КоронавирусыкIэу «COVID-19»-м пэшIуекIорэ вакцинэм изыхэлъхьан анахьыбэу непэ зигугъу ашIыхэрэм ащыщ. Мы уз мэхъаджэм узэребэныщт нэмыкI шIыкIэ мы уахътэм зэрэщымыIэр къагурыIоу, прививкэр бэмэ арагъэшIы хъугъэ, ау ащ фэгъэхьыгъэ упчIэхэр къатых.

Урысыем вакцинэ заулэ къы­щаугупшысыгъ, ушэтынхэр арагъэкIугъэх, цIыфхэм ахалъхьанхэм фэхьазырхэу шъолъырхэм афатIупщых. Ахэм ащыщэу нахь зишIуагъэ къэкIощтым е нахь щынэгъончъэм къыкIэупчIэрэр бэ. ГущыIэм пае, «Спутник V»-рэ «Спутник Лайт» зыфиIорэмрэ зэрэзэтекIыхэрэр, ятIонэрэр зыныбжь хэкIотагъэхэм зыхалъхьэ зыкIэмыхъущтыр ашIэмэ ашIоигъу.

Москва дэт клиникэшхохэм ащыщэу «Медицина» зыфиIорэм, нэмыкIэуи «Клиника академика Ройтберга» зэреджэхэрэр, иврач шъхьаIэу Максим Терскэм гупчэ СМИ-м ащыщ къызэрэщиIуагъэмкIэ, ныбжьыр зыхэкIуа­тэкIэ иммунитетым нахь «жъа­жъэу зигъазэу» мэхъу, зиягъэ къэкIонэу пкъышъолым къыхэ­хьагъэм зэрэпэшIуекIорэм къы­щэкIэ. Ащ фэшI прививкэм шIуагъэ къытыным пае, вакцинацием икурс зэрэщытэу ыкIун фаеу еIо. «Спутник Лайтым» тхылъэу пылъым зэритхагъэмкIэ, ар илъэс 18 — 60 зыныбжь­хэм коронавирусыкIэр къямы­олIэныр ары зыфытегъэпсыхьагъэр, «Спутник V»-р зыхалъхьащтхэм аныбжь 18 икъугъэн фай, ау зынэсыгъэщтымкIэ гъунапкъэ иIэп.

«COVID-19»-м пэшIуекIорэ прививкэр зэ пшIыгъэ пай уигъа­шIэм узэримыухъумэщтыр нафэ. Ар кIэпшIыкIыжьыным пIалъэу пылъыми цIыфхэр егъэ­гумэкIых.

ВОЗ-м джыри «ревакцинациер» имыщыкIагъэу ары къызэритырэр. УФ-м псауныгъэм икъэухъумэнкIэ и Министерствэ прививкэр зыпшIыгъэм ыуж илъэсныкъо нахьыбэ тешIагъэ­мэ, джыри пшIыжьын фаеу еIо.

Максим Терскэм иеплъыкIэ къыриIотыкIызэ, цIыфэу зэ коронавирусыкIэр къызэолIагъэхэр джыри зэ сымэджэжьыгъэхэми, вакцинэр зыхязгъэлъхьагъэхэм вирусыр къахэхьагъэми узыр лъэшэу зэрэзэхамышIэрэр, зэримыгъалIэхэрэр статистикэм къызэриушыхьатырэр кIигъэ­тхъыгъ. Ащ къыпкъырыкIызэ, «ревакцинациер» джыдэдэм имыщыкIагъэу ылъытагъ.

Арэу щытми, эпидемиологием ылъэныкъокIэ Iофхэр дэи зыхъукIэ прививкэр кIэпшIыкIыжьымэ зэрэнахьышIур къыхегъэщы. Мы уахътэм Урысые Федерацием Iофхэр щызэтеуцожьыгъэхэу пIон плъэкIыщтэп. Врачым къызэрэкIигъэтхъыгъэм­кIэ, къэралыгъом зыныбжь икъугъэу исым ипроцент 80-мэ вакцинэр зыхалъхьэмэ ары илъэсым зэ нахьыбэ прививкэр тымышIыным тыкъызыфэкIон тлъэкIыщтыр.

