ итыщт.

Банк системэу «Мир» зыфиIорэ за­къор ары ахъщэр зырагъэхьащтыр. Iоф­тхьабзэр зыкIуагъэм ыуж къыкIэлъыкIорэ мэзихым ахъщэ шIухьафтынхэр аратыжьыщтых.

ШIухьафтыныр къызэрэпхьыгъэм фэгъэхьыгъэ къэбар къыпIэкIэхьаным ыкIи ахъщэр къызэрагъэхьащт картэм тетхагъэхэр афэбгъэхьыным афэшI къэралыгъо ыкIи муниципальнэ фэIо-фашIэхэм я ЗыкI портал уитхэгъэн фае. Унэе кабинетымкIэ къэбарыр къызпIэкIэхьагъэм ыуж мэзищ нахьыбэ темышIагъэу картэу «Мир» зыфиIорэм иномер иптхэн фае.

— Вакцинациер зыкIугъэхэр къыхэгъэщыгъэнхэм фыте­гъэпсыхьэгъэ программэу ттIупщыгъэмкIэ, прививкэ зязыгъэшIыгъэ, ежь ыкIи къыпэблагъэхэм япсауныгъэ къэзыухъумэгъэ цIыфхэм правительствэр зэрафэразэр ятIомэ тшIоигъу, — къыIуагъ вице-премьерэу Татьяна Голиковам. Ковидым пэшIуекIорэ вакцинэр жъугъэу ахалъхьанэу зырагъэжьагъэр щылэ мазэм и 18-р ары. ШышъхьэIум иублэгъум ехъулIэу Урысыем щыпсэурэ нэбгырэ миллион 37-мэ прививкэ зара­гъэшIыгъ.