Физкультурникым и Мафэ фэгъэхьыгъэу кушъхьэфэчъэ спортымкIэ зэIукIэгъухэр Мые­къуапэ щыкIуагъэх.

Урысыем иполитическэ партиеу «Единэ Россиер» яIэпыIэгъоу Iофтхьабзэр зэхащагъ. Адыгэ Республикэм физкультурэмкIэ ыкIи спортымкIэ и Комитет, республикэм кушъхьэ­фэчъэ спортымкIэ иеджапIэ, нэмыкIхэри зэхахьэм чанэу хэ­лэжьагъэх.

Адыгэ Республикэм и ЛIы­шъхьэу КъумпIыл Мурат спорт зэхахьэм хэлажьэхэрэм къа­фэгушIуагъ, мэфэкIыр дэгъоу агъэ­кIонэу афиIуагъ.

Республикэм иминистрэхэм я Кабинет хэтхэр, Парламентым идепутатхэр, спортым пылъхэр, студентхэр, Адыгеим щыпсэу­хэрэр мэфэкIым зэфищагъэх.

Урысыем и Къэралыгъо Думэ идепутатэу, дунаим сам­бэмкIэ гъогогъу 11 дышъэр къыщыдэзы­хыгъэ Хьасанэкъо Мурат зэ­нэ­къокъур рагъэжьэнэу физкультурникхэм, спортсменхэм къяджагъ.

Мыекъуапэ иурамхэм къе­кIо­кIыгъуи 8 ащашIынэу, ар ки­ло­метрэ 20 мэхъу, ежьагъэхэм тяплъышъ, тэгушIо. Адыгэ Рес­публикэм и ЛIышъхьэу Къум- пIыл Мурат, Правительствэмрэ Парламентымрэ якъулыкъушIэ­хэр, спортсменхэр зэхэтхэу урамхэм арэкIох.

Мыекъопэ гандбол клубэу «Адыиф-2»-м итренер шъхьаIэу, Урысыем ихэшыпыкIыгъэ коман­дэ хэтэу тыжьыныр, нэмыкI ме­дальхэр дунаим къыщызыхьыгъэ Яна Усковар, нэмыкIхэри зэIукIэгъум хэлажьэх. А уахътэм Урысыем щызэлъашIэрэ спорт журналистэу Андрей Кондрашовыр Адыгеим кушъхьэфэчъэ спортымкIэ итарихъ, игъэхъа­гъэхэм къатегущыIэ.

Кушъхьэфэчъэ спортымкIэ Урысыем и Федерацие ипре­зидентэу Анатолий Лелюк, ти­спортсменхэм, тренерхэм яшIу­шIагъэ А. Кондрашовым тащегъэгъуазэ.

Баскетбол командэу «Динамо-МГТУ-м» итренер шъхьаIэу, спорт Унэшхоу «Ошъутенэм» ипащэ иIэнатIэ зыгъэцэкIэрэ Къулэ Руслъан, нэмыкIхэу зэха­хьэм хэлажьэхэрэм кушъхьэ­фэчъэ спортыр агу рехьы.

Гандбол клубэу «Адыифым» итренерэу, спортымкIэ дунэе класс зиIэ мастерэу Эльвира Ищенкэр командэм иныбжьыкIэхэм ахэт. Кушъхьэфэчъэ спор­тым цIыфхэр зэрэзэфищэхэрэм, псауныгъэр зэригъэпытэрэм Э. Ищенкэм иеплъыкIэхэр къыриIолIагъэх.

Километрэ 20-р къызакIум, зэхэщакIохэм къыхагъэщыгъэ­хэр, шIухьафтынэу спорт шъуа­шэхэр зэратыгъэхэр бэ хъугъэх.

АнахьыкIэхэм ащыщэу, мэфи­тIукIэ узэкIэIэбэжьмэ илъэс 14 хъугъэ Дарья Хоружаям, ана­хьыжъхэм ащыщэу, илъэс 75-м ыныбжь ехъугъ, Анатолий Зуевым, кушъхьэфэчъэ анахь дахэм тесыгъэ Лилия Шаховам, спорт унагъоу Руслан ыкIи Марина Худаловхэм, нэмыкIхэм шIухьафтынхэр афашIыгъэх.

— МэфэкI зэхахьэр шIукIэ сыгу къэкIыжьыщт, — къыти­Iуагъ медицинэм иIофышIэу Руслан Худаловым.

Адыгэ Республикэм и ЛIы­шъхьэу КъумпIыл Мурат журналистхэм гущыIэгъу афэхъугъ.

— ЦIыфхэм ягушъхьэ кIуачIэ, япсауныгъэ агъэпытэнымкIэ, физ­культурэм пыщагъэхэм япчъагъэ хэхъонымкIэ кушъхьэ­фэчъэ спортым мэхьэнэ ин иI. Зэхахьэр дэгъоу кIуагъэ, хэлэ­жьагъэхэм тафэраз, — къы­тиIуагъ КъумпIыл Мурат.

Зэхахьэм адыгэ, урыс орэдхэр щагъэжъынчыгъэх, лъэпкъ зэфэшъхьафхэр щызэIукIагъэх. Физкультурэмрэ спортымрэ апыщагъэхэм япчъагъэ илъэс къэс зэрэхахъорэм тегъэгушхо.

ЕмтIылъ Нурбый. Сурэтыр А. Гусевым тыри­хыгъ.