УФ-м и Президентэу Владимир Путиныр къолъхьэ тын-Iыхыным пэ­шIуекIогъэнымкIэ Лъэпкъ планэу 2021 — 2024-рэ илъэсхэм ателъы­та­гъэм фэгъэхьыгъэ унашъом кIэтхагъ.

Ащ къыдыхэлъытэгъэ Iоф­тхьабзэхэм япхырыщын ыкIи илъэсэу тызхэтым ичъэпыогъу мазэ нэс ищыкIэгъэ зэхъокIыныгъэхэр фэшIыгъэнхэм фе­деральнэ хэбзэ органхэм япащэхэм афигъэзагъ. Къэралы­гъом ипащэ мы пшъэрылъ дэ­дэхэр афишIыгъэх Парламентым ипалатитIумэ, Конституционнэ ыкIи Апшъэрэ хьыкумхэм, Генеральнэ прокуратурэм, хэдзынхэмкIэ Гупчэ комиссием, ЛъытэкIо палатэм, Гупчэ Банкым, СледствиехэмкIэ Комитетым, цIыфхэм яфитыныгъэ­хэр къэухъумэгъэнхэмкIэ Уполномоченнэм ыкIи чIыпIэ зыгъэ­IорышIэжьыпIэ органхэм.

Планыр Iахь 16-у зэхэт. Апэ­рэр къолъхьэ тын-Iыхыным пэшIуекIогъэным пае къэралыгъо къулыкъушIэм ышIэ мы­хъунэу, пшъэрылъэу е гъуна­пкъэу агъэнэфагъэхэм ясистемэ гъэкIэжьыгъэным фэгъэхьыгъ. Ащ тетэу муниципальнэ образованием ипащэ чIыпIэ зыгъэ­IорышIэжьыпIэ органым е учреждениеу а муниципальнэ об­разованием хахьэрэм ипэщэ IэнатIи зэрэдигъэцакIэрэм Правительствэр хэплъэжьыщт.

Джащ фэдэу къэралыгъо къулыкъушIэхэм хахъоу яIэр, ямылъку зыфэдизыр, ар зэрагъэфедэрэр къызэрагъэлъэ­гъощтым шапхъэу пылъхэр гъэ­кIэжьыгъэнхэмкIэ предложениехэр чъэпыогъум и 15-м нэс къагъэхьазырынхэ фае, шIухьафтынхэр къызэрафашIыхэрэми хэплъэжьыщтых.

Шъолъырхэм язаконихъухьэ зэIукIэхэм ядепутатхэм къолъхьэ тын-Iыхын Iоф горэм хэлэжьэнхэу закъыфагъэзагъэмэ, ащ къэралыгъо органхэр ща­гъэгъозэнхэу пшъэрылъ афэшIыгъэнымкIэ предложениехэри УФ-м и Генеральнэ прокуратурэ къыхагъэлажьэзэ 2022-рэ илъэсым имэкъуогъу и 10-м нэс къагъэхьазырынхэу планым щы­гъэнэфагъ.

Зэпахырэ узхэм, коронавиру­сыкIэри зэрахэтэу, замыу­шъомбгъуным фытегъэпсыхьэгъэ Iоф­тхьабзэхэм, лъэпкъ проектхэм япхырыщын апае къэра­лыгъом ахъщэу къытIупщырэр нэмыкI лъэныкъо пэIуамыгъэ­хьаным епхыгъэу зэшIохыгъэ хъущтхэри къыдыхэлъытагъэх.