Унагъохэм псэукIэ амалхэу яIэхэр нахьышIу ашIынхэм пае фэгъэкIотэнхэр зиIэ ипотекэхэр къыздыхэлъытэгъэ программэ тIупщыгъэным кIэщакIо фэхъугъэр УФ-м и Президентэу Владимир Путиныр ары.

2018-рэ илъэсым ар ежьагъ, 2023-м игъэтхапэ и 1-м нэс пIалъэу иIагъ. Ау джыри къэралыгъом ипащэ кIэщакIо фэхъуи а илъэсым ыкIэм нэс программэм пIалъэу иIэр лъагъэкIотагъ. Ащ имызакъоу, сабыитIу, щы е нахьыбэ зиIэхэм афэшъхьафэу, апэрэр къызэрыхъухьагъэхэ унагъохэми ар агъэфедэн алъэ­кIынэу Президентым унашъо къышIыгъ.

Мы программэм ишIуагъэкIэ проценти 6 нахьыбэ зытемыгъэ­хъогъэ чIыфэ банкым къыIахынышъ, псэупIэ ащэфын е агъэу­цун алъэкIыщт. Кредитэу аштагъэр аухыфэкIэ ащ фэдэ процентым кIуачIэ иIэщт.

УФ-м и Правительствэ и Тхьаматэу Михаил Мишустиным министрэхэм я Кабинет изэхэсыгъо къызэрэщиIуагъэмкIэ, зэхъокIыныгъэхэр пхырыщыгъэн­хэм пае кредитхэм ятын пэIу­хьащт ахъщэр сомэ триллионрэ миллиард 700- кIэ нахьыбэ ашIыгъ.

2018-рэ илъэсэу программэр зыщыIэм къыщегъэжьагъэу ащ фэдэ кредитэу мини 175-рэ пстэумкIи къэралыгъом щагъэ­псыгъ. БлэкIыгъэ 2020-р зэпахырэ узэу дунаир зэлъызыкIугъэм къин дэдэ къышIыгъагъэми, цIыфхэм псэукIэ амалэу яIэр нахьышIу ашIынымкIэ пэрыохъу афэхъугъэп. Аналитическэ Гупчэу «Дом РФ» зыфиIорэм къызэритырэмкIэ, фэгъэкIотэнхэр зиIэ унэгъо ипотекэу мин 78,8-рэ зэкIэмкIи агъэпсыгъ. АхъщэкIэ къэплъытэмэ, ар со- мэ миллиард 214,9-рэ мэхъу.

Джащ фэдэу унакIэу ашIы­гъэм псэупIэ къыщызыщэфыхэ зышIоигъохэм апаий фэгъэ­кIотэнхэр зиIэ ипотекэ мы программэм къыдыхэлъытагъ. Ар агъэфедэзэ кредит мин 345,6-рэ икIыгъэ илъэсым аш­тагъ. Ар сомэ триллион мэхъу.

Тызыхэт 2021-рэ илъэсым иапэрэ мэзих пштэмэ, пстэумкIи унэгъо мин 292-мэ мы ипотекэхэр агъэпсыгъэх. Ахъщэу аштагъэр зэкIэмкIи сомэ миллиард 959-рэ мэхъу.