Адыгеим и ЛIышъхьэу КъумпIыл Мурат автомобиль гъогоу Инэм – БжыхьэкъоякIэр зыфиIоу Тэхъутэмыкъое районымкIэ щыIэм гъогу зэхэкIыпIэу щагъэпсырэм изытет зыщигъэгъозагъ. Лъэпкъ проектэу «Щынэгъончъэу щыт гъогу дэгъухэр» зыфиIорэм тегъэпсыхьагъэу ыкIи Адыгеим ия 100-рэ илъэс фэгъэхьыгъэ Iофтхьабзэхэм адиштэу а псэуалъэр ашIы.

УплъэкIун IофшIэнхэм ахэлэжьагъэх федеральнэ инспектор шъхьаIэу Сергей Дрокиныр, Адыгэ Республикэм и Премьер-министрэу Геннадий Митрофановыр, Адыгэ Респуб­ликэм псэолъэшIынымкIэ, транспортымкIэ, ЖК-мкIэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан, Тэхъутэмыкъое районым ипащэу Шъхьэлэхъо Азмэт.

Адыгеим и ЛIышъхьэ къызэ­рэхигъэщыгъэмкIэ, федеральнэ гупчэм иIэпыIэгъу хэлъэу анахь мэхьэнэ ин зиIэ проектхэу пхырытщыхэрэм а гъогу зэхэкIыпIэм игъэпсын ахэхьэ. Шъолъы­риплI хъущт зэхэкIыпIэу километри 5,2-рэ фэдиз зикIыхьэгъэщтым зэхэубытагъэу сомэ миллиарди 3 фэдиз пэIухьащт, ащ щыщэу мы илъэсым сомэ миллиард 1,3-м ехъу къыхагъэ­кIыгъэр.

ПсэолъэшIхэм къызэраIуа­гъэмкIэ, графикым ыпэ итхэу IофшIэнхэр агъэцакIэх. 2020-рэ илъэсым а проектыр рагъэжьэгъагъ, а лъэхъаныр ары проект-сметэ документациери зызэхагъэуцогъагъэр, джащ фэдэу чIыгу-мылъку Iофыгъохэри зызэшIуахыгъагъэхэр. Джы непэ подряднэ организацием лъапсэу ащ иIэщтыр ыгъэхьазырыгъах, убырыун IофшIэнхэри ыгъэцэкIэгъахэх. 2022-рэ илъэсым ыкIэ­хэм адэжь IофшIэнхэр аухынхэу ары зэрэгугъэхэрэр.

КъумпIыл Мурат къызэрэхигъэщыгъэмкIэ, мы чIыпIэм щып­сэухэрэмкIи, автотуристхэмкIи (ахэм япчъагъэ ренэу нахьыбэ мэхъу) гъогу зэхэкIыпIэм мэ­хьа­нэшхо иIэу щыт. ХышIуцIэ Iушъом екIурэ гъогум автомобилэу тетым къыкIегъэчыгъэнымкIи, а гъогум тхьамыкIагъоу къытехъухьэхэрэр нахь макIэ шIыгъэнхэмкIи псэолъакIэм ишIуагъэ къэкIощт, индустриальнэ паркэу ашIырэр къызыдэплъытэжькIэ, районым ихэхъоныгъэ тегъэпсыхьэгъэ Iофыгъо­хэу зэшIуахыхэрэм язы Iахь гъэцэкIагъэ хъугъэу плъытэн плъэкIыщт. Ащ нэфэшъхьафэу мэшIокугъогу зэпырыкIыпIэм дэжь автомобильхэр зэрэщызекIохэрэр нахь щынэгъончъэу щытынымкIэ, псэупIэу Инэм дэс лъэсрыкIохэми язекIонкIэ ар амал дэгъу хъущт. Метри 157-рэ зикIыхьэгъэщт лъэсрыкIо зэпырыкIыпIэм ишIыни а проектым къыделъытэ. ЗэпырыкIыпIэм ишIын­кIэ джырэ уахътэм диш­тэрэ материалхэр нахь игъэкIотыгъэу къызфагъэфедэнхэ зэ­рэ­фаер Адыгеим и ЛIышъхьэ къыхигъэщыгъ, ащ ишIуагъэ къэкIощт псэуалъэр нахь щынэгъончъэу, Iэрыфэгъоу щытынымкIэ.

«Федеральнэ гупчэм IэпыIэгъоу къытитырэм ишIогъэшхо къэкIо республикэм игъогу­хэр нахь зэтегъэпсыхьэгъэнхэмкIэ, АдыгеимкIэ мэхьанэшхо зиIэ инфраструктурнэ псэуа­лъэхэр шIыгъэнхэмкIэ. Урысые Федерацием и Президентэу Владимир Путиным цIыфхэм щыIэкIэ Iэрыфэгъу ыкIи щыIэкIэ щынэгъончъэ яIэным фытегъэпсыхьэгъэ стратегическэ пшъэрылъхэу къыгъэуцухэрэр зэшIохыгъэ хъунхэмкIи ахэр анахь амалышIухэм ахэхьэх», — къыхигъэщыгъ КъумпIыл Мурат.

Адыгеим и ЛIышъхьэ икIэухым пхъашэу къафигъэпытагъ проект документацием диштэу псэолъэ­шIыныр гъэцэкIагъэ хъуным, бюджет мылъкур нахь шIогъэ ин къытэу гъэфедэгъэным анаIэ атырагъэтынэу.

АР-м и ЛIышъхьэ ипресс-къулыкъу