Абхъаз гуфакIохэм афэгъэхьыгъэу Щытхъум ипарк Къэрэщэе-Щэрджэсым ипсэупIэу Старо-Кувинскэм къыщызэIуахыгъ.

1864 — 1867-рэ илъэсхэм Абхъазым егъэзыгъэкIэ къи­кIыжьыхи, Старо-Кувинскэр псэупIэу къыхэзыхыгъэ абхъаз­хэр бэ мэхъух. Грузием иуIэшыгъэ купхэр 1992-рэ илъэсым Абхъазым щыхъункIэхэ зэхъум Къэрэщэе-Щэрджэсым щыщ кIалэхэр зэо-машIом хэхьагъэх, Абхъазым гъусэ фэхъугъэх.

Республикэм щапIугъэ нэбгырэ 13 лIыхъужъэу заом щы­фэхыгъ. ШышъхьэIум и 14-м, 2021-рэ илъэсым гуфакIохэм афэгъэхьыгъэ зэхахьэхэр Къэ­рэщэе-Щэрджэсым щыкIуагъэх.

ДзэкIолIым и Щытхъу ипаркэу Щэрджэскъалэ дэтым Хэгъэгу зэошхом лIыхъужъэу хэкIодагъэ­хэм, яинтернациональнэ пшъэ­рылъ Афганистан щагъэцакIэзэ фэхыгъэхэм ясаугъэтхэр дэтых. Республикэм ихэбзэ къулыкъу­шIэхэр, общественнэ IофшIэнхэр зыгъэцакIэхэрэр паркым щызэIукIагъэх, саугъэтхэм къэгъагъэхэр акIэлъыралъхьагъэх.

Старо-Кувинскэм щыкIогъэ зэхахьэм Адыгеим, Къэбэр­тэе-Бэлъкъарым, Дагъыстан, Чэчэным, Абхъазым, Темыр Осетием — Аланием, Шапсыгъэ, Къэрэщэе-Щэрджэсым ялIыкIохэр щызэIукIагъэх.

Абхъаз гуфакIохэм 1992 — 1993-рэ илъэсхэм лIыгъэу зэрахьагъэр тарихъым инэкIуб­гъохэм зэрахэмыкIокIэщтыр, лIыхъужъхэр гъашIэм щысэтехыпIэу зэрэщытиIэхэр, Къэрэщэе-Щэрджэсым щыщ кIэлэ 13 заом зэрэщыфэхыгъэр зэIукIэгъум къыщаIуагъэх.

Къэрэщэе-Щэрджэсым и Парламент идепутатэу Дзугъо Заур, зэхахьэр зезыщэгъэ Роберт Ашбэ, Адыгэ Республикэм иабхъаз гуфакIохэм я Союз ипащэу Къуижъ Къэплъан, Къэрэщэе- Щэрджэс Республикэм игуфа­кIохэм я Союз ипащэу Жиров Мурат къэгущыIагъэх.

Абхъазым щыфэхыгъэхэм зы такъикъэ афэшъыгъуагъэх, абхъаз гуфакIохэм я Щытхъу парк къызэIуахыгъ.

ЕмтIылъ Нурбый.