Адыгеим и ЛIышъхьэу КъумпIыл Муратрэ НыбжьыкIэхэм я Урысые Союз (РСМ) итхьаматэу Павел Красноруцкэмрэ Адыгэ Республикэм и Правительствэ зычIэт Унэм тыгъуасэ зэIукIэгъу щызэдыряIагъ.

ЗэдэгущыIэгъум хэлэжьагъэх Адыгэ Республикэм гъэсэны­гъэмрэ шIэныгъэмрэкIэ иминистрэу КIэрэщэ Анзаур, Адыгэ Республикэм гъэсэныгъэмрэ шIэныгъэмрэкIэ и Министерствэ кIэлэцIыкIухэм ыкIи ныбжьыкIэхэм япIункIэ къэралыгъо политикэм ипхырыщын фэгъэзэгъэ ГъэIорышIапIэм ипащэу Нэгырэкъо Алый, джащ фэдэу РСМ-м и Адыгэ шъолъыр къутамэ хэтхэр.

ЗэIукIэгъум илъэхъан анахьэу зытегущыIагъэхэр ныбжьыкIэ объединениехэм яхэхъоныгъэ иIо­фыгъохэр ары, РСМ-мрэ ­Адыгэ Республикэм и Правительствэрэ азыфагу илъыщт зэдэлэжьэныгъэм ехьылIэгъэ зэзэгъы­ныгъэм кIэтхагъэх. Мыщ фэдэ лъэныкъохэмкIэ язэдэлэжьэныгъэ лъа­гъэкIотэщт: патриотическэ пIуныгъэр; ныбжьыкIэ твор­чествэм IэпыIэгъу етыгъэныр; ныб­жьыкIэхэр социальнэ по­литикэм хэгъэлэжьэгъэнхэр, со­циальнэ Iофтхьабзэхэм ныбжьыкIэхэр кIэщакIо афэхъунхэр; ныбжьыкIэхэм кадрэхэм алъэныкъокIэ яшIэныгъэ хэгъэхъогъэныр; дунэе ныбжьыкIэ зэдэ­лэжьэныгъэм зегъэушъомбгъугъэныр; хэгъэгу кIоцI ныбжьыкIэ творчествэм хэхъоныгъэ егъэшIыгъэныр; ныбжьыкIэхэм ясэнэхьаткIэ IофшIэн ягъэгъоты­гъэным анаIэ тырагъэтыныр; къэлэ цIыкIухэмрэ псэупIэхэмрэ адэс ныбжьыкIэхэм IэпыIэгъу ятыгъэныр.

Адыгеим и ЛIышъхьэ къызэ­рэхигъэщыгъэмкIэ, Урысые Фе­дерацием и Президентэу Владимир Путиным ныбжьыкIэ­хэм — тихэгъэгу инеущрэ мафэ зэлъытыгъэхэм — IэпыIэгъу ятыгъэным иIофыгъохэм лъэшэу ынаIэ атырегъэты. Адыгеим ныбжьыкIэ политикэмкIэ пшъэ­рылъхэу иIэхэм язэшIохынкIэ РСМ-м зэдэлэжьэныгъэ пытэ дытиIэным къыдыхэлъытагъэу мы зэзэгъыныгъэм кIэтхагъэх.

«РСМ-м бэшIагъэ лъэныкъо зэфэшъхьафхэмкIэ тызыдэла­жьэрэр. Пандемием илъэхъан ныбжьыкIабэ волонтер движением хэлэжьагъ, IэпыIэгъу зищыкIэгъабэмэ яшIуагъэ арагъэ­кIыгъ. ТапэкIи ныбжьыкIэхэм къырахьыжьэрэ Iофтхьа­бзэхэм IэпыIэгъу тафэхъуным пае РСМ-м зэдэлэжьэныгъэ дытиIэным тынаIэ тедгъэтыщт. ЗэкIэми гухэлъэу тиIэр зы: ти­ныбжьыкIэхэм яIофыгъо шъхьа­Iэхэм язэшIохынкIэ общест­вэм­рэ хабзэмрэ язэдэлэжьэныгъэ нахь гъэпытэгъэныр ары», — къыIуагъ КъумпIыл Мурат.

НыбжьыкIэ движением Iэпы­Iэгъу зэрэфэхъурэм пае Адыге­им и ЛIышъхьэ зэрэфэразэр къыхигъэщыгъ Павел Красноруцкэм. Ащ дакIоу РСМ-м ифир­меннэ тамыгъэ къыритыгъ, Адыгэ шъолъыр къутамэр хэ­гъэ­гумкIэ анахь чанхэм зыкIэ зэращыщыр къыхигъэщыгъ.

РСМ-м итхьаматэ организацием непэкIэ Iофэу ышIэрэм ыкIи къыпыщылъхэм афэгъэ­хьыгъэу къыIотагъ. Ащ къызэ­рэхигъэщыгъэмкIэ, яхэгъэгу шIу алъэгъоу, ащ фэшъыпкъэхэу ныбжьыкIэхэр пIугъэнхэмкIэ, творческэ амалхэу яIэхэм зы­къызэIуахынымкIэ IофшIэныр дэгъоу гъэцэкIагъэ мэхъу. НыбжьыкIэ туризмэм зегъэушъом­бгъугъэным непэ хэушъхьа­фыкIыгъэ мэхьанэ иIэ хъугъэ. Мыщ­кIэ Адыгеим пэрыт чIыпIэхэр ыубытынхэ ылъэкIыщт.

