Мыекъопэ къэлэ администрацием щыкIогъэ зэхэсыгъом кIымафэм коммунальнэ фэIо-фашIэхэр цIыфхэм икъоу афэгъэцэ­кIэгъэнхэм изыфэгъэхьазырын щытегущыIагъэх.

Анахьэу анаIэ зытыра­дзагъэр икIыгъэ илъэсым фабэр икъоу зыIэкIамыгъэхьэгъэ псэуалъэхэм язытет.

Iоныгъо мазэм икъи­хьа­гъу ехъулIэу къалэм игъэ­фэбапIэхэм ачIэтхэ котел­хэр, насосхэр, псыр ­икъоу аIэкIахьэмэ, фабэм щымы­кIэщтхэмэ ауплъэ­кIун­хэу ЖКХ-м икъулы­къу­шIэхэм пшъэрылъ афа­гъэуцугъ. КIымафэм икъоу фэмы­хьазырхэм Iоф ашIэ­нэу паспортхэр къара­тыщтхэп.

Къат пчъагъэу зэтет унэ­хэри кIымафэм зэ­рэ­фагъэхьазырыщтхэм те­гущыIагъэх. Мыекъуапэ изакъоу ащ фэдэ унэ 500-м ехъу дэт. Адыгэ Республикэм икъэралыгъо псэупIэ инспекцие ипащэу Иона Кравцовам къызэриIуагъэмкIэ, унэ зэхэтхэр зэпхыгъэхэ гъэ­IорышIапIэхэм игъом ахэм пас­портхэр къафыдамы­хы­хэмэ, административнэ пшъэдэкIыжь арагъэ­хьыщт.

ЦIыфхэм япсэупIэхэр къагъэфабэхэу зырагъэ­жьэщт пIалъэри агу къагъэкIыжьыгъ. Урысые Фе­­дерацием и Прави­тельствэ иунашъо къызэ­рэщиIоу, унэхэр къагъэфа­бэхэу зырагъэжьэнхэ фаер фабэр градуси 8-м емыхъоу мэфитфэ зиIыгъыкIэ ары.