Джэджэ районым ит псэупIэу Георгиевскэм екIолIэрэ автомобиль гъогум игъэцэкIэжьын лъагъэкIуатэ. Аужырэ шапхъэхэм адиштэрэ шIыкIэхэр къызфагъэфедэзэ ар зэтырагъэпсыхьэ.

Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдыхэлъытагъэу IофшIэнхэр рагъэ­кIокIых. ШышъхьэIум ыкIэм нэс мы псэупIэм екIолIэрэ километри 2 фэдиз зикIыхьэгъэ гъогум изы Iахь федеральнэ шапхъэхэм адиштэ хъущт.

IофшIэнхэр зыгъэцакIэрэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обще­ствэу «Шэуджэн ДРСУ-р» ары. Илъэс пчъагъэ хъугъэу лъэпкъ проектым игъэцэкIэн ар хэлажьэ, ащкIэ зэфэхьысыжь дэгъухэри иIэх.

Гъогу Iахьым игъэцэкIэжьын сомэ миллион 15,5-рэ тефэщт. IофшIэнхэм къадыхэлъытагъэх гъогур пэшIорыгъэшъэу укъэбзыгъэныр, ар зэщиз зышIыщт асфальт-бетон зэхэлъыр егъэ­кIугъэныр, асфальт лъэпкъэу ЩМА-15-р телъхьэгъэныр, нэ­мыкI­хэри.

IофшIэнхэр гъэцэкIагъэхэ зэрэхъурэм лъэплъэх «Адыгея­автодорым» испециалистхэр. Пшъэрылъ шъхьаIэу ыкIи къыз­фэкIонхэ фэе къэгъэлъэгъонэу щытыр шъолъыр мэхьанэ зиIэ гъогухэм япроцент 60 фэдизыр шэпхъэшIухэм адиштэу гъэцэ­кIэжьыгъэнхэр, зэтегъэпсыхьэгъэнхэр ары.