Ащ фэдэ упчIэ къыщегъэуцу поселкэу Инэм щыпсэурэ Хьагъур Дарихъанэ итхыгъэу бэмышIэу редакцием къы­IукIагъэм. Ар зыфэгъэхьыгъэр «Адыгэ макъэм» зитхы­гъэхэр къихьэхэрэ, гъэзетеджабэхэм агу рихьырэ Хьа­хъурэтэ Светлан ары.Дарихъанэ «Адыгэ ма­къэм» бэшIагъэ зеджэрэр, зылъыплъэрэр. «Еджа­пIэм сычIэсыгъ мы гъэзетым сянэжъ сыкъыфеджэ зэ­хъум. Джащ къыщегъэжьагъэу гъэзетыр шIу сэлъэгъу, нэмыкI пстэуми анахь дэгъоу ар сэлъытэ» — къетхы ащ.

БэшIагъэу гъэзетым еджэу, ащ лъыплъэрэ пэпчъ ежь ыгу рихьырэ авторхэр иIэхэ мэхъу, гъэзетыр къызыIукIэкIэ ахэм ятхыгъэхэм алъэхъу. Джащ фэдэу мы бзылъфыгъэми гъэзетым къатхэхэрэм къахегъэщы Хьа­хъурэтэ Светланэу адыгэ­бзэ жэбзэ дахэкIэ зи­тхыгъэхэр, зистатьяхэр «Адыгэ макъэм» къихьэ­хэрэр. «Ахэм шъхьэу яIэм щегъэжьагъэу уагъэгу­пшысэ, къытхырэр зы­фэгъэхьыгъэр сурэтэу уапашъхьэ къырегъэуцо», — еIо гъэзетеджэм ыкIи къыкIегъэтхъы ахэм цIыф­хэр зэратегущыIэхэрэр. Ау Дарихъанэ мы бзы­лъфыгъэм фэгъэхьыгъэу зыпари ышIэрэп, ары «кIэлэегъаджа, журналис­та, тхакIуа?» ыIозэ къыз­фэупчIэрэр.

Хьахъурэтэ Светланэ тэ тиIофшIэгъоу Хьагъур (Iэшъынэ) Сусанэ гущы­Iэгъу фэхъуи, 2020-рэ илъэсым, мэзаем и 1-м тигъэзет ащ фэгъэхьыгъэ тхыгъэ къыригъэхьэгъагъ. КIо, Дарихъанэ ар ымы­лъэгъугъэнкIи, IэкIэкIы­гъэнкIи хъун. Тэ непэ къэт­Iон тлъэкIыщтыр ­илъэс 50-рэ культурэм Светланэ зэрэщылэжьагъэр, тхылъеджапIэм Iоф зэрэщишIагъэр ары. Адыгэ Респуб­ликэм культурэмкIэ изаслуженнэ IофышI, IофшIэным иветеран, ведомст- вэ зэфэшъхьафхэм ятын лъа­пIэхэр къэзылэжьыгъэ бзылъфыгъэ чан Светланэ.

Хьахъурэтэ Светланэ ытхыгъэ тхылъэу «Трижды рожденный» зыфиIорэр Дарихъанэ тхылъеджапIэхэм зэрачIимыгъота­гъэр лъэшэу ыгу къеоу къетхы. Ащ фэгъэхьыгъэу къэтIон тлъэкIыщтыр ти­IофшIэгъу гущыIэгъу Светланэ зыфэхъу лъэхъаным тхылъыр ащ зэриухыгъагъэр, ау къыхиутын зэ­римылъэкIыгъагъэр ары. Шъыпкъэр пIощтмэ, нэ­ужым ащ къырыкIуагъэм тыщыгъуазэп.

КIэухым къыхэдгъэхъо­жьы тшIоигъу мыщ фэдэ лъэхъэнэ мыпсынкIэм лъэпкъ гъэзетыр зыщы­мыгъупшэу, ащ илъэс пчъа­гъэхэм къакIоцI фэшъыпкъэхэм тазэрафэра­зэр. Шъопсэу, шъотхъэжь!

ЖакIэмыкъо Аминэт.