Мэзхэм машIом закъыщимыштэным тегъэпсыхьэгъэ Iоф­тхьабзэ мы мафэхэм республикэм щызэхащагъ.

МашIор щынэгъончъэным ылъэныкъокIэ шап­хъэхэр зыукъохэрэр къы­хэгъэщыгъэныр ары пшъэ­рылъ шъхьаIэр.

Iофтхьабзэм хэлэжьагъэх мэзым ыкIи машIом алъыплъэгъэнымкIэ федеральнэ къэралыгъо лIыкIохэр, АР-м мэзхэмкIэ и ГъэIорышIапIэ, Урысыем хэгъэгу кIоцI IофхэмкIэ и Министерствэ иотделэу Мыекъопэ районым щыIэр, нэмыкIхэри.

УплъэкIунхэр Дахъо ыкIи ХъымыщкIэй мэз­хъызмэтшIапIэм ащыкIуагъэх. Iофтхьабзэм къыды­хэлъытагъэу, мы чIыпIэ­хэм ащыпсэухэрэм, къякIолIэгъэ хьакIэхэм гущы­Iэгъу афэхъугъэх. МашIом зыкъымыIэтыным фэшI пшIэн фаехэр ыкIи чIыпIэ щынагъохэм машIо ащы­пшIы зэрэмы­хъущтыр ара­Iуагъ.

АР-м мэзхэмкIэ и Гъэ­IорышIапIэ къызэрэщаIуагъэмкIэ, рейдыр рекIокIы­фэкIэ машIом ылъэны­къокIэ шапхъэхэм адимы­штэу зекIуагъэу зи агъэу­нэфыгъэп.

ДЕЛЭКЪО Анет.