Программэм амалэу къытыхэрэм шъуащыгъозэным пае
Гъэстыныпхъэ шхъуантIэр унэм епщэлIэным пае тыда е хэта зызфэбгъэзэн фаер? Онлайн шIыкIэм тетэу специалистхэр упчIэжьэгъу къыпфэхъунхэ алъэкIыщта?
Мы упчIэхэр республикэм щыпсэухэрэм Адыгеим шъолъыр гъэIорышIэнымкIэ и Гупчэ бэрэ къыфагъэхьых. Ахэм джэуапхэр къаратыжьы социальнэ газификацием ипрограммэ республикэм щызыгъэцэкIэщт организацием илIыкIохэм. УФ-м и Президентэу Владимир Путиным пшъэрылъэу къафишIыгъэм диштэу компаниеу «Газпром газораспределение Майкоп» зыфиIорэм шъолъырым щыпсэухэрэм пэшIорыгъэшъ лъэIу тхылъхэр къаIихынэу ригъэжьагъ. Мы программэм ишIуагъэкIэ ыпкIэ хэмылъэу цIыфым ичIыгу Iахь игъунапкъэ гъэстыныпхъэ шхъуантIэр фыращэлIэщт. Ежь ыгъэцэкIэнэу къыфэнэжьырэр ичIыгу Iахь пхырыкIыщт газрыкIуапIэм ишIын ыкIи хэушъхьафыкIыгъэ оборудованием игъэуцун апэIухьащт мылъкур къыгъотыныр ары.
«Догазификацием» сыда къикIырэр?
ЫпшъэкIэ къызэрэщытIуагъэу, ыпкIэ хэмылъэу участкэм игъунапкъэ гъэстыныпхъэ шхъуантIэр ращалIэ. Урысыем и Правительствэ пшъэрылъэу къыгъэуцугъэм къызэрэщиIорэмкIэ, ар 2023-рэ илъэсым нэс гъэцэкIэгъэн фае.
Гъэстыныпхъэ шхъуантIэр зэрэпагъэнэщтым иедзыгъохэр
1. ЛъэIу тхылъ птыныр 2. Гъэстыныпхъэ шхъуантIэр пыгъэнэгъэнымкIэ техническэ амалэу щыIэхэр гъэунэфыгъэнхэр 3. Лъэныкъохэм зэзэгъыныгъэ зэдашIыныр 4. Унэм игъэхьазырын (оборудованием ищэфын ыкIи игъэуцун) 5. Технологическэу пыгъэнэгъэныр
Хэта зызфэбгъэзэн плъэкIыщтыр?
— фэIо-фашIэхэм ягъэцэкIэн изыкI гупч: къалэу Мыекъуапэ, урамэу Апшеронскэр, унэу N 4-р; — компаниеу «Газпром газораспределение Майкоп» зыфиIорэм икъутамэхэу муниципалитетхэм ащыIэхэм; — фэIо-фашIэхэм ягъэцэкIэн фэгъэзэгъэ лъэныкъуабэ къызэлъызыубытырэ гупчэхэу «Мои документы»; — «Газпром газораспределение Майкоп» зыфиIорэм исайтэу adyggaz.ru; — догазификацием ипорталэу https://connectgas.ru
Программэм ухэлэжьэным пае
Хэбзэгъэуцугъэу щыIэм диштэу унэе псэупIэр ыкIи чIыгу Iахьыр цIыфым тетхагъэхэмэ, гъэстыныпхъэ шхъуантIэр зыдэщэгъэ псэупIэм унэр дэтмэ, гъэпсынкIэгъэ шIыкIэм тетэу газыр аIэкIэгъэхьэгъэным ипрограммэ ар къыхеубытэ.
ЛъэIу тхылъ стыгъэ – сыдигъуа гъэстыныпхъэ шхъуантIэр къызcфыращэлIэщтыр?
Зэзэгъыныгъэм итхэгъэщт анахь охътабэу ащ ыхьын ылъэкIыщтыр. А пIалъэм шIокIыщтхэп.
ЦIыфым идокументхэр имыкъухэ е хэукъоныгъэ ыкIи мытэрэзыныгъэ щыIэ зыхъукIэ илъэIу тхылъ фызэкIагъэкIожьын алъэкIыщт. Джащ фэдэу программэм хэлэжьэным пае унэр тетхэгъэн ыкIи гъэстыныпхъэ шхъуантIэр зыдэщэгъэ псэупIэм ар дэтын фае.
Социальнэ газификацием ипрограммэ фэгъэхьыгъэ къэбырымкIэ виртуальнэ упчIэжьэгъу къышъуфэхъущт чат-ботэу «Гази @gaz01bot» зыфиIорэр.