УФ-м и Президентэу Владимир Путиныр Джэпсалъэу мэлылъфэгъу мазэм къызэджагъэм зигугъу къыщишIыгъагъэхэм ащыщ шъолъырхэм яинфраструктурэ изегъэушъомбгъун.

Автомобильнэ гъогухэм, нэмыкIэу транспортым епхыгъэ псэуалъэхэм яшIын, псэу­пIэ-коммунальнэ хъызмэтым исистемэ игъэкIэжьын, нэмыкI лъэныкъоу къалэхэмрэ къуа­джэхэмрэ ящы­IакIэ нахьышIу зышIыщтхэр ары къэралыгъом ипащэ зыфиIуагъэр.

— Инфраструктурэм мылъкоу хахьэрэр шъолъырхэм хэ­хъоныгъэхэр ашIынхэм, унэе бизнесыри нахьыбэу ащ къы­хэлэжьэным афэIорышIэн фае. Арышъ, ащ фэдэ инвестициеу пIэлъэ кIыхьэ зыпылъхэм яхэлъхьан ылъэныкъокIэ шIыкIа­кIэхэм ягупшысэгъэн фае. ГущыIэм пае, фэгъэкIотэнхэр зи­Iэу, процент макIэ зытехъорэ «инфраструктурнэ бюджет кредитхэр». Ахэр шъо­лъырхэм къызIэкIагъэхьанхэ алъэкIынэу шIыгъэн фае, — къыIуагъ Владимир Путиным нэужыми а Iофым къыфигъэзэжьызэ.

АмалыкIэхэр субъектхэм агъэ­федэнхэ алъэкIыным пае чIыфэу атегъэуагъэр атехыгъэ­нэу, коммерческэ кредитышхо­хэр бюджет кредитхэмкIэ афызэблэхъугъэнхэу, ащ фэдэу блэ­кIыгъэ илъэсым аратыгъагъэхэри къафыкIалъытыкIыжьынхэу Джэпсалъэм унашъоу къы­щи­шIыгъэхэр пхырыщыгъэ зэрэ­хъухэрэм фэгъэхьыгъэ зэхэсыгъохэм ащыщ щырахъухьагъ.

— 2024-рэ илъэсым нэс «инфраструктурнэ кредитэу» проектхэм апэIухьагъэр сомэ миллиард 500-м къыщыкIэнэу щытэп. Ащ фэдэ проектэу къэралыгъомрэ унэе бизнесымрэ зыхэлэжьэщтхэр Прави­тельствэм къегъэхьазырых, — къыIуагъ къэралыгъом ипащэ.

Инфраструктурэм изегъэу­шъомбгъун фытегъэпсыхьэгъэ проектхэм япхырыщынкIэ шъо­лъырхэм IэпыIэгъу афэ­хъунэу Правительствэм фигъэпытагъ.