УФ-м и Президент мыгъэрэ и Джэпсалъэ гъэсэныгъэм ылъэныкъокIэ гухэлъэу яIэхэр анахьыбэу зигугъу къыщишIыгъагъэхэм ащыщ.

— КъыткIэхъухьэрэ лIэужхэм амалэу яIэр нахьыбэ хъуным зэрэтфэлъэкIэу ыуж титыщт, — къы­Iуагъ Владимир Путиным. — Зэпстэур еджапIэм къыщежьэ, арышъ, ар лъэхъаным диштэу гъэ­псыгъэным, кIэлэеджакIохэм гуха­хъо чIагъотэным, ятIонэрэ яунэ афэхъуным тапылъын фае.

2024-рэ илъэсым ыкIэм нэс джыри еджэпIэ 1300-рэ шъолъырхэм ащагъэуцущтэу, автобус мин 16 афащэфыщтэу ары къэралыгъом ипащэ къызэриIуа­гъэр. Ахэм ягъэцэкIэн зэрэрагъэжьагъэр уахътэм къыгъэлъэгъуагъ.

Джыри зэхэсыгъохэм ащыщ гъэсэныгъэм исистемэ иIофхэм къащыфигъэзэжьзэ, IT-сферэм ылъэныкъокIэ Правительствэр кIэщакIо зыфэхъугъэхэм ащыщхэм ягугъу къышIыгъ. Владимир Путиным къызэриIуагъэмкIэ, апшъэрэ классхэм арыс кIэлэеджакIохэм апае программированием ыбзэ изэгъэшIэнкIэ ыпкIэ зыхэмылъ илъэситIу курсхэр щыIэ хъущтых.

— Ащ мэхьанэ иI, сыда пIомэ а ныбжьыр ары сэнэхьатэу зыфаехэр къызщыхахырэр. IT-м феджэнхэу амалышIухэр яттыхэмэ, ащ ящыIэныгъи рапхын алъэкIыщт, — къыIуагъ Президентым.

Джащ фэдэу мы илъэсым инженерхэр зыщагъэхьазырхэрэ еджапIэхэм ягъэ­псын атIупщыщт, кIэщакIо зыфэхъухэрэр пхыращынхэ амал ныбжьыкIэхэм аратыщт.