ИлъэсипшI пчъагъэрэ лъэпкъ гъэзетэу «Адыгэ макъэм» сызщыдэлэжьагъэу Къэзэнэ Юсыф идунай зэрихъожьыгъэр къызысаIом, сыгучIэ изыгъ, зэрымыр сыхъугъэм фэдэу тIэкIурэ сыщысыгъ. ЕтIанэ сыгу къэкIы­жьыгъ, зэрэтихабзэу, бэмышIэу тызэрэзэдэгущыIагъэр. ИныбжьыкIэгъум дзэм къулыкъу щы­дэзыхьыгъэ кIалэм дэжь кIонэу зэриIуагъэр ыгъэцэкIэжьынэу зэрэщытыгъэр.

Нэужым сыгу къэкIыжьыгъ тиредактор шъхьаIэу Дэрбэ Тимур илъэс къэс гъэзет кIэгъэтхэгъур къызысыкIэ Къэзэнэ Юсыф къыригъажьэти, садэжь, Джэджэхьаблэ къызэрэкIощтыгъэр. Тызэдежьэти, Теуцожь районымрэ Адыгэкъалэрэ яадминистрациехэм япащэхэм за­IудгъакIэщтыгъ, еджапIэхэм Iоф­шIэпIэ зэфэшъхьафхэм ятхьа­матэхэр къыздедгъаIэщтыгъэх.

Юсыф нэфшъагъом Джэджэ­хьаблэ къэсыщтыгъ ащ фэдэ пшъэрылъ иIэ зыхъукIэ. «Адэ, тхьамэтэ маф, очъые сшIо­шIыгъ, сшIожьыгъ», — ыIозэ щагум къы­дахьэщтыгъ. Ар ренэу зэ­кIэупсыхьагъэу, зэкIужьэу фэпагъэщтыгъ, адыгэ пэIо дахэр къекIоу щыгъыгъ. ЛIы лъэпэ-лъэ­гэ нэгушIощтыгъ, нэхъоимрэ бэрэчэтыгъэмрэ иIуплъэ къагъэ­баищтыгъ, цыхьэ зыфыуигъэшIыщтыгъ. Ащ фэдэ лIы зэтегъэпсыхьагъэм иадыгагъэкIи, иIокIэ-шIыкIэкIи, изекIокIэ-псэукIэкIи, игъэсэныгъэкIи, Iушыгъэ зыхэлъ игущыIакIэкIи узIэпищэщтыгъ. Зыфэбгъэсэжьын щыIагъэп. Гулъытэшхо иIагъ, сына­хьыжъыти, къысшъхьащыкIощтыгъэп, адыгагъэм тетэу къыздэзекIощтыгъ.

А илъэсхэу тызызэдэлэжьэгъахэм къакIоцI тызэгурыIуа­гъэу, зэныбджэгъушIухэм фэдэу тыхэтыгъ, тызэфэчэфэу ренэу тызэфытеожьыщтыгъ. ЩыIэныгъэм исыд фэдэрэ лъэныкъокIи Iушыгъэ хэлъыгъ.

Сэ сизакъоп, Теуцожь рай­онымрэ Адыгэкъалэрэ ныбджэгъу хьалэлыбэ ащыриIагъ. Лъы­тэныгъэшхо фашIыщтыгъ, ренэу IукIэнхэм дэгуIэщтыгъэх, агъа­шIощтыгъ, алъытэщтыгъ. Ежьыри ныбджэгъухэм афэгумэкIыщтыгъ, ылъэкIэу зи къызтыригъанэщтыгъэп.

Джары Къэзэнэ Юсыф идунай зэрихъожьыгъэр зызэхахым, тэ тызэрэдэлажьэщтыгъэр ашIэти, къысфытеохэу зыкIаублагъэр. Теуцожь районымрэ Адыгэкъа­лэрэ ащыпсэухэрэ иныбджэгъу­хэу, тигъэзет икъитхыкIынкIэ тызэуалIэщтыгъэхэу Юсыф иду­най зэрихъожьыгъэр гукъэошхо зыщыхъугъэу къытфытеуагъэр бэдэд. Ахэм ащыщых Гъобэ­къуаекIэ Къатбамбэт Сахьидэ, АскъэлаекIэ ГъукIэлI Теуцожь, АдыгэкъалэкIэ Янэкъо Аслъан, ПэнэжьыкъуаекIэ Хъут Аскэр, ЕхъулIэ зэунэкъощхэу Пщымафэрэ Щамилэрэ, нэмыкIхэри.

Дунаир зыхъожьыгъэ Къэзэнэ Юсыф Алахьым джэнэтыр къы­рет, иунагъоу, игупсэу къызэринэкIыгъэхэм къиныр Iэты­гъошIу Тхьэм къафешI. Нэхэе Рэмэзан.