Мыекъуапэ икIэу ТIуапсэ кIорэ гъогум иIахьэу Мыекъо­пэ районыр зэпызычырэр мы илъэсым Адыгеим щагъэ­цэ­кIэжьынэу агъэнэфагъэхэм анахь кIыхь. Охътэ бла­гъэм ащ IофшIэнхэр зэрэщырагъэжьэщтхэм ишыхьат тамы­гъэ­хэр гъогушIхэм агъэуцугъэх. Автомобильнэ гъогухэм я ГъэIорышIапIэу «Адыгея­автодорым» зэнэкъокъу­хэр зызэхещэхэм 2022-рэ илъэсым имэлылъфэгъу мазэ нэс ащ изэтегъэ-псы­хьажьын аухын фаеу пIалъэ къыгъэуцугъ. Гъогур ышIынэу текIоныгъэр къыдэзыхыгъэ «Мыекъопэ ДРСУ»-м мы илъэсым иIоныгъо мазэ ыкIэм нэс ыухынэу ары къызэри­гъэгугъэрэр.

Мы автомобильнэ гъогум иIахьэу Мыекъуапэ идэкIыгъо щегъэжьагъэу поселкэу Краснооктябрьскэр зэпызычырэр лъэпкъ проектым къыдыхэлъы­та­гъэу 2020-рэ илъэсым агъэцэкIэжьыгъ. КъыкIэлъыкIорэ Iахьэу агъэкIэ­жьыщтыр гъогухэм язытет ауплъэкIузэ къыхахыгъ, Мыекъуапэ къэзыухьэрэ гъогукIэу ашIырэр «Майкоп — Туапсе» зыфиIорэ трассэм къызщыхэхьащтым пэмычыжьэу ар щежьэ.

Подрядчикым гъогу ­гъу­нэхэр ыгъэкъэбзэщтых, мыжъо жъгъэй атыритэ­къощт, чъыгхэу Iутхэм апыупкIыхьащт, автомобильхэр зэрыкIохэрэм ас­фальт тырилъхьащт, тамыгъэхэр ыгъэуцущтых.

«Мыекъопэ ДРСУ»-р апэрэп лъэпкъ проектым къыдыхэлъытэгъэ Iоф­шIэнхэм язэшIохын зэрэ­хэлажьэрэр. Лъэхъаным ди­штэрэ техникэ дэгъоу иIэм, яIофшIэн хэшIыкI ин фызиIэ специалистхэм яшIуагъэкIэ сыд фэдэрэ Iофи зэшIуихын ылъэ­кIы­нэу ар щыт.

Мы гъогур ыгъэфедэзэ Хы шIуцIэ Iушъо лъэны­къом кIохэрэ водительхэм гъэцэкIэжьын IофшIэнхэр зэрэщыкIохэрэр къыда­лъы­тэзэ, сакъыныгъэ къыз­ха­гъэфэнэу тыкъялъэIу.