Урысые Федерацием ибзы­лъ­фыгъэхэм кушъхьэфэчъэ спор­тымкIэ язэнэкъокъу Адыгэ Рес­публикэм шышъхьэIум и 10 — 14-м щыкIуагъ.

Едзыгъуи 5-м яIэпэIэсэныгъэ къыщагъэлъэгъуагъ, километрэ 500-м нахьыбэ къызэранэкIыгъ. Адыгэ Республикэм кушъхьэ­фэчъэ спортымкIэ иеджапIэ зыщызыгъэ­сэрэ Елизавета Арчебасовам шъхьэзэкъо зэнэкъокъум ящэнэрэ чIыпIэр къыщыдихыгъ, Урысыем спортымкIэ имастер хъугъэ.

Самарэ щыщэу Марина Уваровам я 2-рэ чIыпIэр ыхьыгъ. Е. Арчебасовар нэгъэупIэпIэгъуи 3-кIэ М. Уваровам ыуж къинагъ. Апэрэ чIыпIэр Санкт-Петербург щыщэу По­лина Чернышовам къыдихи, дышъэр фагъэ­шъошагъ.

Адыгэ Республикэм изаслуженнэ тренерэу Алексей Войновым Елизавета Арче­басовар егъасэ.

Пащэхэр афэгушIуагъэх

Физкультурникым и Мафэ фэгъэхьыгъэ Iофтхьабзэхэр Мыекъуапэ щызэхащагъэх. Кушъхьэфэчъэ спортымкIэ республикэм икъэлэ шъхьаIэ щыкIогъэ зэIукIэгъухэм Уры­сыем изэнэкъокъу хэлэжьагъэхэ спорт­сменкэхэр къырагъэблэгъагъэх.

Адыгэ Республикэм и Премьер-ми­нистрэу Геннадий Митрофановыр, Урысыем кушъхьэфэчъэ спортымкIэ и Федерацие ипэ­щэ шъхьаIэу Юрий Кучерявэр, партиеу «Единэ Россием» ишъолъыр гъэцэкIэкIо куп ипащэу АфэшIэгъо Рэмэзан, Адыгэ Рес­публикэм кушъхьэфэчъэ спортымкIэ и Фе­дерацие ипрезидентэу Анатолий Лелюк Урысыем изэнэкъокъу хагъэунэфыкIхэрэ чIыпIэхэр къыщыдэзыхыгъэхэм афэгушIуагъэх, шIухьафтынхэр аратыжьыгъэх.

— Кушъхьэфэчъэ спортымкIэ хэгъэгум изэнэкъокъу Адыгеим дэгъоу щыкIуагъ. Ом изытет лъэшэу тигъэрэзагъ. Зэнэкъокъур мафэм зытыухыкIэ къещхынэу къыригъа­жьэщтыгъ, ар тшIогъэшIэгъоныгъ. Зэхэща­кIохэм лъэшэу тафэраз, — къытаIуагъ ды­шъэр ыкIи тыжьыныр къыдэзыхыгъэхэ Полина Чернышовамрэ Марина Уваровамрэ. — Адыгэ Республикэм щыкIогъэ зэнэкъо-къур, мэфэкI зэхахьэр тщыгъупшэжьыщтхэп.

— Урысыем спортымкIэ имастер сызэрэхъугъэм сигъэгушIуагъ. Тренерэу Алексей Войновым, пащэхэу IэпыIэгъу къысфэ­хъугъэхэм лъэшэу сафэраз. Адыгеим икоман­дэ пшъашъэхэу хэтхэм «тхьашъуе­гъэпсэу» ясIожьы сшIоигъу. Сизакъоу Урысыем изэнэкъокъу ящэнэрэ чIыпIэр къыщыдэсхын слъэкIынэу щытыгъэп. МэфэкIым хэлажьэхэрэм сафэгушIо, — къытиIуагъ Елизавета Арчебасовам.

Сурэтым итхэр: Урысыем изэнэкъокъу медальхэр къыщыдэзыхыгъэхэм афэгу­шIох.