Коронавирусым пэшIуекIорэ вакцинэхэм яхэлъхьан епхыгъэ упчIабэ шъолъыр гъэIорышIэнымкIэ Гупчэм испециалистхэм къаIэкIэхьэ.

Адыгэ Республикэм псау­ныгъэр къэухъумэгъэнымкIэ и Министерствэ къызэритыгъэмкIэ, вакцинэу «Спутник Лайт» зыфиIорэм ихэлъхьэгъу мин 11,5-рэ шъолъырым къыфа­тIупщыгъ.

Мы мафэхэм яхъулIэу ко­видым пэшIуекIорэ вакцинэм иапэрэ Iахь — нэбгырэ 100164-мэ, ятIонэрэр — нэбгырэ 79727-мэ ахалъхьагъ.

Адыгэ республикэ клиническэ сымэджэщым иврач шъхьа­Iэу Чэужъ Нателлэ къызэри­IуагъэмкIэ, эпидемием ыкIи пан­демием ялъэхъан узхэм апэшIуекIогъэным пае цIыфхэм коллективнэ иммунитеть яIэн фае.

— Зэпахырэ узым пэуцу­жьыгъэным фэшI вакцинациер пкIуныр непэ нахь тэрэзэу ыкIи щынэгъончъэу зэрэщытыр дэгъоу къыдгурэIо. Проценти 100-м нэсэу ащ укъыухъумэрэп, ау ковидыр къызпыхьэгъэ цIыфым антителахэр иIэщтых, узым нахь псынкIэу фырикъун ылъэ­кIыщт. БлэкIыгъэ илъэсым чъэ­пыогъум коронавирусым пневмониер игъусэу сэри къысэузы­гъэх, тхьабылхэми тIэкIу анэсы­гъагъ. Тхьамэфищрэ сысымэ­джагъ. БэмышIэу вакцинэр зы-хязгъэлъхьагъ. Антителахэр си­Iэх нахь мышIэми, ахэм япчъа­гъэ нахьыбэ сшIыным пае мыщ фэдэ лъэбэкъу сшIыгъэ. ЯтIо­нэрэу сысымэджэнэу сыфаеп, — къыIуагъ Чэужъ Нателлэ.