Республикэм коронавирусыр къызэутэкIырэ цIыфхэм япчъагъэ хэпшIыкIэу зэрэщыхахъорэм къыхэкIэу хьакIэу къакIохэрэми зэрапэгъокIыщтхэ шIыкIэр зэблахъугъ.

ЗыгъэпсэфакIохэм Адыгеир къызэ­рэхахырэр тигуапэ, ау коронавирусыр къызэузыгъэхэр ахэм ахэмытынхэм лъыплъэгъэн фае. Мы лъэхъаным хьа­кIэщхэм къякIолIэрэ цIыфхэм зэпа­хырэ узым пэшIуекIорэ вакцинэр зэрэзыхарагъэлъхьагъэр е ПЦР-тест зэра­кIугъэр къэзыушыхьатырэ справкэхэр ямыIэхэмэ, чIагъэхьащтхэп. Зыныбжь илъэс 16 мыхъугъэхэм ащ фэдэ документхэр ящыкIагъэхэп.

Ащ фэшъхьафэу бэдзэогъум и 13-м къыщегъэжьагъэу Адыгеим пандемием пэуцужьыгъэнымкIэ республикэ оперативнэ штабым иунашъо цIыф жъу­гъэхэр къызэкIуалIэхэрэ спортивнэ зэнэкъокъухэр, джэгухэр, мэфэкIхэр амышIынхэу къыщеIо.

Бэдзэогъум и 19-м къыщегъэжьагъэу шхапIэхэм, фитнес-гупчэхэм, парикмахерскэхэм, тучанхэм Iоф ащызышIэхэрэм вакцинэ зэрахалъхьагъэр е ковидыр къызяутэкIыгъэр илъэсныкъо зэрэ­хъугъэр къэзыушыхьатырэ тхылъхэр аIыгъынхэу афагъэпытагъ.