Коронавирусыр къеолIэгъагъэу антителахэр мымакIэу зиIэхэм вакцинэр зыхилъхьан ищыкIагъэмэ цIыфхэр бэрэ къыкIэупчIэх. Мы лъэныкъомкIи еплъыкIэхэр зэтекIых. УФ-м псауныгъэм икъэухъумэнкIэ и Министерствэ ащ пае къэмынэу вакцинэр зыхэплъхьан фаеу мызэу, мытIоу къыIуагъ. ШIэныгъэлэжьхэм имыщыкIагъэу зы­Iохэрэр ахэтых.

Максим Терскэм ащ джэуап къыритыжьызэ, сымэджагъэр антителахэм алъыплъэн фаеу, ахэр бэу иIэхэмэ прививкэм ишIын лъигъэкIуатэмэ нахьышIоу ыIуагъ.

«Ревакцинацием» пае вакцинэу къыхэпхымэ нахьышIуми цIыфхэр къыкIэупчIэх. АпэрэмкIэ «Спутник V»-р зыхябгъэлъхьагъэмэ, ятIонэрэмкIэ «КовиВак»-р ябгъэшIымэ сыда хъущтыр?

— «Спутник V»-р цIыфым «иаденавирус» зы­хэлъ вакцинэу «векторнэкIэ» тызаджэхэрэм ащыщ. Арышъ, прививкэ ужым коронавирусым имызакъоу «аденовирусыми» иммунитет фыриIэ мэхъу. Вакцинэр ятIонэрэуи зызщыхяб­гъэлъхьажьырэ уахътэм «аденавирусым» иммунитет джыри фыриIэ зыхъукIэ, а вакцинэ дэдэм икъоу укъымы­ухъумэн ылъэкIыщт. Ащ сыкъыпкъырыкIызэ апэрэмкIэ «Спутник V»-р зыхябгъэлъхьа­гъэмэ, ятIонэрэмкIэ «КовиВак»-р ябгъэшIымэ нахьышIоу сэ­лъытэ, — къыIуагъ Максим Терскэм.

Вакцинэм иIахьитIуи халъхьагъэу ау антителахэр иIэ мыхъу­гъэу къыхэкIы. Ащ фэдэ хъумэ узэрэзекIомэ нахьышIум ыгъэгумэкIырэр бэ. НэмыкI вакцинэ зыхябгъэлъхьан фаеу елъытэ ащ.

КоронавирусыкIэм пэшIуе­кIорэ вакцинэр зыхязыгъалъхьэхэрэм зитемпературэ къыдэкIоягъэхэр, е гущыIэм пае, зышъхьэ узыгъэхэр къахэкIых. Ащ фэдэу прививкэр зэхэзышIагъэхэм «ревакцинацие» ашIы­жьымэ хъущтмэ е зыфагъэхьазырын фаемэ цIыфхэр егъэгумэкIых.

Температурэри, шъхьэузыри, нэмыкIэу прививкэ ужым цIыфым зэхишIэхэрэри узгъэщтэн Iофэу зэрэщымытым, ахэр тхылъэу вакцинэхэм апылъым зэрарытхагъэхэр Максим Терскэм кIегъэтхъы. Пкъышъолъыр аущтэу вакцинэм «пэгъокIы». «Ревакцинацие» зышIымэ зышIоигъохэмкIи ахэр пэрыохъу мыхъухэу ары къызэриIорэр. Ау антителахэр уиIэхэмэ, ахэр зыфэдизхэр апэрапшIэу зэбгъэ­шIэн фаеу зэрилъытэрэм джыри зэ къыкIегъэтхъыжьы.