«Джыри мэхьанэшхо зиIэ лъэ­­ныкъохэм зыкIэ ащыщым — СПО-м студент организа­цие­хэм Iофэу адашIэрэм фэ­гъэ­хьыгъэм сыкъытегущыIэщт. Кол­ледж, апшъэрэ еджапIэ пэпчъ командэхэр ащызэхэщэгъэнхэ фае. Зэхэубытагъэу къэп­Iон хъумэ, нахь нэфэгъэ икъу хэлъэу Iоф­шIэныр зэхэщэгъэн, къэлэ цIыкIухэмрэ къоджэ псэу­пIэхэмрэ яныбжьыкIэхэр нахь игъэкIо­тыгъэу тиIофтхьабзэхэм къа­хэдгъэлэжьэнхэ фае», — къы­Iуагъ Павел Красноруцкэм.

Адыгэ Республикэм и ЛIы­шъхьэ къызэрэхигъэщыгъэмкIэ, республикэм ихабзэ икъулы­къухэр хьазырых ныбжьыкIэхэм IэпыIэгъу афэхъунхэу, шIуагъэ къэзытыщт Iофтхьабзэхэу ахэм къырахьыжьэхэрэр щыIэныгъэм пхыращынхэмкIэ амал арагъэ­гъотынэу. РСМ-р ащ фэдэ зэ­дэлэжьэныгъэмкIэ амалышIоу щыт.

Урысые общественнэ органи­зациеу «НыбжьыкIэхэм я Уры­сые Союз» зыфиIорэм и Адыгэ шъолъыр къутамэ итхьаматэу Мыгу Бислъан къызэриIуагъэмкIэ, РСМ-м хэтхэм илъэс къэс Iофтхьэбзэ зэфэшъхьаф 40-м ехъу Адыгеим щызэхащэ. Ана­хьэу анаIэ зытырагъэтхэрэм ащыщ волонтерствэр, вакцинацием изэхэщэнкIэ IэпыIэгъу ятыгъэныр, коронавируснэ инфекцием пэшIуекIорэ бэнэныгъэмкIэ яшIуагъэ къагъэкIоныр.

Адыгэ Республикэм и ЛIы­шъхьэ иIэпыIэгъу хэлъэу зэшIуа­хыхэрэ проект шъхьаIэхэм зы­кIэ ащыщ гъэсэныгъэм епхыгъэ шъолъыр форумэу «Фыщт» зыфиIорэр. Мы илъэсым а Iоф­тхьабзэр зы мафэ зэрэкIощтыр ыкIи Рыфабгъо ипсыкъефэхыпIэхэм яIэгъо-блэгъу щыре­кIо­кIыщт. НэмыкI проект инхэм ащыщых гъэсэныгъэ зыщара­гъэгъотырэ профессиональнэ ор­ганизациехэм яфорумэу «Ошъу­тенэр», ныбжьыкIэхэм яслетэу «Нартыр», фестивальхэу «Студент года в РА», «Этно­мода» зыфиIохэрэр, Адыгэ Республикэм иныбжьыкIэхэм я Кубок ыкIи нэмыкIхэр.

Адыгеим и ЛIышъхьэ ныбжьы­кIэхэм закъыфигъазэзэ къы­Iуагъ гъэпсын Iофхэм япхыгъэ Iофыгъохэм язэшIохынкIэ нахь чаныгъэ къызхагъэфэнэу, цIыфхэм ашIогъэшIэгъоныщт предложениехэр къахьынхэу, мыщ къыхеубытэх цIыф псэупIэхэр зэтегъэпсыхьэгъэнхэр ыкIи на­хьыбэу чъыгхэмрэ къэгъагъэ­хэмрэ ащыгъэтIысхьэгъэнхэр.

ИкIэухым Адыгеим и ЛIышъхьэ Адыгэ Республикэм гъэсэныгъэмрэ шIэныгъэмрэкIэ ими­нистрэ пшъэрылъ фишIыгъ нахь чаныгъэ къызхэзгъэфэрэ ныбжьыкIэхэр зэрэкIагъэгушIущтхэм егупшысэнэу. Волонтер, общест­веннэ IофшIэнхэмкIэ анахь чанхэр къыхэгъэщыгъэнхэм мэхьэ­нэ гъэнэфагъэ иIэу щыт, сыда пIомэ ныбжьыкIэхэм Iоф­шIапIэ агъотынымкIэ а пстэуми етIанэ яшIуагъэ къэкIощт. РСМ-м дыряIэщт зэдэлэжьэныгъэм фэ­гъэхьыгъэ зэзэгъыныгъэр щы­Iэныгъэм зэрэпхыращыщтым епхыгъэ пшъэрылъ заулэхэр ми­нистерствэхэм афа­шIыщтых.

АР-м и ЛIышъхьэ ипресс-къулыкъу