Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет журналистхэм апае зэхищэгъэ зэнэкъокъоу «На земле предков. Между прошлым и будущим» зыфиIорэм изэфэхьысыжьхэр мы мафэхэм къэнэфагъ. Анахь IофшIэгъэ дэгъу зыгъэхьазырыгъэ журналистхэр агъэшIуагъэх.

— ЗичIыгужъ къэзыгъэзэжьыгъэхэр щыIэныгъэм хэгъэгъо­зэжьыгъэнхэр зэкIэми типшъэ­рылъ. Ахэм афэгъэхьыгъэу журналистхэм бэ къагъэлъагъо­рэр, къатхырэр. Зэнэкъокъум зэкIэмкIи IофшIэн 18 къырахьылIагъ. Джыри тапэкIэ нахь чанэу къыхэлэжьэнхэу тэгугъэ, — къыIуагъ Комитетым ипащэу Шъхьэлэхъо Аскэр.

Гъэзетхэмрэ журналхэмрэ къащыхаутыгъэхэмкIэ апэрэ чIыпIэр къыфагъэшъошагъ Адыгэ телевидением иIофышIэу Тэу Замирэ республикэ гъэзетэу «Адыгэ макъэм» къыригъэхьэгъэ тхыгъэу «Хэку гупсэм щигъотыжьыгъэ шъхьафитныгъэр» зыфиIорэм пае. ЯтIонэрэ чIыпIэр «Майкопские новости» зыфиIорэм иобозревателэу Александр Данильченкэм ытхыгъэ «Счастье возвращения к корням» зыфиIорэм къылэ­жьыгъ. Ящэнэрэ чIыпIэр фагъэ­шъошагъ республикэ гъэзетэу «Адыгэ макъэм» иотдел иредактэрэу Сихъу Гощнагъо итхыгъэу «Сыдигъуи згъэзэжьынэу сыгу къихьагъэп» зыфиIорэм. Къэралыгъо телерадиокомпаниеу «Адыгеям» радиокъэтынхэмкIэ икъулыкъу иIофышIэхэу Бэгъушъэ Фатимэ ыгъэхьазырыгъэ къэтынэу «ТихьакI. ЧIыгужъым иIэшIугъ» зыфиIорэр, Хьакъунэ Заремэ — «ЦIыфым илъэуж» ыкIи Тыгъужъ Саниет ыгъэхьазырыгъэ «ГупсэфыпI» зыфиIохэрэр анахь дэгъухэу къыхагъэщыгъэх.

Телевизионнэ къэтынхэмкIэ апэрэ чIыпIэр фагъэшъошагъ Къэралыгъо телерадиокомпа­ниеу «Адыгеям» икорреспондентэу ГъукIэлI Сусанэ, ятIонэрэ чIыпIэр — Къэралыгъо телерадиокомпаниеу «Адыгеям» игъэ­цэкIэкIо продюсерэу ТIэшъу Светланэ, ящэнэрэ хъугъэ электроннэ къэбар жъугъэм иамалхэмкIэ «Единый информационный центр» зыфиIорэм ипащэ игуадзэу Хъопсэрыкъо Нэфсэт.

Iофтхьабзэм къыдыхэлъытагъэу «Антология драматургии народов России» зыфиIорэ тхылъэу къыдэкIыгъэм игугъу къашIыгъ. Чэпэе Мурат идрамэу «Вдова» ыкIи Хьакъуй Аслъан идрамэу «Чечело» зыфиIорэр ащ къыдэхьагъэх. Тхылъхэр афагъэшъошагъэх Чэпэе Муратэ ипшъашъэрэ Хьакъуй Аслъанрэ.

— УФ-м лъэпкъ литературэм IэпыIэгъу фэхъугъэным фэгъэхьыгъэ программэр 2016-рэ илъэсым къыщегъэжьагъэу щыI. Лъэпкъ литературэм зегъэушъом­бгъу­гъэныр, зыкъегъэIэтыжьыгъэныр ары пшъэрылъ шъхьаIэр. Iоф­тхьабзэм икIэщакIор «Урысыем итарихъ обществ» зыфиIорэм иассоциацие ипашэу Сергей Нарышкиныр ары. 2017-рэ илъэ­сым къыщегъэжьагъэу программэм къыдыхэлъытагъэу зыфэдэ къэмыхъугъэ тхылъиплI къыдэ­кIыгъ. «Современная лите­ратура народов России» зыфи­Iорэм поэзиер, кIэлэцIыкIу литературэр, прозэр ыкIи аужырэ тхылъым драматургиер къы­дэхьагъэх, — еIо Шъхьэлэхъо Аскэр.

ЫпэкIэ къыдэкIыгъэ тхылъхэм адэтых Къуикъо Шыхьамбый, Дэрбэ Тимур яусэхэр, Цуекъо Юныс ипрозэ, ШэкIо Абрек ыкIи Гъыщ Рахьмэт яусэхэр. ДжырэкIэ Дэрбэ Тимур, Мамый Руслъан, ШэкIо Мирэ ятхыгъэ­хэр къызыдэхьащт тхылъыр агъэхьазыры.

ДЕЛЭКЪО Анет.