Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу мы илъэсымкIэ къэралыгъом щызэшIуахын фэягъэм ызыныкъор гъэцэкIагъэ хъугъэ.

Шъолъырхэу ащ хэлажьэхэрэм пстэумкIи квадратнэ метрэ миллион 67-рэ асфальт ащытыралъхьагъ. Ар агъэнэфагъэм ипроцент 50 мэхъу. Белгородскэ хэкумрэ Ингуш Республикэмрэ IофшIэнхэр ащаухыгъэх, Орловскэ, Пензенскэ ыкIи Курскэ хэкухэм, Краснодар краим, республикэхэу Къырым ыкIи Марий Эл гъунэм ащырафылIагъэх.

Федеральнэ проектэу «Региональная и местная дорожная сеть» зыфиIорэм къыдыхэлъытагъэуи Iофышхо субъектхэм ащызэшIуахы. ГущыIэм пае, мы илъэсым объект мини 5,7-рэ шапхъэхэм адиштэу гъэпсыгъэ­нэу ащ щыгъэнэфагъ. Ахэм ащыщэу 42-р кIэу ашIыщт, 101-р икIэрыкIэу ашIыжьыщт, шъо­лъыр, муниципальнэ ыкIи чIыпIэ гъогухэм яIахьхэу 334-рэ агъэ­кIэжьыщт, мини 4,6-р агъэцэ­кIэжьыщт. Асфальт зытыралъхьащтыр зэкIэмкIи квадратнэ метрэ миллиони 132-м ехъу. ПстэумкIи гъогу километрэ мин 16 фэдиз Урысые Федерацием исубъект 84-мэ мы илъэсым ащызэтырагъэпсыхьажьыщт.

Федеральнэ мэхьанэ зиIэ гъогухэм ащызэшIуахыщтхэри 2021-рэ илъэс планхэм ахагъэ­хьагъ. ПроектыкIэу «Развитие федеральной магистральной сети» зыфиIорэм ишIуагъэкIэ чIыпIи 128-рэ ащ фэдэ гъогу­хэм ащагъэцэкIэжьыщт.

Автомобильхэр зэрыкIохэрэр зэрагъэкIэжьхэрэм имызакъоу, щынэгъончъэу щытынхэми анаIэ тет. Лъэпкъ проектым къыдыхэ­лъытагъэу 2021-рэ илъэсым гъогу тамыгъэ мин 291-рэ агъэ­уцущт, автомобиль ыкIи лъэс­рыкIо гъогухэр зэхэзыушъхьафыкIырэ псэолъэ метрэ миллионрэ мин 600-м ехъу ашIыщт, светофор мини 2-м ехъу, электричествэм икIуапIэхэм апае пкъэу метрэ 1321-рэ агъэ­уцущт. Джащ фэдэу лъэсрыкIо гъогу метрэ миллионрэ мин 500-рэ агъэпсыщт.

Федеральнэ проектэу «Модернизация пассажирского транспорта в городских агломерациях» зыфиIорэм къыды­хэлъытагъэу цIыфхэр зезыщэрэ къэлэ транспортым игъэкIэ­жьынкIэ Iофтхьэбзэ зэфэшъхьафхэр агъэнэфагъэх. Мы лъэныкъом фэгъэзагъэхэ хъыз­мэтшIапIэхэм лизингыр зыщыгъэфедэгъэ федеральнэ Iэпы­Iэгъу аратыщт. ТранспортыкIэм ыуасэ процент 60 къыщыгъэкIагъэу къызIэкIагъэхьан амал аратыныр ары ащ къикIырэр.

2021-рэ илъэсым транспортыкIэ зыфэкIощт къэлэ 13 зэнэ­къокъу шIыкIэм тетэу къыха­хыгъ. Ахэм автобус 305-рэ, троллейбуси 107-рэ афатIупщынэу ары зэрэщытыр, 336-р аратыгъах.

«Щынэгъончъэ ыкIи шэпхъэ­шIухэм адиштэрэ гъогухэр» зыфиIорэ лъэпкъ проектым къыдыхэлъытэгъэ Iофтхьабзэхэм мы илъэсым сомэ миллиард 555,67-рэ апэIуа­гъэхьанэу агъэ­нэфагъ.